BATALANE KABLA 2

1Amu ka limeyi lɛni baalɔ Pentekoste limeyi lídu ni, baƒɔtaadine bammɔ ƒui bátása na likpo linwi pɛ. 2Kɔnakunwi ni, bénu kɔku kɔdi aani ɔƒɛƒɛɛ ubendi ɔdi muukpó. Na kɔku kɔmɛni kúbeyi ɔtɔ ɔni kemo na bákya mmɔ. 3Na lɛla lɛdi lígyingya aani agyakpabi kalɛ, na líbelie-ma lɛlɔ. 4Na Katɔti Kɔyu kɔ́ƒɔ-ma lɛlɔ kemo ƒui, na bése kalɔ baasu bumwi etemila na adi lidu kemo aani kalɛ na kúte-ma kalɛ. 5Amu na uwi ɔmɛni kemo kani ni, Yudaƒuɔ bani nási kayawi ekpo ƒui ni, bébo bakya Yerusalem. 6Amu ka bénu kɔku bonwu kɔmɛni ni, bekyuli pii békeli bésie mmɔ. Na ka bénu ka baƒɔtaadine bamɛni benye beetemi kadi biala ɔma lɛdi ɔsu ni, ɔ́bla-ma dɛye dɛye! 7Ɔmɛni ɔsu ni, ɔtɔtɔ ɔ́gyu-ma, na béƒu na bése kalɔ beeye lɛlɔ banini, “Bekyuli bamɛni ƒui ni, ɔɔɔdi Galileaƒuɔ badi yoo? 8Na dɛ na ɔ́bla na buunú bana butemi na bula kɔlɔ adi kemo? 9- 10Abu bɔdi Partiƒuɔ ku Mediaƒuɔ ku Elamƒuɔ ku bani nási Mesopotamia ku Yudea ku Kapadokia ku Ponto ku Asia ku Ƒrigia ku Pamƒilia ku Egyipte ku Libia ɔvi ɔni nkya Kirene ku baƒɔ bani nási Roma na badi Yudaƒuɔ ku bekyuli bani néduo Yudaƒuɔ lɛkpa kemo 11ku Kretaƒuɔ ku Arabiƒuɔ. Na bula ƒui buunú ka beebó Blɔti ablala ebendi kudu na bula adi kemo.” 12Amu ka béƒu benye mmɔ ni, bakya beeye lɛlɔ banini, “Bi litemi, lɛdi mɛni?” 13Amu na ama bani nnye mmɔ badi básu banini, “Ntɛ mɔɔda-ma, ɔɔɔdi lɛla lɛdi biala lɛdi.” 14Mmɔ na Petro ɔ́ta únye na bana leevu-unwi bammɔ akɔ na ɔ́talaku lɛdi katɔ ɔnini, “Amii Yudaƒuɔ ku amii bani nli Yerusalem ƒui, mɔɔyɔ́ ka lidie ala amɛni ƒui kalɔ, anwuɔsu binu kaduɛ. 15Ɔɔɔdi ntɛ mɔɔda bekyuli bamɛni. Amii ɔlati bɛɛnu ka ɔtanta lɛdɔ yaalenwi kemo kani bɔkya mɛni. 16Mmomu lɛla lɛni na bɛɛnu mɛni ni, ani ndi lɛla lɛni na Katɔti Kenye Udiene Yoel ɔ́su úse kukuuku. 17Ɔ́su ɔnini, 'Unwoti ɔ́su ɔnii, “ ' “Na emeyi ekplodi kemo ni, Ndubɔtala mina Kɔyu na kɔƒɔ mina bekyuli ƒui lɛlɔ kemo. Na bina bebi badubudie-mi kenye, na bina bakloƒu badubɔnu katɔ abɛla, na bina benengu lɛnɔ badubo ana buteegye. 18Sɔsɔ ni, mina Kɔyu kɔdubɔƒɔ bina kɔduli beleku ku banana ƒui lɛlɔ kemo. Na emeyi ammɔ kemo ni, badubudie-mi kenye. 19Na ndubɔya akɔla budie taatina ataalɛ na kayaa ku kalɔ lɛlɔ ƒui. Bɛdubɔnu ubugya ku ogya ku uyɔ pii. 20Ɔƒɛ ɔdubɔbla suu, na kɔbuli anumi adubugyie aani ubugya, asa na Katɔ Ɔyikune limeyi bonwu lɛmmɔ lɛdubo. 21Uwi ɔmmɔ kemo ni, ukyuli biala ɔni makpali Blɔti na wevele-nwu kɔnyana bɔnu ni, ɔdubɔkɛ ngba.” ' ” 22“Ati bene biinú? Yesu Nasareni ɔdi Ukyuli Ɔƒunadi ɔni lɛlɔ na Katɔti ɔkɛ údie nwuna ɔyikun ku akɔla bɔbla keyi ɔ́tina-mii aani kalɛ na amii alati lɛnɔ bɛgyi. 23Nsu na Ɔti bɔyɔ ku kakali kemo ni, ɔ́nyonu-nwu úte-mii na bɛ́kɛ ekpidi bablane lɛlɔ na bɛ́du-nwu uwi ɔni na bɛ́kana-nwu bɛ́mana ugyii lɛlɔ. 24Nsu Katɔti ɔ́sɔ ɔ́gyila-nwu ɔ́lɛku bekpine akɔ na ɔ́lɛ kukpi enu kemo, ɔsika kukpi kulakana-nwu lɛkpu bubo buse. 25Na Ɔga Dawid ɔ́su úse ɔ́siku-nwu lɛlɔ ɔnini, 'Lɛ́nu ka Unwoti unye-mi anumi uwi ƒui. Na ka unye-mi kɔdianu aani mina lɛkpa kalɛ ɔsu ni, lɛɛɛdubo bɔgbanta. 