BATALANE KABLA 25

1Amu ka Ƒesto útéduo nwuna kalɛkɛ kani lɛlɔ na ɔdubo bɔdi emeyi atɛ kama ni, ɔ́si Kaesarea úsie Yerusalem. 2Mmɔ na bakpane benengu ku Yudaƒuɔ benengu básu-nwu Paulo lɛlɔ litemi. Na bévele-nwu banii 3utétiku Paulo uboku Yerusalem. Na bana kasusu ndi ka nka betélie-nwu ulu. Na si ɔ́si ɔɔví ni, na badu-nwu. 4Nsu Ƒesto ɔ́su-ma ɔnini, “Ɔtɔntɛne na Paulo ɔdi na Kaesarea. Na ami lɛnɔ ndubo mmɔ busie uwi klukui. 5Anwuɔsu bɛya na bina benengu bebo mmɔ na bebedie nwuna bɔƒiɔ batina.” 6Amu na emeyi maane iye leevu kama ni, Ƒesto únwini úsie Kaesarea. Na limeyi lɛni na útéduo mmɔ kadi kégye ni, ɔ́lɔ Paulo litemi lɛmɛni. 7Amu ka Paulo úbeduo litemi katɛkɔ mmɔ ni, Yudaƒuɔ bani nási Yerusalem bébenye bámana na bánwi etemila pii básia-nwu ani kalɔ na bátakana budie. 8Paulo údie nwuna kenye na ɔ́su ɔnini, “Ńtaƒiɔ Yudaƒuɔ iye Yudaƒuɔ kakpakɔ iye Ɔga Unengudi Kaesare ɔda bubo bɔdi lɛlɔ.” 9Amu ka Ƒesto ɔɔwia ka Yudaƒuɔ bataayɔ-nwu litemi ɔsu ni, úye Paulo ɔnini, “Aayɔ́ ka esie Yerusalem na ntátɛ ku-ɔ litemi mmɔ?” 10Amu na Paulo ɔ́su-nwu ɔnini, “Oowo. Béte-mi kuƒi ka kalɔ kamɛni ƒui lɛlɔ ɔdine ɔlatidi ɔtɛku-mi litemi. Awɔ agyi geen ka ńtaƒiɔ. 11Si lɛ́bla lɛla lɛni na ɔlɛka badu-mi ni, ndubɔtuna na badu-mi! Nsu si ńtaƒiɔ ni, útalɛka awɔ iye ukyuli bamba uti-mi ute bekyuli bamɛni ɔnii badu-mi. Anwuɔsu lɛ́da mina litemi mɔɔvá Ɔga Unengudi Kaesare anumi!” 12Ɔmɛni kama ni, Ƒesto ku nwuna litemi batɛne bammɔ básu-nwu banini, “Ka éti ƒula litemi átáva Kaesare anumi ɔsu ni, Kaesare kudɔ na adubusie.” 13Amu na emeyi adi kama ni, Ɔga Agripa ku ɔnwani ulekubi ɔni baalɔ Berenike bébo Ƒesto kudɔ na Kaesarea banii babanu-nwu na begyele-nwu. 14Bákya mmɔ emeyi pii na Ƒesto úti Paulo litemi ɔ́su ɔga ɔmɛni ɔnini, “Ɔnana ɔdi ɔtɛ ɔtɔ mɛni, na Ƒelike úti nwuna litemi úte-mi. 15Ka lísie Yerusalem ni, bakpane benengu ku bana batɔnkune básu-mi etemila básiku-nwu lɛlɔ, na básu-mi ka nte kuƒi na badu-nwu. 16“Na lídie kalɔ lɛ́tina-ma uwi klukui kemo ka Romaƒuɔ ɔda bubo uléte kuƒi ka badu ukyuli kɔtɔ asa na batɛku-nwu litemi. Ɔlɛka bete-nwu kuƒi na anwu ku bekyuli bani nákɛ litemi basa asa na basu-ni. 17Uwi ɔni na bébo mɛni na litemi lɛmɛni ɔsu ni, ami lɛnɔ ńtada-ni ńtese. Limeyi lɛmmɔ kadi kégye kani ni, lɛ́ya na bétiku ɔnana ɔmɛni béboku. 18Nsu ni, etemila ani na básu básiku-nwu lɛlɔ ni, ávumanaku ani na lɛ́kali ka anya na badubo bɔsu. 19Ala ani na básu mɛni akɛnku bana bɔkpa lɛlɔ ku ukyuli ɔni baalɔ Yesu na úkpi lɛlɔ, nsu Paulo ɔmua unye ɔɔsu ka uli ngba! 20Ɔ́bla-mi basaa na ńtati kalɛ na likulo litemi lɛmɛni. Anwuɔsu líye Paulo si ɔɔwia ka litiku-nwu lisienku Yerusalem na utédie etemila amɛni kenye na Yerusalem mmɔ. 21Nsu Paulo ɔnii ɔɔwia ka uti nwuna litemi ute Ɔga Unengudi Kaesare.” 22Amu na Ɔga Agripa ɔ́su Ƒesto ɔnini, “Mɔɔwia ka ami ɔlati linu nwuna litemi.” Amu na Ƒesto ɔ́su-nwu ɔnini, “Adubunu litemi lɛmɛni kɔnaadi!” 23Amu ka kadi kégye ni, Ɔga Agripa ku Berenike bakɛ lɛgadi kemo bébeduo litemi katɛkɔ mmɔ. Na bekpone benengu ku ɔma ɔmmɔ kemo benengu básiaku-ma kama. Na Ƒesto úte ɔyikun na bédie Paulo béboku. 24Na Ƒesto ɔ́su ɔnini, “Ɔga Agripa ku amii bani nábasa mɛni ni, ɔnana ɔmɛni ndi ukyuli ɔni na Yudaƒuɔ bani nkya Yerusalem ku Kaesarea mɛni lɛnɔ baawia badu! 25Nsu nka mina kasusu kemo ni, útabla lɛla lɛni na ɔlɛka badu-nwu. Nsu anwu lɛnɔ ɔnii ɔɔƒɔ́ nwuna litemi ute bula ɔga unengudi. Na ami lɛnɔ ńtebulo. 26Nsu ni, bi na ɔlɛka linweni lite ɔga unengudi ɔmɛni? Ɔsika ni, útaƒiɔ geen. Anwuɔsu na líti-nwu líboku-mii ku awɔ Ɔga Agripa geen ka atɛku-nwu litemi na atina-mi litemi lɛni na menweni masiku-nwu lɛlɔ. 27Ɔsika ni, ɔɔɔdia ka liti ɔtɔntɛne ɔdi lisienku kalɔ kamɛni ƒui lɛlɔ ɔdine ɔni na ńtedie likpidi lɛni na ɔ́bla kalɔ ntatina-nwu.”

will be added

X\