BATALANE KABLA 28

1Na ka bɔ́lɛ ɔgbankpi ɔmmɔ kemo ni, búbati ka mmɔ ndi ntuntɛ kalɔ kani na baalɔ Malta. 2Amu na kalɔ kamɛni lɛlɔ bekyuli báƒɔ-bu kaduɛ. Ka ɔnantu ku kɔyɔ uwi na ɔdi ɔsu ni, básala-bu ogya bonwu ɔdi na kutudɔ mmɔ na béte-bu eduo. 3Amu ka Paulo ɔnii uudie ekyweni adi ɔkya ogya ɔmɛni kemo ni, kɔlakpi kɔdi kɔ́vi kɔ́lɛ ekyweni amɛni akɔ ɔ́si ogya liwulu lɛmmɔ ɔsu, na kúbakɔ kɔ́mana Paulo kɔnu lɛlɔ. 4Amu ka kalɔ kamɛni lɛlɔ bekyuli bánu ka kɔlakpi kɔmɛni kɔ́ƒa-nwu kɔnu lɛlɔ ni, básu lɛlɔ banini, “Bekyuli ɔdune na ukyuli ɔmɛni ɔdi. Anwuɔsu baƒiɔ baláya-nwu wakɛ ngba ina ka úkeli ɛpu kemo kukpi.” 5Nsu Paulo úƒimi kɔlakpi kɔmɛni ɔ́kya ogya ɔmɛni kemo, na kútabla-nwu lɛla lɛdi. 6Amu na bekyuli bamɛni benye baanu, na bákali ka ɔdubuƒu iye ɔlɛ ubo ukpi kɔnakunwi. Amu ka bénye bánu laa na ɔmɛni ɔdi útebo lɛni ni, bábavumana bana bɔkali na nwuna lɛlɔ na básu banii baƒiɔ badi. 7Amu na kesii kani na búbenye mɛni ni, ude kalɔ kammɔ Ɔga Publio kesii. Na ɔga ɔmɛni lɛnɔ ɔ́ƒɔ-bu ku kubiti, na ɔ́nu-bu lɛlɔ emeyi atɛ ƒui. 8Amu uwi ɔmɛni kemo kani ni, Publio ɔti uuƒi. Na nwuna lɛlɔ lɛ́ƒɔ ogya, na ɔɔnyi kaƒɔ lɛnɔ. Na ka Paulo útéduo-nwu kudɔ na ɔ́kpali katɔ na úti enu ɔ́sia-nwu lɛlɔ ni, ɔlɛ ɔmmɔ ɔ́ba-nwu. 9Ka bénu ɔlɛ ɔmmɔ bɔbwi ni, balɛne bani nkya kalɔ kammɔ lɛlɔ ƒui bálɛ bébo, na Paulo ɔ́bwi-ma. 10Na ablala amɛni ɔsu ni, bébete-bu etela pii. Na ɔni na uwi údu ka bɔtɔlɔ mmɔ ni, béti etela ani ƒui bɔdubuti bɔda ulu béboku-bu. 11Bɔ́kya mmɔ abuli atɛ asa na bɔ́tɔlɔ. Na bula bɔtɔlɔ kemo ni, búlie ɔkɔlɔ ɔni baalɔ banii Nta Baƒiɔ ɔni nási Aleksandria úbenye kalɔ kamɛni lɛlɔ na kɔyɔ uwi ɔmmɔ kemo. 12Ka bɔ́ta mmɔ ni, ɔma udeedi ɔni búdi búnye ndi Sirakusa. Na búlie mmɔ lɛnɔ emeyi atɛ. 13Ka bɔ́si mmɔ ni, bɔ́tu búnwini bútédu Regio. Na nwuna kadi kégye ni, ɔƒɛƒɛɛ ɔbuni ɔdi úkpo ɔ́si bula kama ɔni nébunku-bu, na útiku-bu na búbeduo Puteoli limeyi linyɔdi lɛlɔ. 14Na mmɔ na bútánu baƒɔtaadine badi, na bévele-bu banii bulie-ma kudɔ emeyi maatɛ. Na ɔmɛni kama ka bɔ́ta mmɔ ni, bútéduo Roma. 15Na ka banwa bani nkya Roma lɛnɔ bénu ka bɔ́si bɔdubo ɔsu ni, badi bási ɔgyu bábasiaku-bu na Apia Kuye. Na badi lɛnɔ bábasiaku-bu na likpo lɛni baalɔ Kuduokɔ Ɛtɛ. Ka Paulo ɔ́nu-ma ni, ɔ́gya Katɔti enu, na ɔ́sɔ ɔ́kɛ kayi úbu. 16Amu na uwi ɔni na bútéduo Roma ni, béte Paulo kuƒi banii utélie kesii kani na ɔɔyɔ́. Na báya na bekpone bamɛni kemo unwi útaagyumana-nwu. 17Amu na emeyi atɛ kama