BATALANE KABLA 18

1Amu na ɔmmɔ kama ni, Paulo ɔ́tɔlɔ Atene úsie Korinto. 2Mmɔ na útánu Yudani ɔni baalɔ Akwila, na báwɔ-nwu na Ponto. Anwu ku ulekudi Priskila bási Italia bébo mmɔ uwi útetu tɔ, ɔsika kalɔ kammɔ lɛlɔ ɔdine ɔni baalɔ Klaudio ɔ́su ka Yudaƒuɔ ƒui balɛ Roma. Paulo úsie útanu-ma, 3na ɔ́kya-ma kudɔ úteebunku-ma na bebuo lɛku bɔka kabla kani na anwu lɛnɔ ɔɔbla taadi kemo. 4Amu na lɛnwunameyi biala ni, Paulo uusié Yudaƒuɔ kasalakɔ teetédie ala kalɔ teete Yudaƒuɔ ku Grikiƒuɔ ƒui kalɛ benwini kayi. 5Amu na uwi ɔni na Silas ku Timoteo bási Makedonia bébo ni, Paulo ɔ́kɛ uwi kaduɛ úti úte litemi buni bɔsu ku kalɔ budie taatina Yudaƒuɔ ka ni, Yesu ndi Ukyuli Ɔƒunadi ɔmmɔ geen. 6Amu uwi ɔni na Yudaƒuɔ bamɛni báta bénye-nwu lɛlɔ na beetemi enyekpi taasiku Yesu lɛlɔ ni, Paulo úveli enu úwi-ma, na ɔ́su-ma ɔnini, “Si bɛ́yii ni, mina kɔnu, mina ɔgba uuubo-nwu kemo. Ɔ́si ɔƒaani ni, lísela bekyuli bani naaadi Yudaƒuɔ kudɔ ntásu-ma litemi buni lɛmɛni.” 7Na ka ɔ́gyu-ma kudɔ ni, ɔ́tɔlɔ útákya ɔnana ɔdi ɔni naaadi Yudani na baalɔ-nwu banii Tito Yusto kudɔ ɔni mɔɔbu Blɔti na ulie Yudaƒuɔ kasalakɔ kudɔ. 8Amu na kasalakɔ kammɔ unengu ɔni baalɔ Krispo ku nwuna kaduli bekyuli ƒui báƒɔ Blɔti bádi, na bákpila-ma ntu. Lɛni kani na bákpila babambadi bani náƒɔ bádi lɛnɔ ntu na Korinto mmɔ. 9Amu na limeyi lɛdi usientɛ ni, Blɔti ɔ́su Paulo na kɔna kemo ɔnini, “Tayia! Na tada litemi lɛmɛni bɔsu taya. 10Ɔsika nsiaku-ɔ, na ukyuli ɔdi ulákana-a likpidi lɛdi bɔbla. Bekyuli pii bakya ɔma ɔmɛni kemo bani ndi mina badi.” 11Anwuɔsu Paulo úlie ɔma ɔmɛni kemo lɛkwa linwi ku kakɛ ɔ́su Blɔti litemi lɛmɛni ɔ́tina bekyuli. 12Nsu uwi ɔni na bése Galio Roma aban lɛga na Akaia kalɔ lɛlɔ ni, Yudaƒuɔ badi bábla lɛkpa lɛdi na bánwi litemi bámana Paulo lɛlɔ na béƒie-nwu bésienku litemi katɛkɔ. 13Amu na básu ɔga ɔmmɔ banini, “Ukyuli ɔmɛni uunwíni bekyuli kasusu ɔnii bataakpa Katɔti na ulu ɔni náta únye bula ɔda bubo lɛlɔ.” 14Nsu uwi ɔni kani na Paulo úse kalɔ ɔnii uteedie kenye ni, aban lɛga ɔdine Galio ɔmɛni útemi na ɔ́su Yudaƒuɔ bamɛni ɔnini, “Amii Yudaƒuɔ binu! Si litemi lɛni bɛda bíboku mɛni lɛdi bɔƒiɔ bubendi bɔdi ni, ndubɔkɛ kayi na linu bina litemi. 