BATALANE KABLA 26

1Amu na Agripa ɔ́su Paulo ɔnini, “Kuƒi kɔtɛ ka ataasu ƒula litemi.” Anwuɔsu Paulo ɔ́gya enu na ɔ́tɛmi údie lɛlɔ ɔnini, 2“Bula Ɔga Ɔbune Agripa, lili lɛ́dia-mi ka ndubo mina litemi bɔda bɔva ƒula anumi na lɛla lɛni ɔsu na Yudaƒuɔ báda-mi kenye lɛlɔ. 3Ɔsika ngyi ka awɔ agyi Yudaƒuɔ ɔda bubo ku bana ɔdi ƒui kaduɛ. Ɔmɛni ɔsu ni, ntɛ na awɔ ɔsu. Kɛ kayi na enu mina litemi. 4“Yudaƒuɔ ƒui bagyi kalɛ na lɛ́da mina lɛlɔ kaduɛ na mina lɛnamu uwi na mina ɔma ku Yerusalem lɛnɔ. 5Lɛni kani na líti lílie ɔni na si nka budie na badubudie-mi kenye na litemi geen bɔsu kemo ni, nka bagyi ka ami ndi Ƒarisini ɔni mɔɔdi Yudaƒuɔ ɔda bubo ɔdi lɛlɔ teetulo. 6Na lɛla lɛni ɔsu geen na béti etemila amɛni baasia-mi lili ndi ɔni na ami nnye mɔɔnu ulu ku lɛnunsia teete kenye kani na Katɔti ɔ́su bula bati kuuku úse ɔsu. 7Israelƒuɔ kaba kani ndi leevu-inyɔ mɛni ƒui baakya ɔkplu usien ku ɔƒɛ ka ama lɛnɔ bakɛ lɛnunsia lɛni na ami mbo mɛni. Bula Ɔga Ɔbune, ɔmɛni ɔsu na Yudaƒuɔ baadá-mi kenye. 8Bi ɔsu na ɔɔyu-mii ɔkplu ka bɛƒɔ bɛdi ka Katɔti ɔɔgyila bekpine? 9“Líti lɛ́sia lɛlɔ nnii ntaabla Yesu ɔni ndi Nasareni basiakune kalala. 10Yudaƒuɔ bakpane benengu béte-mi ɔyikun na líƒie bekyuli kedee pii lɛ́kya ɔtɔ na Yerusalem. Na bana akɔ bani na bádu lɛnɔ ni, ɔdi-mi lɛƒɔyɔ. 11Lɛ́siaku-ma na líkpoku-ma lɛni laa útédu lɛma bamba na ɔgyu kemo muedi. Na lɛ́ya na baabla-ma kalala na Yudaƒuɔ kɔsakɔ ƒui. Na línye-ma lɛlɔ na beetemi kɔbɔ ala taasiku Yesu lɛlɔ. 12“Kasusu kamɛni udu kani lɛlɔ na líti lísela Damasko na ɔyikun ɔni na bakpane benengu béte-mi kenye. 13Bula Ɔbune, ɔni na nkɛ ulu ɔƒiiwi lísela ni, lɛ́nu ka bukeye bɔni muukeye teetulo ɔƒɛ búkeye bɔ́si katɔ bɔ́mana ami ku bani nkɛ. 14Mmɔ ka bula ƒui búbuli ni, línu lɛdi lɛdi ka lɛɛtɛmi na Hebri lɛdi kemo taasu lɛnini, 'Saulo, Saulo, bi ɔsu na eekpóku-mi lɛni? Si aata liyu ni, ƒula lɛlɔ kani na aadú.' 15“Amu na líye-nwu nnini, 'Ati, ɔma na adi?' “Na lɛdi lɛmmɔ lɛ́su lɛnini, 'Ami ndi Yesu ɔni na eekpóku kpakplaa. 