BATALANE KABLA 19

1Amu uwi ɔni na Apolo ɔkya Korinto ni, Paulo lɛnɔ útávi lɛgba ulu ɔtɔdi, na útédu Eƒeso. Mmɔ na útánu baƒɔtaadine badi. 2Amu na úye-ma ɔnini, “Ɔ́si uwi ɔni na bɛ́ƒɔ bɛ́di ni, bɛ́ɛƒɔ Katɔti Kɔyu?” Amu bédie kenye banini, “Oowo! Bi ndi Katɔti Kɔyu? Bútenu-ku tɔ lɛla lɛdi.” 3Amu na ɔ́sɔ úye-ma ɔnini, “Na bina ntu bɔkpila kalɔ ndi dɛ?” Na básu-nwu banini, “Amu ndi Yohane ntu bɔkpila lɛsa lɛni na ɔ́kɔ.” 4Amu na Paulo údie kalɔ ɔ́tina-ma ɔnini, “Yohane ɔ́kpila bekyuli bani nénwini kama bákya bana ekpidi ntu. Na ɔ́su-ma ɔnii baƒɔ ukyuli ɔni ndubɔsia anwu Yohane kama badi. Na ukyuli ɔmmɔ ndi Yesu Kristo.” 5Amu ka bánya bénu litemi lɛmɛni ni, báya na ɔ́kpila-ma ntu na Blɔti Yesu lɛnyi kemo. 6Na uwi ɔni na Paulo úti enu ɔ́sia-ma lɛlɔ ni, Katɔti Kɔyu kɔ́ƒɔ-ma lɛlɔ kemo ƒui, na bésie kalɔ ku adi lidu lidu butemi na bédie Blɔti ala kenye. 7Amu na bana bumomo bɔ́bla aani banana leevu-inyɔ. 8Amu na Paulo úteesie Yudaƒuɔ kasalakɔ taatátɛmi ku ogya abuli atɛ, na uudie ala kalɔ taatina-ma. Na uunwíni bana kasusu teesienku Blɔti lɛga kadikɔ ala lɛlɔ. 9Nsu badi ama bétenu nwuna litemi buni lɛmɛni, na báta bénye Blɔti lilu ku ala bɔtina lɛlɔ na kadi ƒui anumi. Anwuɔsu Paulo ɔ́tɔlɔ-ma kudɔ. Na útiku bani náƒɔ bádi úsienku Tirano lɛgbanya kemo. Na mmɔ na útaatɛmiku-ma limeyi ndi limeyi. 10Amu na akwa anyɔ kemo ni, lɛni na ɔ́tina-ma ala. Na litemi buni lɛmɛni lígyingya lɛ́kya Asia kalɛkɛ lɛlɔ mmɔ ƒui. Na ama bani ndi Yudaƒuɔ ku Helaƒuɔ lɛnɔ bénu-ni. 11Amu na Blɔti úte Paulo ɔyikun ɔni na úti ɔ́bla akɔla budie taatina. 12Na si béti nwuna adala adi bétuku ɔlɛne ɔdi muedi ni, aabwi-nwu, na asɔ aagyá ayu ekpidi lɛnɔ taalɛku bekyuli bani kemo na eli. 13Amu na Yudaƒuɔ bevone badi bani nkɛ mɔɔví ekpo ekpo ni, básusu banii beeti Yesu lɛnyi bataabɔku ayu ekpidi. Na baasu banii, “Bɔɔbɔku-ɔ na Yesu ɔni lɛlɔ na Paulo ɔkɛ uutemi taasiku bɔnii vi lɛ ukyuli ɔmɛni kemo!” 14Amu na bekyuli bani nátaabla udu ɔmɛni ndi bakloƒu maatɛ bani ndi Yudani ɔkpane unengu ɔdi ɔni baalɔ Skeva bebi. 15Nsu ka bátásu kɔyu kukpidi kɔdi lɛni ni, kɔ́su-ma kɔnini, “Ami ngyi Yesu, na ngyi Paulo lɛnɔ. Nsu amii ni, lɛɛɛgyi-mii! Ɔma bene bɛdi?” 16Amu na ukyuli ɔni lɛlɔ na kɔyu kukpidi kɔmɛni kulie ni, úbo-ma! Na báƒɔ lɛlɛ geen, na békeli bálɛ kaduli kammɔ ku kasɔngya! 