15Nsu ka unyeƒi ukpludi na bɛɛkya na bina etemila ku ɔda bubo lɛlɔ ɔsu ni, amii alati bitásu-ni. Ɔɔɔdi ami mabla litemi ɔtɛne mete-mii na ala amɛni lɛlɔ.” 16Anwuɔsu ɔ́bɔku-ma ɔ́lɛku nwuna litemi katɛkɔ mmɔ. 17Amu na bekyuli lisu lɛmɛni béƒie Sostene ɔni ndi bana kasalakɔ kammɔ ɔtɔnkune na bétébo-nwu na litemi katɛkɔ kamɛni kudɔ. Nsu Galio útakpete-ma. 18Amu na Paulo úlie Korinto ɔma ɔmɛni kemo emeyi pii. Na nwuna kama ni, ɔ́kada baƒɔtaadine bamɛni na anwu ku Akwila ku Priskila básia ntu anumi bésie Siria. Nsu asa na watɔlɔ ni, Paulo ɔ́ya na békpeyi-nwu lili na Kenkrea na Yudaƒuɔ ɔdi lɛlɔ ɔ́si kenye kani na úse ɔsu. 19Ka úbayu na Eƒeso ni, ɔ́da Priskila ku Akwila ɔ́kya ɔkɔlɔ kemo mmɔ. Nsu anwu ɔ́tɔlɔ úsie Yudaƒuɔ kasalakɔ ɔnii utéduoku Yudaƒuɔ bammɔ ala adi kemo. 20Amu na bévele-nwu banii ulie-ma kudɔ ubu, nsu ɔ́nu ka uuubo uwi. 21Ɔmɛni ɔsu ka ɔɔtɔlɔ ni, ɔ́su-ma ɔnini, “Si Blɔti ɔ́tuna ni, ndubɔsɔ linwini libo-mii kudɔ.” Na ɔ́sɔ útéduo ɔkɔlɔ kemo na ɔ́tɔlɔ Eƒeso. 22Na ka útéduo Kaesarea ni, ɔ́tɔlɔ úsie Yerusalem na útákya baƒɔtaadine bammɔ kenye. Na ɔ́sɔ úbavi ɔ́tɔlɔ úsie Antiokia. 23Na ka ɔ́kya mmɔ uwi ɔdi ni, ɔ́sɔ ɔ́tɔlɔ úsie útásia Galatia ku Ƒrigia kalɔ lɛlɔ. Na uwi ɔmɛni ƒui ni, ɔkɛ ɔɔví taanu baƒɔtaadine bani nkya mmɔ bene, na ɔɔkya-ma ɔkplu. 24Amu na Yudani ɔdi úbo Eƒeso. Anwu baalɔ Apolo, na báwɔ-nwu na Aleksandria. Ɔdi ukyuli ɔni na kenye káda-nwu, na ɔgyi Bunweni Kedee Ɔku kemo etemila lɛnɔ. 25Na ina ka únu Blɔti lɛlɔ litemi na uutemi ku ogya ni, Yohane ntu bɔkpila lɛlɔ ala kani na ɔgyi. 26Amu ka unye uutemi ku kayi buse na kasalakɔ mmɔ na Priskila ku Akwila bénu ni, bákpanku-nwu bésienku kaduli na bédie Blɔti etemila kemo bátina-nwu kaduɛ bébu. 27Amu na ka Apolo ɔ́bla kasusu ka usie Akaia ni, Eƒesoƒuɔ baƒɔtaadine bébebunku-nwu na bénweni ɔku béte baƒɔtaadine bani nkya Akaia mmɔ banii si úbeduo mmɔ ni, na baƒɔ-nwu kaduɛ. Na uwi ɔni na útéduo mmɔ ni, úbunku bekyuli pii bani nébenwini kayi na Blɔti kɔnyana bɔnu ɔsu. 28Na nwuna etemila ammɔ ádi Yudaƒuɔ lɛlɔ, ɔsika úti Bunweni Kedee Ɔku kemo etemila údie ɔ́tina nwaa ka Yesu ndi Ukyuli Ɔƒunadi ɔmmɔ.

will be added

X\