BATALANE KABLA 23

1Amu ka Paulo ɔ́tɛ anu na ɔ́nu Yudaƒuɔ litemi batɛne bani nása bélie litemi katɛkɔ mmɔ kpoo ni, ɔ́su-ma ɔnini, “Banwa, mina kayi kaladu-mi kɔtɔ kɔdi na Katɔti anumi úbedu ɔmwi kadi kamɛni lɛlɔ.” 2Amu ka Anania ɔni ndi Yudaƒuɔ ɔkpane unengudi na bana akɔ mmɔ únu Paulo kenye kamɛni ni, údie lɛdi úte bani nnye Paulo kudɔ mmɔ na báƒiɛmi-nwu ɔtugya. 3Mmɔ mmɔ ni, Paulo ɔ́su-nwu ɔnini, “Katɔti ɔdubɔƒiɛmi-ɔ ɔsia! Atɔnku akwadi na adi! Bi litemi ɔtɛne udu na adi mɛni? Ɔda bubo bɔni lɛlɔ na akɛ átɛku-mi litemi ni, amu kani lɛlɔ na áta enye uwi ɔni na áya na báƒiɛmi-mi kɔnu!” 4Amu na ama bani nnye Paulo kudɔ mmɔ béye-nwu banini, “Ɔkpane unengudi na eedumi lɛni?” 5Anwuɔsu Paulo údie kenye ɔnini, “Banwa, ńtati nnii anwu ndi ɔkpane unengudi, nka ńtasu-nwu lɛni. Ɔsika Bunweni Kedee Ɔku ɔ́su ɔnii, 'Bitetemi lɛla likpidi lɛdi na bina batɔnkune lɛlɔ.' ” 6Amu na Paulo ɔ́nu ɔ́ti ka ni, bekyuli bani nábasa mmɔ akɔ badi badi lɛkpa lɛni baalɔ Sadukiƒuɔ, na badi lɛnɔ badi Ƒarisiƒuɔ. Anwuɔsu ɔ́va momoomo ɔnini, “Banwa, Ƒarisini na ndi! Na Ƒarisini náwɔ-mi! Na baatɛku-mi litemi mɛni ɔmwi ɔni na lɛ́ƒɔ bekpine bɔsɔtaata lɛ́di ɔsu!” 7Amu ka Paulo ɔ́nya ɔ́su litemi lɛmɛni ni, mmɔ kani na kadɔ kéduo akpa anyɔ amɛni ntɛ, na béle lɛlɔ kemo. 8Ɔsika ama Sadukiƒuɔ baasu banii ukpine ɔsɔ ulata, na Katɔti batu beeebo, na ayu lɛnɔ eeebo. Nsu Ƒarisiƒuɔ ni, ama baaƒɔ́ ala amɛni ƒui taadi. 9Mɛni na owogyo ɔdi úbeduo-ma akɔ. Na ɔda bubo ala batinane bani ndi Ƒarisiƒuɔ bénye Paulo litemi lɛmmɔ kama banii lɛdi litemi geen. Na báva momoomo básu banini, “Bútanu lɛla likpidi lɛdi na nwuna lɛlɔ! Na si kɔyu kɔdi iye Katɔti ɔtu ɔdi nétemiku-nwu ni, bitaya na bukpoku Katɔti!” 10Mɛni ni, bɔva bɔmɛni bɔ́sɔ bɔ́kɔ katɔ búbu. Na bekyuli bamɛni ƒui bada Paulo na baaní-nwu teenene. Na ka bekpone ɔtɔnkune ɔmmɔ ɔɔyia ka badubɔni-nwu baduli ɔsu ni, ɔ́su nwuna bekpone ɔnii beti-nwu beboku aban ɔtɔ kemo. 11Amu na limeyi lɛmmɔ usientɛ ni, Blɔti úbenye Paulo kudɔ na ɔ́su-nwu ɔnini, “Paulo, kya ɔkplu. Kalɛ na ásu mina lɛlɔ litemi mɛni na Yerusalem ni, lɛni kani na adubɔsu-ni na Roma lɛnɔ.” 12Amu ka kadi kégye ni, Yudaƒuɔ badi bése kenye béte lɛlɔ ka ama baladi na baláni si bátadu Paulo! 13Na bekyuli bamɛni badubɔbla aani nkyuli aavlene ku kama. 14Amu na básɔ bésie bakpane benengu ku bana batɔnkune kudɔ na bátásu-ma banini, “Búse kenye ka buladi na buláni si bútadu Paulo. 