BATALANE KABLA 24

1Emeyi alɔ kama ni, Ɔkpane Unengudi Anania ku Yudaƒuɔ batɔnkune badi ku litemi ɔtɛne ɔni baalɔ banii Tertulo bésie Kaesarea. Bébo Ƒelike kudɔ banii bebedie Paulo bɔƒiɔ ƒui batina. 2Amu ka bákpali Paulo ni, Tertulo úse kalɔ uudie kenye ɔnini, “Bula Ɔbune, uwi pii na ɔdi mɛni ka bɔ́kɛ keyi buɛɛ na ƒula lɛnunda ku lɛlati lɛni na éti atɔnku-bu ɔsu. Na bɔ́nu ka kavumana pii lɛnɔ kébo bula kalɔ kemodi kammɔ ƒui kemo. 3Ɔmɛni ɔdi lɛla lɛni náƒɔ abu Yudaƒuɔ ƒui anu. 4Na muuvele-ɔ nnii se atu na enu etemila ani na ndubo bɔsu bɔsiku ɔnana ɔmɛni lɛlɔ. 5“Ɔsika bɔ́nu-nwu bɔ́ti ka lɛsɛ ɔkyane na ɔdi, na ɔkɛ ɔɔví uwi ndi uwi uunwíni Yudaƒuɔ kasusu na kesi kesii na kayawi kamɛni ƒui ɔnii bataabla basa basa na bata benye aban lɛlɔ. Na anwu ndi lɛkpa lɛni na baalɔ banii Nasareƒuɔ ɔtɔnkune. 6Na bɔ́nu lɛnɔ ka úsie ɔɔbla ala ani mɔɔyá na bula Yudaƒuɔ kakpakɔ keesé lɛlɔ asa na búƒie-nwu. Bɔ́yɔ ka nka bɔbla-nwu lɛla lɛni néduku nwuna bɔƒiɔ bɔmmɔ na bula ɔda bubo lɛlɔ. 7Nsu ni, bekpone ɔtɔnkune Lisia úbeƒie-nwu ɔ́ƒɔ-bu enu kemo ku ɔkplu. 8Na ɔ́su ɔnii ntu Romaƒuɔ ɔda bubo na badubuti batɛku-nwu litemi na ƒula anumi. Anwuɔsu akana na eye-nwu enu si etemila ani na bɔ́su mɛni adi ɔkɔ.” 9Amu na Yudaƒuɔ bammɔ ƒui bása kenye na linyeda lɛmmɔ lɛlɔ banii ala ani ƒui na Tertulo ɔ́su ƒui adi sɔsɔ. 10Nsu ka aban ɔgadine ɔmmɔ ɔ́kpali Paulo ɔnii ɔtɛmi ni, Paulo úse kalɔ ɔnini, “Ati, ngyi ka awɔ kani mɔɔtɛ Yudaƒuɔ etemila na akwa pii amɛni kemo. Na ɔmɛni ɔsu ɔɔda-mi kubiti ka lɛsu na lidie mina lɛlɔ kenye na ƒula anumi. 11Adubɔnu ati ka ɔbla aani emeyi leevu-anyɔ kani mɛni ka líbo Yerusalem nnii muubo mbakpa na Yudaƒuɔ kakpakɔ. 12Na ɔdi útanu-mi ka mɔɔkyaku ɔdi unyeƒi iye lɛsɛ na Yudaƒuɔ kakpakɔ mmɔ iye na Yudaƒuɔ kasalakɔ kadi lɛnɔ iye ɔgbami kesi kesii na ɔmankemo. 13Na bekyuli bamɛni ɔdi ulakana lɛla lɛdi ugyii bɔlɛ geen na bɔnu bɔti ka etemila ani na básu básiku-mi lɛlɔ mɛni ni, sɔsɔ na adi. 14Nsu ni, lɛlakpa linwi lɛni na lɛ́tunaku-ma ndi ɔnii nsiaku bɔƒɔtaadi ulu ɔni na baasu banii ɔdi lɛkpa lɛni náta linye-ma lɛlɔ. Na lɛ́ƒɔ Mose ɔda bubo ƒui lɛ́di kpakplaa ku ala ani na bénweni bákya kenye bediene lɛku kemo. 15Mbo lɛnunsia aani kalɛ na ama lɛnɔ bebo lɛnunsia ka bekyuli babuni ku bekpidi ƒui básɔ badubɔta bɔlɛ kekpine. 