26Ɔmɛni ɔsu ni, mina kayi kemo kéyi ku lɛlɔyɔ, na ndubuti kenye nteemwi-nwu uwi ƒui! Ina ka ɔlɔna ndi muedi ni, ndubulie na lɛnunsia kemo. 27Na alanyonu mina kɔyu alakya kekpine. Na lɛnɔ ni, alaya ƒula Ubi Kedee ɔlɔna webu. 28Átina-mi ƒula ngba lilu, na ƒula kudɔ bɔkya bɔya na mɔɔkɛ́ ebiti geen.' 29“Anwuɔsu ni, banwa, mɔɔsu-mii nwaa ka ni, bula Nana Dawid úkpi, na báva-nwu, na nwuna kaƒiɔtɔ kamua kakya bula akɔ mɛni ɔmwi ɔmwi. 30Nsu ɔdi Katɔti kenye udiene. Na Unwoti ɔ́lɛ ugyii úse ka wabla Dawid kaba kemo ubi na wadi lɛga aani Dawid ɔmmɔ kalɛ kani. 31Ka Dawid ɔgyi ɔmɛni ɔsu ni, ɔ́su úse ka ni, Kristo ɔdubɔta ɔlɛ bekpine akɔ. Ɔ́su ɔnii balada-nwu balakya kekpine, na nwuna ɔlɔna lɛnɔ ulebu na kaƒiɔtɔ kemo. 32Yesu ɔmɛni na Katɔti ɔ́gyila ɔ́lɛku bekpine akɔ, na litemi geen lɛmɛni lɛlɔ ɔsu na bɔdi kenye bediene. 33Na ɔƒaani ni, Katɔti úte-nwu kenyekɔ kenengudi na nwuna kɔdianu, na úti nwuna Kɔyu úte-nwu aani kalɛ na ɔ́su úse. Lɛni na anwu lɛnɔ ɔ́tala-ku ɔ́kya-bu. Anwuɔsu na bɛɛnu na biinú lɛla lɛni mɔɔlɛ́ mɛni. 34- 35Ɔɔɔdi Dawid náta úsie katɔ mmɔ. Mmomu ni, ɔ́su ɔnini, 'Unwoti ɔ́su mina Unwoti ɔnii, “Sɔ lie-mi kɔdianu kakɛ wetédu uwi ɔni na meti ƒula bekisine makya-a lɛgba kalɔ.” ' 36Anwuɔsu mɔɔyá na amii Israelƒuɔ bɛti ka ni, Katɔti nábla Yesu ɔni na amii bɛ́du mɛni ɔnii unwini Blɔti ku Ukyuli Ɔƒunadi.” 37Amu ka bekyuli bamɛni bénu Petro etemila amɛni ni, ékpoku-ma na kayi kemo. Anwuɔsu béye-nwu ku batalane bakladi banii, “Banwa, bi na ɔlɛka bɔbla?” 38Amu na Petro ɔ́su-ma ɔnini, “Ɔlɛka bina akɔ ɔdi biala ɔda ekpidi bɔbla ɔya na unwini ubo Blɔti kudɔ, na ɔƒɔ ntu bɔkpila ɔdi na Yesu Kristo lɛnyi kemo kalɛ na Katɔti uti nwuna ekpidi ɔkyiɛ-nwu, na ukyuli ɔmmɔ wakɛ Katɔti Kɔyu aani kalɛ na Blɔti ɔ́su úse. 39Ɔsika linyese lɛmɛni lise lite amii ku bina bebi ku bani nási ɔgyu ku bekyuli bani ƒui na Katɔti walɔ weboku nwuna kudɔ.” 40Amu na Petro ɔ́tɛmiku-ma laa na ɔ́lɛ-ma ɔ́su ɔnini, “Bɛda lɛlɔ bidie kɔtu bɔni bɔmɛni kemo, bɔni mebo bekyuli bekpidi bamɛni ɔnwa lɛlɔ.” 41Ɔmɛni ɔsu ni, bana akɔ pii báƒɔ Petro litemi bádi, na bákpila-ma ntu na Yesu lɛnyi kemo, na bana bumomo bɔbla aani nkyuli mpimu ɛtɛ. Na ama lɛnɔ béti lɛlɔ bebunku baƒɔtaadine bammɔ limeyi lɛmmɔ. 42Amu na béti bana uwi ƒui béte batalane bammɔ, na baatina-ma ala, na baakpali katɔ, na baadi taasala lɛnɔ. 43Amu na ka batalane bammɔ bábla akɔla budie taatina pii ɔsu ni, ɔ́bla bekyuli bammɔ ƒui yaa na béti ɔbu béte Unwoti. 44Na baƒɔtaadine bamɛni bátaasa uwi ndi uwi na beele bana lɛlɔ ala. 45Na si béti bana lɛlɔ ala adi béye ni, beeti egulabi ammɔ teele kalɛ na ɔdi biala ɔɔwia. 46Na béteesie Katɔti kakpakɔ limeyi ndi limeyi, na bátaasa esu esu lɛnɔ taadi na bana kɔduli na kubiti ku lɛlɔyɔ kemo. 47Na baagyá Blɔti enu na beemwi-nwu lɛnɔ. Na bekyuli ƒui baabu-ma. Na limeyi biala ni, Unwoti uuti bekyuli babambadi bani na ɔɔƒɔ́ teebunku-ma lɛlɔ.

will be added

X\