17Lɛla lɛni nálɛ mɛni lígyingya na líyi Eƒeso ƒui ɔni na Yudaƒuɔ ku ɔma ɔmmɔ bekyuli ƒui bénu. Ɔmɛni ɔsu ni, liƒu lɛ́da-ma geen, na Blɔti Yesu lɛnyi lɛ́sɔ lɛ́ƒɔ kuye líbu. 18Amu na bani nénwini kayi ni, bébo bébedie bana lɛlɔ kalɔ na bekyuli anumi. 19Amu na bana akɔ bani náƒɛ evo béti bana evo lɛku ku lɛsɛbɛ béboku na bákyula-nya na bekyuli anumi. Lɛku lɛmmɔ ƒui kuye kɔdubɔbla aani sika ɔƒualadi mpimu liti. 20Ɔmɛni ɔɔtina kalɛ na Blɔti litemi lígyingya ku ɔyikun, na lɛ́ƒɔ mmɔ ƒui. 21Ɔmɛni kama ni, Katɔti Kɔyu kúdie kɔ́tina Paulo ɔnii ɔvi usie Makedonia ku Akaia asa na usie Yerusalem. Na Paulo ɔ́su ɔnini, “Si líduo mmɔ ni, ɔlɛka lɛvi lisie Roma lɛnɔ.” 22Amu na ɔ́tala nwuna bebunkune inyɔ, Timoteo ku Erasto, na bágyu batɔ-nwu na Makedonia. Na anwu ɔ́sɔ ɔ́kya kama na Asia mmɔ uwi blii ɔdi. 23Amu na uwi ɔmmɔ kemo ni, lɛƒɛda bonwu lɛdi líbebo na Eƒeso na Kristo bɔƒɔtaadi ulu ɔmmɔ kama bɔsiaku ɔsu. 24Ɔmɛni úse kalɔ ɔ́si ukyuli ɔni baalɔ Demetrio ɔni muuti sika ɔƒualadi taakywɛ kakpakɔ ala. Na anwu ku nwuna bebunkune beeyé-nya teete bekyuli bani muubo taabakpa bana baƒiɔ bani baalɔ Artemi. Na ala amɛni buye eete-ma kɔsia geen. 25Limeyi lɛdi ni, Demetrio ɔ́lɔ bakywɛne bamɛni ƒui ɔ́sala na ɔ́su-ma ɔnini, “Banwa, bɛgyi ka bɔɔkɛ́ kɔsia geen na bula kabla kamɛni ɔsu. 26Na biinú na bɛɛnu kede kede kalɛ na Paulo ɔkya uuwi bula kabla kamɛni anumi kalɔ, na uunwíni bekyuli pii kasusu ɔnii baƒiɔ ala ani na bɔɔbla ƒui aaadi ala ani na bakya lili kalɔ bete! Ɔmɛni ɔsu na bula liyedi líbo kalɔ! Na ɔɔɔdi Eƒeso mɛni lɛti na ɔmɛni ɔdaku bɔlɛ. Mmomu ɔkya na Asia kalɔ kamɛni lɛlɔ ƒui! 27Nsu ɔɔɔdi bula kabla lɛti ndubɔyii udu! Geen geen ni, bula uni baƒiɔ benengudi Artemi lɛnyi ku nwuna ɔbu ɔdubɔyii na Asia mɛni ƒui!” 28Amu ka bénu Demetrio butemi bɔmɛni ni, ɔƒɛ ɔ́da-ma na bákɛ kɔnyi pii na báva momoomo básu banini, “Eƒesoƒuɔ Uni Artemi ndi baƒiɔ benengudi ƒui!” 29Na kɔvanu kɔmmɔ kúgyingya kɔ́kya ɔma ɔmmɔ ƒui kemo. Anwuɔsu bása lisu na bétéƒie Paulo basiakune inyɔ badi bani baalɔ Gaio ku Aristarko na bási Makedonia. Na béti-ma bésienku ɔma ɔmmɔ kasalakɔ. 