16Na ɔ́si ɔmɛni ɔsu ni, mɔɔkya ɔkplu ka lɛbla mina kasusu kemo nwaa na Katɔti ku bayawine ƒui anumi. 17“Akwa pii mɛni ni, liiibo Yerusalem. Na ɔƒɛni lísie nnii muuti bawabane etela lite mina badi na lɛbla akpala lɛnɔ lite Katɔti. 18Uwi ɔni na lɛ́bla lɛlɔ buveli ɔdi ɔmmɔ lɛ́wɔlɔ ni, Yudaƒuɔ badi bábanu-mi na kakpakɔ mmɔ. Na ɔɔɔdi ami ku otogyi ɔdi nkɛ. Na ńtakya unyeƒi ɔdi lɛnɔ. 19Na nka Yudaƒuɔ bani nási Asia kalɔ lɛlɔ ni, ama na nka ɔlɛka bebo ƒula anumi. Na si ami ku-ma bubo lɛla lɛdi ni, na basu. 20Iye bekyuli bani nlie mɛni ni, ɔlɛka basu lɛla likpidi lɛni na lɛ́bla uwi ɔni na Yudaƒuɔ litemi batɛne benengu bakya baatɛku-mi litemi. 21Munuu ɔdi uwi ɔni na lɛ́tala lɛdi katɔ lɛ́su nnii, 'Líbo kasalakɔ mɛni nnii mbedie lɛlɔ kenye lɛsu ka lɛ́ƒɔ lɛ́di ka bekpine basɔ badubɔta' ɔsu na bɛɛtɛku-mi litemi?” 22Amu na Ƒelike ɔni ngyi bɔƒɔtaadi ulu ɔmɛni etemila kaduɛ ni, ɔ́su Yudaƒuɔ bamɛni ɔnini, “Binye bɛgya utédu uwi ɔni na Lisia webo asa na likulo litemi lɛmɛni.” 23Na ɔ́ya bétiku Paulo bátákya ɔtɔ. Nsu ɔ́su nwuna lɛlɔ banune bammɔ ɔnii bada-nwu buɛɛ, na bete nwuna bakpana kuƒi si badi bebo-nwu kudɔ banii babanu-nwu iye beboku-nwu etela adi. 24Amu na emeyi klukui adi kama ni, Ƒelike ku ulekudi Drusila ɔni ndi Yudani bébo na ɔ́ya-nwu bétédie Paulo béboku, na ɔ́su-ma litemi ɔ́siku Yesu Kristo bɔƒɔtaadi lɛlɔ. 25Amu na uwi ɔni na ulie uudie ala kalɔ taasiku bɔƒɔtaadi ngba buni bulie ku lɛlɔ bɔti bɔda ku litemi bɔtɛ bɔni ndubo diɛdi lɛlɔ ni, liƒu geen lɛ́da Ƒelike. Na mɛni na Ƒelike ɔ́su-nwu ɔnini, “Ta, na eteesie. Na si lɛkɛ kɔnu kaduɛ ni, ndubɔya na balɔ-ɔ bete-mi.” 26Na ka ɔ́kali ɔnii Paulo wasu ɔnii ɔɔwia lɛla lɛdi ususu-nwu kenye ɔsu ni, ɔɔtala na baalɔ-nwu uwi ndi uwi na anwu ku-nwu baatɛmiku lɛlɔ. 27Amu na akwa anyɔ kama ni, bédie Ƒelike na béti Porkio Ƒesto bébesie-nwu keliekɔ. Nsu ka Ƒelike ɔɔwia ka Yudaƒuɔ bataayɔ-nwu litemi ɔsu ni, ɔ́ya na Paulo ɔ́sɔ ɔ́kya ɔtɔ katɛnkɔ mmɔ.

will be added

X\