15Anwuɔsu amii ku litemi batɛne bɛsu bekpone ɔtɔnkune na ɔsɔ utédie Paulo uboku kasalakɔ mɛni. Bɛbla aani si bɛɛwia ka biye-nwu etemila adi bibu. Na si béti-nwu baduboku ni, na bɔdubɔdu-nwu na ulu.” 16Nsu ka Paulo ɔnwani ulekubi ubidi ɔnanabi únu ala ani na básu mɛni ƒui ɔsu ni, úkeli úsie aban ɔtɔ mmɔ na útásu Paulo lɛla lɛni na básu. 17Amu na Paulo ɔ́lɔ bekpone bani nnye mmɔ kemo unwi na ɔ́su-nwu ɔnini, “Tiku ɔnamu ɔmɛni teesienku bina ɔtɔnkune kudɔ. Ɔ́da litemi kpakplaa lɛdi na ɔsu-nwu.” 18Anwuɔsu ni, ukpone ɔmmɔ útiku ubi ɔmɛni úsienku ɔtɔnkune ɔmmɔ kudɔ. Na ɔ́su-nwu ɔnini, “Paulo ɔni na bákya ɔtɔ mɛni nálɔ-mi na ɔ́su-mi ɔnii ntiku ubi ɔmɛni mboku-ɔ kudɔ na ubasu-ɔ litemi lɛdi.” 19Amu na bekpone ɔtɔnkune ɔmɛni ɔda ubi ɔmɛni kɔnu na útiku-nwu úsienku kɔƒɛlɛ na úye-nwu ɔnini, “Bi na aawia ka asu-mi?” 20Amu na ɔ́su-nwu ɔnini, “Yudaƒuɔ badi bása kenye ku bana benengu banii bebevele-ɔ na biti Paulo biboku kasalakɔ mmɔ kɔnaadi ku kasusu ka beye-nwu etemila adi. 21Nsu tenu-ma litemi, ɔsika ama badi bani ntulo nkyuli aavlene badubɔbɛ na ulu ɔmmɔ lɛlɔ bagya-nwu. Bekyuli bamɛni bése kenye ka badu Paulo asa badi iye bani. Anwuɔsu na baawia ƒula kebunku. Na béesie bebi ulu kudɔ mmɔ, ɔsika basia anu ka adubɔtuna ete-ma lɛni ɔsu.” 22Bekpone Ɔtɔnkune ɔmɛni ɔ́bala-nwu ɔnini, “Taya na ukyuli ɔdi biala ɔsɔ unu litemi lɛni na ásu-mi mɛni munu munu!” 23Na uwi ɔni na ɔnamu ɔmɛni ɔ́tɔlɔ ni, bekpone ɔtɔnkune ɔmɛni ɔ́lɔ nwuna bekpone bamɛni kemo benengu inyɔ na ɔ́su-ma ɔnini, “Bɛwia bekpone nkyuli eti ene bani mesie Kaesarea ɔmwi usien ɔdɔ yaalenwi kemo. Bɛwia atula badane lɛnɔ nkyuli eti ene ku bapɔnkɔ kama beliene nkyuli liti ku aavlanyɔ. 24Bite Paulo ɔpɔnkɔ ɔdi na ulie-nwu kama na bitiku-nwu buɛɛ bisienku Aban Ɔgadine Ƒelike.” 25Amu na únweni ɔku ɔdi úte kalɔ lɛlɔ ɔdine ɔmmɔ ɔnini, 26Ɔku ɔmɛni ɔ́si ami Klaudio Lisia kudɔ na liti muute awɔ Ɔgadine Ɔbune Ƒelike ku kegye. 27Yudaƒuɔ béƒie ukyuli ɔmɛni na nka bɔdu banii baadú-nwu asa na ami lɛ́ya bekpone bátáƒɔ-nwu, ɔsika línu ka Romani ubi na ɔdi ɔsu. 28Amu na líti-nwu lísienku bana kasalakɔ kalɛ na bunu lɛla lɛni na ɔ́bla. 29Lɛ́nu lɛ́ti ka ala ani badaku mɛni adi ama Yudaƒuɔ ɔda bubo ala ɔni na ɔɔɔdi bɔƒiɔ bɔni na bakya-nwu ɔtɔ iye badu-nwu. 30Na uwi ɔni na básu-mi ka baabla-nwu lɛlɔ kasusu ka badubo-nwu bɔdu ni, lɛ́bu lili kemo nnii muuti-nwu liboku-ɔ na lɛsu ama bani na anwu ku-ma bákɛ litemi ka beti nwuna bɔƒiɔ beboku-ɔ anumi. 31Anwuɔsu usien ɔmmɔ kani ni, bekpone bamɛni bétiku Paulo bésienku Antipatri. 32Amu ka kadi kégye ni, bekpone bani nkɛ lɛgba básɔ bénwini bésie aban ɔtɔ mmɔ, na báya na bapɔnkɔ beliene bákpanku Paulo bésienku Kaesarea. 33Ka bétéduo ni, béti Paulo ku ɔku ɔni na béte-ma mmɔ ƒui béte aban ɔgadine ɔmmɔ. 34Amu uwi ɔni na ɔɔká ɔku ɔmɛni ni, úye Paulo kesii kani na ɔ́si. Ka ɔ́nu ɔ́ti ka Paulo ɔ́si Kilikia ɔ́su ni, 35ɔ́sɔ ɔ́su-nwu ɔnini, “Ndubuduo ƒula litemi lɛmɛni kemo na linu-ni kaduɛ si uwi ɔni na awɔ ku bekyuli bani ndaku lɛsɛ mmɔ bébo.” Amu na ɔ́sɔ údie lɛdi ɔ́su nwuna bekpone bani nnye ɔnii beti Paulo batákya ɔtɔ ɔni na Ɔga Herode ɔ́tu kemo na bataagyumana-nwu.

will be added

X\