ni, Paulo ɔ́lɔ Yudaƒuɔ batɔnkune bani nkya mmɔ ƒui ɔ́sala. Ka bása ni, ɔ́su-ma ɔnini, “Banwa, Yudaƒuɔ bani nkya Yerusalem néƒie-mi na béti-mi béte Romaƒuɔ aban banii ɔtɛku-mi litemi ina ka ńtaƒiɔ ukyuli ɔdi iye bula bati kuuku ɔdi ala bɔbla bɔdi. 18Romaƒuɔ bamɛni bátɛku-mi litemi na báwia ka nka banyonu-mi. Ɔsika ni, bátanu lɛla lɛni lɛlɔ benye badu-mi kɔtɔ aani kalɛ na Yudaƒuɔ batɔnkune bani néƒie-mi báwia. 19Na uwi ɔni na Yudaƒuɔ bamɛni bénye bétile lɛla lɛmɛni ni, ɔ́ya na lɛ́su-ma nnii betiku-mi na lisie ntánu Ɔga Unengudi Kaesare ɔlati. Ɔsika mɔɔwia ka unu-mi lɛla lɛni mɔɔsu kalɔ, na ɔɔɔdi bɔyɔ na lɛ́yɔ ka lɛda mina kadi bekyuli kenye. 20Ɔmɛni ɔsu na lɛ́lɔ-mii. Ɔsika Ukyuli Ɔƒunadi ɔni lɛlɔ na Israelƒuɔ basia anu ni, nwuna lɛlɔ na mbo bɔƒɔtaadi ɔsu na kɔgba kɔmɛni kɔda-mi lɛni.” 21Amu na básu-nwu banini, “Abu ni, bútenu tɔ lɛla lɛdi bútasiku-ɔ lɛlɔ. Na bútaƒɔ ɔku iye linyesia likpidi lɛdi na ƒula lɛlɔ bútasiku banwa bani nási Yudea bebo mɛni ɔdi kudɔ. 22Nsu bɔɔwia ka bunu lɛla lɛdi bɔsiku lɛla lɛni na áƒɔ ádi mɛni lɛlɔ. Ɔsika sɔsɔ ni, balásu lɛla lɛbuni lɛdi taasiku lɛkpa lɛmɛni lɛlɔ na kesi kesii.” 23Amu na bése limeyi lɛdi bese, na bekyuli pii bébo-nwu kudɔ. Mmɔ na ɔ́tɛmi úte-ma ɔ́siku Katɔti lɛga kadikɔ lɛlɔ. Na ɔ́lɔ-ma kasusu úsienku kesii kani na Mose ku Katɔti kenye bediene bénweni ala bése básiku Yesu lɛlɔ. Na ɔ́tɛmiku-ma ɔ́si ɔtanta útédu useyi uwi. 24Na bana akɔ bekyuli badi báƒɔ-nwu bádi, nsu badi lɛnɔ bátaƒɔ-nwu bátadi. 25Amu na etemila amɛni ébenwini unyeƒi na bana akɔ. Na bégyingya uwi ɔni na Paulo ɔ́su-ma litemi likplodi lɛmɛni ɔnini, “Ɔdi litemi geen ka Katɔti Kɔyu kɔ́sia Yesaia lɛlɔ na ɔ́su bula bati kuuku ɔnini, 26'Sie tásu Yudaƒuɔ anii, “Bɛdubunu na bilénu kalɔ, na bɛdubɔnu na bilanu biláti.” 27Ɔsika bekyuli bamɛni kɔyi kútile, na bebo atu ɔkplu na bébile bana anumi lɛnɔ. Si ɔɔɔdi lɛni ni, nka bana anumi adubɔnu, na bana atu lɛnɔ adubunu, na bana kɔyi lɛnɔ kɔdubɔbla nwaa na benwini bebo-mi kudɔ na lɛbwi-ma.' ” 28- 29Amu na Paulo ɔ́wɔlɔ-ma bɔtɛmiku ɔnini, “Ɔlɛka lɛsu-mii na bɛti ka ni, bekyuli bɔƒɔ litemi lɛmɛni ni, béeti-ni béselaku bani naaadi Yudaƒuɔ. Na ama ni, badubɔƒɔ-ni!” 30Amu na Paulo ɔ́kya mmɔ akwa anyɔ na kaduli kani na úvo kemo, na útaaƒɔ bekyuli bani ƒui muubo-nwu kudɔ. 31Ɔ́kɔ Katɔti lɛga kadikɔ lɛsa ku kayi buse úte-ma, na ɔ́tina-ma ala ani nkɛnku Yesu Kristo lɛlɔ. Na ukyuli ukyuli útetile-nwu kuƒi.

will be added

X\