30Amu na Paulo lɛnɔ ɔ́yɔ ka nka usie mmɔ, nsu Kristoƒuɔ bakladi bátatunaku-nwu. 31Amu na kalɛkɛ kammɔ benengu bani lɛnɔ ndi Paulo bakpana ni, bátala ɔtu bákya-nwu na bévele-nwu banii utakya lɛlɔ mmɔ munu munu! 32Na uwi ɔmmɔ kemo ni, ɔtɔ ɔmmɔ kemo ƒui kéyi ku lɛsɛ. Na bekyuli bani nábasa mmɔ ni, ɔdi biala ku lɛla lɛni na ɔɔsu. Na bana pii muedi baaagyi lɛla lɛni ɔsu na bébo mmɔ. 33Amu na bédi Aleksandro bétényene lɛtɔtɔ banii udie lɛla lɛni mɔɔlɛ́ mɛni kalɔ. Amu na Aleksandro ɔ́kɔliku enu katɔ na ɔ́bala-ma ɔnii baba lɛsɛ na ɔsu-ma lɛla lɛdi. 34Amu ka bekyuli bamɛni báti ka Yudani na ɔdi ni, básɔ bése kalɔ baaní lɛsɛ ku kɔvanu laa na ɔ́ƒɔ lɛdɔ bubo kunyɔ uwi. Na baasu banini, “Eƒesoƒuɔ Uni Artemi ndi baƒiɔ benengudi ƒui!” 35Uwi útu asa na aban unengu ɔdi ɔ́kana-ma bɔbala, na ɔ́tɛmi ɔ́su ɔnini, “Eƒesoƒuɔ, bina akɔ ɔdi biala ɔgyi ka Eƒeso mɛni ndi baƒiɔ benengudi Artemi keliekɔ. Na baƒiɔ lɛtabi kedee lɛni nási katɔ líbayu ni, bula lɛkɔkɔ na lɛkya. 36Na ukyuli ɔdi ulakana litemi lɛmɛni ɔkɔ bɔsia. Anwuɔsu bɛkɛ kayi buɛɛ na bitabla lɛla lɛdi ku kɔnyi. 37Ɔsika bekyuli bani na bíƒie bíboku mɛni ni, béteyu bula kakpakɔ lɛla lɛdi na bétebile bula Artemi baƒiɔ lɛnyi lɛnɔ. 38Nsu si Demetrio ku nwuna bakywɛne bánu ka bebo litemi lɛdi ku ukyuli ɔdi ni, litemi batɛne bakya mɛni. Na bubo emeyi ani lɛlɔ na baatɛ etemila. Bakana bedie bana bɔƒiɔ batina-ma na mmɔ. Bɛya na buwi lɛlɔ na bɔsia ulu ɔbuni lɛlɔ. 39Nsu si lɛla bamba na bɛɛwia bɛti ni, bɛya na bɔda bɔlɛ kadi benengu anumi. 40Ɔsika ɔmɛni use aani si bɔ́ta bunye aban lɛlɔ. Na si Romaƒuɔ bekpone bébo bábanu ɔmwi limeyi lɛmɛni ablala ni, bulakana kenye budie, na badubɔni-bu kɔtu.” 41Na ka ɔ́su ala amɛni ni, ɔ́bɔku-ma na bana ƒui bégyingya.

will be added

X\