16Ɔƒaani ni, ta nye! Ɔsika lídie lɛlɔ lɛ́tina-a kalɛ na meti-ɔ mabla mina kabla ɔblane ku mina kenye udiene. Adubɔsu kayawi ƒui lɛla lɛni na ánu mɛni ku ala ani na ndubo buteedie taatina-a. 17Na kesii kani na mɔɔtala-a ni, ndubɔgyumana-a na ƒula kadi bekyuli akɔ ku kadi bamba lɛnɔ akɔ. 18Na ndubɔya-a na etébimi-ma anumi na balɛ Satan ɔyikun kemo na kasuudikɔ mmɔ bebo Katɔti ɔyikun ku bukeye kemo. Na Katɔti ɔdubuti bana ekpidi ɔkyiɛ-ma na wabla-ma katɔ ala badine aani bani na ɔ́ƒuna úte nwuna lɛlɔ ka báƒɔ-mi bádi ɔsu.' 19“Anwuɔsu ni, Ati Agripa, ńtada atu ńtedie budie bɔtina bɔni na lɛ́nu lɛ́siku katɔ mmɔ lɛlɔ! 20Lɛ́ka litemi buni bɔsu bute Damaskoƒuɔ ku Yerusalemƒuɔ ku Yudaƒuɔ ƒui ku bani naaadi Yudaƒuɔ lɛnɔ nnii benwini kama bakya bana ekpidi na beti anumi besienku Katɔti kudɔ, na bataabla ala ani mɔɔtina ka bávumana sɔsɔ. 21Ɔmɛni ɔsu na Yudaƒuɔ bamɛni bébeƒie-mi na Yudaƒuɔ kakpakɔ ɔni na nnye mɔɔsu etemila amɛni. Na báwia ka nka badu-mi. 22Nsu ni, Katɔti údie-mi na bana enu kemo. Anwuɔsu na mmua nli ngba muudie ɔmɛni kenye taatina amii benengu ku bekyuli ƒui lɛnɔ. Lɛla lɛni na mɔɔsu mɛni ni, ani kani na Katɔti kenye bediene ku Mose bene ƒui básu ka lɛdubɔlɛ. 23Na ani ndi ka Mesia ɔni ndi Ukyuli Ɔƒunadi ɔdubo ubebo abi. Na anwu ndubɔbla ukyuli udeedi ɔni maka bɔta bɔlɛ bekpine akɔ, na ɔdubuti bukeye uboku Yudaƒuɔ ku bani naaadi Yudaƒuɔ ƒui.” 24Kɔnakunwi ni, Ƒesto ɔ́va ɔ́su ɔnini, “Paulo, eekpi libuo! Ƒula ala bɔtɛya pii búbile-ɔ lili kemo!” 25Amu na Paulo údie kenye ɔnini, “Ƒesto Ɔbune, neeekpi libuo. Biteti litemi lɛmɛni bitakya bɔƒia. Litemi geen na mɔɔsu. 26Sɔsɔ ni, Ɔga Agripa ɔgyi etemila ani na mɔɔsu mɛni. Anwuɔsu muutemiku-nwu ku kayi ƒaa. Lɛ́ƒɔ lɛ́di kede kede ka bátabla ala amɛni bátabɛ-nwu. 27Ati Agripa, áƒɔ Katɔti kenye bediene bamɛni ádi? Ngyi ka áƒɔ-ma ádi.” 28Amu na Agripa úye Paulo ɔnini, “Aawia ka linwini Kristoni uwi klukui ɔmɛni kemo?” 29Amu na Paulo údie kenye ɔnini, “Uwi klukui iye uwi gyɔlɔɔ ni, mɔɔkpali katɔ nnii ɔmwi ni, amii bani nkya mɛni ƒui binwini aani kalɛ na ami lɛnɔ nse. Nsu ɔɔɔdi aani kalɛ na kɔgba kɔmɛni kɔ́da-mi kalɛ!” 30Amu na ɔga ɔmɛni ku aban ɔgadine ku Berenike ku bekyuli bakladi ƒui báta. 31Na ka bávi bálɛ mmɔ ni, bátɛmi básiku Paulo litemi lɛmɛni lɛlɔ básu banini, “Ukyuli ɔmɛni útabla lɛla lɛni na badu-nwu iye bakya-nwu ɔtɔ.” 32Amu na Agripa ɔ́su Ƒesto ɔnini, “Nka bɔkana bɔnyonu-nwu si ɔɔɔdi ka úti litemi lɛmɛni ɔ́siaku Kaesare lɛlɔ ɔsu.”

will be added

X\