BATALANE KABLA 22

1“Ati bene ku banwa, agoo! Bɛya na lidie lɛlɔ kenye na binu.” 2Amu na uwi ɔni na bénu ka Yudaƒuɔ lɛdi kemo na uutemi ni, básɔ bába lɛsɛ bébu. 3Na Paulo ɔ́su-ma ɔnini, “Yudani na ndi, na báwɔ-mi na Tarso na Kilikia kalɔ lɛlɔ. Nsu ni, Yerusalem mɛni na lísie sukuu. Gamaliel kalɔ na lɛ́kya lɛ́tɛya ala. Bátina-mi bula bati ɔda bubo ala ku bana ɔdi ƒui kaduɛ geen. Na líti mina kayi ƒui líte Katɔti aani kalɛ kani na amii lɛnɔ bɛɛbla. 4Na ɔ́si uwi ɔmmɔ ni, líse kalɔ muukpóku bekyuli bani nsiaku Kristo baƒɔtaadine ulu lɛlɔ, na mɔɔyá na baadú-ma. Na líƒie banana ku beleku lɛ́kya aban ɔtɔ kemo. 5Ɔkpane unengudi ku kasalakɔ unengu biala ɔdubudie lɛla lɛni mɔɔsu mɛni kenye, ɔsika béteenweni lɛku teete-mi banii ntátaabla ala amɛni. Na uwi ɔni na lísela Damasko ni, béte-mi ɔyikun ka si lɛ́nu baƒɔtaadine bani nkya mmɔ ni, na liƒie-ma, na linyimi-ma liboku Yerusalem na bani-ma kɔtu. 6“Uwi ɔni na nkɛ lísela na úbu blii na liduo Damasko ni, ɔbla aani ɔƒiiwi lɛdɔ leevu-inyɔ kemo ni, kɔnakunwi bukeye bɔni mbo ɔkplu bɔdi bɔ́si katɔ búbewi-mi! 7Amu na líbuli lɛ́tɛ kalɔ na línu ka lɛdi lɛdi lɛɛsu-mi lɛnini, 'Saulo, Saulo, bi ɔsu na eekpóku-mi lɛni?' 8“Amu na líye nnini, 'Ati, ɔma na adi?' “Na ɔ́sɔ ɔ́su-mi ɔnini, 'Ami ndi Yesu Nasareni ɔni na eekpóku kpakplaa.' 9Na bekyuli bani na ami ku-ma bɔkɛ ni, bánu bukeye bɔmɛni, nsu bétenu ukyuli ɔni na ami ku-nwu bɔɔtɛmi mmɔ lɛdi. 10“Na líye-nwu nnini, 'Blɔti, bi na ɔlɛka lɛbla?' “Na ɔ́sɔ ɔ́su-mi ɔnini, 'Ta, na eteesie Damasko. Mmɔ na ndubɔtina-a lɛla lɛni na lɛ́ƒuna líte-ɔ ka abla.' 11Bukeye bubendi bɔmɛni bɔ́bwɛ-mi anumi ɔni na bekyuli bani na ami ku-ma bɔ́kɛ mɛni náda-mi kɔnu asa na bɔ́tɔlɔ bútéduo Damasko. 12“Na mmɔ ni, ɔnana ɔdi ɔkya ɔni baalɔ Anania. Ɔdi ukyuli ɔni mɔɔkya lili kalɔ teete Katɔti geen, na ɔsiaku bula ɔda bubo bɔmmɔ lɛlɔ lɛnɔ. Na Yudaƒuɔ bani nkya mmɔ ƒui baabu-nwu kaduɛ. 13Ukyuli ɔmɛni úbo úbenye-mi kudɔ na ɔ́su-mi ɔnini, 'Ɔnwa Saulo, bimi anumi!' Na uwi ɔmmɔ kemo kani ni, mina anumi ábla nwaa na lɛ́nu-nwu! 14Amu na ɔ́su-mi ɔnini, 'Bula bati kuuku Katɔti náƒuna-a kalɛ na anu nwuna lɛyɔla ati, na anu nwuna Ukyuli Ɔƒunadi Kedee ɔmmɔ lɛnɔ ati, na eteenu-nwu lɛdi. 15Ɔlɛka eti linyesia lɛmɛni esienku kesi kesii na asu bekyuli ƒui lɛla lɛni na ánu ku ani na énu ƒui. 16Na ɔƒaani ni, lɛla lɛdi lɛ́sɔ lítebu. Ta, na aƒɔ ntu bɔkpila ɔdi. Na akpali Blɔti lɛnyi, na ɔdubɔƒɔ ƒula ekpidi udie-ɔ lɛlɔ.' 17“Ɔmɛni kama ni, línwini lísie Yerusalem. Na ka nkya kakpakɔ mɔɔkpali katɔ ni, ɔ́bla-mi aani si bɔlɛɛ na nda, na lɛ́nu budie taatina bɔdi. 18Mmɔ na Blɔti ɔlati ɔ́su-mi ɔnini, 'Babla na avi alɛ Yerusalem, ɔsika mɛni bekyuli belénu-ɔ litemi lɛni na aasu taasiku-mi lɛlɔ.' 19“Nsu lídie kenye nnini, 'Blɔti, bana ƒui bagyi ka ami ńteeƒie ama bani náƒɔ-ɔ badi na ńteebo-ma. 20Na uwi ɔni na badubɔdu Steƒano ni, ami lɛnɔ lɛ́tuna, na bédie bana lɛwu béte-mi, na nda-nya asa na beebo-nwu atabi.' 21“Nsu Blɔti ɔ́su-mi ɔnini, 'Ta, na eteesie ɔgyu kakaaka na kesii kani mɔɔtala-a na bekyuli bani naaadi Yudaƒuɔ akɔ!' ” 22Amu na uwi ɔmɛni ƒui ni, bekyuli bamɛni benye kpoo beenú-nwu litemi. Nsu uwi ɔni na ɔ́su lɛla likplodi lɛmɛni ni, bana ƒui báva momoomo básu banini, “Aa! Bɛyila-nwu udu! Bɛtɔlɔku-nwu ƒui!” 23Amu na báva momoomo na bése kalɔ baakuna bana lɛwu, na beebo ɔtumu lɛnɔ taakɔliku katɔ na kɔnyi ɔsu. 24Na bekpone ɔtɔnkune ɔmmɔ ɔ́ya na béti-nwu béduoku ɔtɔ kemo ɔnii betébo-nwu na ɔwia ɔti lɛla lɛni ɔsu na Yudaƒuɔ bamɛni baakywɛ-nwu anumi lɛni. 25Amu na uwi ɔni na benye beenyimi-nwu ni, Paulo úye Romaƒuɔ bekpone unengu ɔdi ɔnini, “Ulu ɔtɛ ka bebo Romani ubi ɔni na batatɛku-nwu tɔ litemi?” 26Amu na unengu ɔmɛni úsie bana ɔtɔnkune kudɔ na útéye-nwu ɔnini, “Bi ɔdi na bɛɛbla mɛni? Ɔnana ɔmɛni ni, Romani na ɔdi!” 27Anwuɔsu bekpone ɔtɔnkune ɔmɛni úsie Paulo kudɔ na útéye-nwu ɔnini, “Anii bi? Romani na adi?” Amu na Paulo údie kenye ɔnini, “Romani geen na ndi!” 28Amu na ɔtɔnkune ɔmɛni ɔ́su-nwu ɔnini, “Ami lɛnɔ Romani na ndi. Na ami líbo kayu pim asa na línwini Romani!” Amu na Paulo ɔ́sɔ údie kenye ɔnini, “Ami ni, mina bawɔne ƒui badi Romaƒuɔ.” 29Mmɔ mmɔ ka bekyuli bani na nka benye kagyumana ka bebo-nwu mɛni bénu ka Romani na ɔdi ni, bana ƒui békeyi lɛlɔ na bákpɛ bésie kama. Amu ka bana ɔtɔnkune ɔ́ti ka Romani na ɔdi ni, ɔtɔtɔ ɔ́gyu-nwu na liƒu lɛ́da-nwu geen, ɔsika anwu néte kuƒi na bébo-nwu kɔgba. 30Amu ka kadi kégye na bekpone ɔtɔnkune ɔmɛni ɔɔwia ɔti lɛla lɛni nébo asa na baadá Paulo kenye ni, ɔ́lɔ Yudaƒuɔ bakpane benengu ku bana litemi batɛne ƒui na bábasala lisu. Na ɔ́ya na báƒɛnimi Paulo na bétiku-nwu béboku-ma anumi banii beeduo nwuna litemi kemo.

will be added

X\