BATALANE KABLA 15

1Uwi ɔni na Paulo ku Barnaba bakya Antiokia ni, bekyuli badi bási Yudea bébo na bátina baƒɔtaadine bani nkya mmɔ ala básu banini, “Amu ntu ukyuli biala ɔ́ƒɔ lego bukulo ɔdi ɔmmɔ aani kalɛ na Mose ɔda bubo bɔɔtina asa na wakɛ bɔƒɔ.” 2Nsu Paulo ku Barnaba ku bekyuli bamɛni báni litemi lɛmɛni bénene kaduɛ. Ɔmɛni ɔsu ni, báya na baƒɔtaadine badi básiaku-ma na bésie Yerusalem kalɛ na ama ku baƒɔtaadine bani nkya Yerusalem mmɔ batátɛmi basiku ɔlɔna bukulo kɔtɛ kɔmɛni lɛlɔ. 3Anwuɔsu ka baƒɔtaadine bamɛni ƒui bésie-ma ulu bétédu kabanye ni, bátɔlɔ bésie Ƒoinike ku Samaria lɛma kemo na bátávi baƒɔtaadine bani nkya mmɔ lɛlɔ. Na básu-ma ka ɔƒaani ni, ama bani naaadi Yudaƒuɔ lɛnɔ béti lɛlɔ béte Blɔti. Na litemi lɛmɛni lɛ́ya na bana ƒui bákɛ ebiti geen. 4Amu ka bétédu Yerusalem ni, baƒɔtaadine ku batalane ku bana benengu ƒui báƒɔ-ma kaduɛ. Na Paulo ku Barnaba béti bana ulu busie litemi báva-ma anumi ɔ́si ala ani ƒui na Katɔti ɔ́bla ɔ́kɛnku-ma lɛlɔ. 5Nsu ni, Ƒarisiƒuɔ lɛkpa lɛni nénwini kayi mmɔ badi báta bénye-ma akɔ na básu banii, “Ɔlɛka banwa bani naaadi Yudaƒuɔ na bakya-bu akɔ mɛni lɛnɔ bekulo lego na basiaku Mose ɔda bubo kama.” 6Anwuɔsu bana benengu ku batalane bátásala lisu na béti litemi lɛmɛni lɛlɔ kasusu. 7Na kasalakɔ kamɛni kalɔ ni, uwi ɔni na báatɛmi na ala pii lɛlɔ ni, Petro ɔ́ta únye na ɔ́su-ma ɔnini, “Banwa, amii alati bɛgyi ka Katɔti náƒuna-mi ɔ́siku bina akɔ ɔnii mbasu bekyuli bani naaadi Yudaƒuɔ lɛnɔ litemi buni lɛmɛni kalɛ na ama lɛnɔ baƒɔ badi. 8Na Katɔti ɔni ngyi bekyuli kɔyi kemo ni, údie ɔ́tina ka ɔ́ƒɔ-ma na úte-ma nwuna Kɔyu aani kalɛ na úti úte abu lɛnɔ. 9Útakya kavumana kadi na abu ku-ma ntɛ, ɔsika ɔ́ƒɔ-ma na bana bɔƒɔtaadi ɔsu. Na úti bana ekpidi ɔ́kyiɛ-ma aani abu kalɛ. 10Na ɔƒaani ni, bi ɔsu na bɛɛkɔ́ku Blɔti lɛni? Abu ku bula bati kuuku bútakana etila amɛni udu buti! Bi ɔsu na biiti-nya taasia baƒɔtaadine bamɛni lɛlɔ? 11Oowo! Bɔƒɔ bɔni na bɔ́ƒɔ bɔ́di ɔsu na Katɔti úti Blɔti Yesu kɔnyana bɔnu ɔ́ƒɔ-bu ngba aani kalɛ kani na ama lɛnɔ báƒɔ bádi.” 12Amu na bana ƒui báda butemi báya na bélie beenú akɔla ani na Paulo ku Barnaba baasu ka Blɔti ɔkɛ bana lɛlɔ ɔ́bla úte ama bani naaadi Yudaƒuɔ. 13Uwi ɔni na ama báwɔlɔ ni, Yakobo lɛnɔ ɔ́ta únye na ɔ́su ɔnini, “Banwa, bɛkywɛ atu na binu. 14Simon Petro únyimene-bu kudeedi kɔni na Katɔti údie nwuna bɔyɔ ɔ́tina bekyuli bani naaadi Yudaƒuɔ na ɔ́ƒuna bana akɔ badi. 15Na litemi lɛni na nwuna kenye bediene básu bése líbo lɛni aani kalɛ na bénweni ka Unwoti ɔ́su ɔnini, 16'Nwuna kama ni, ndubɔsɔ libo na mbasɔku Dawid lɛga kadikɔ lise na lɛklibi ala ani néebie mmɔ, na asɔ atɛ kaduɛ. 17Mmɔ asa na bekyuli bani nébu ku ama bani naaadi Yudaƒuɔ ƒui bani na lɛ́lɔ aani mina badi badubɔwia-mi kama ulu. Lɛni na Unwoti ɔni mɔɔbla ala amɛni ƒui ɔ́su úse. 18Katɔti ɔgyi nwuna ablala ɔ́si kalɔ kesekɔ ƒui.' 19“Anwuɔsu ami Yakobo mɔɔsu-mii ka bekyuli bani naaadi Yudaƒuɔ mɛni na béti lɛlɔ béte Katɔti ni, utalɛka butile-ma ala bɔgya. 20Mmomu bɛya bunweni-ma ɔku na bada ala aani béti bákpa béte baƒiɔ na aayá na beesé lɛlɔ bɔbla baya ku kɔsɔnɔ bɔdi ku bebuo bani bélii-ma amɔ bádu bɔkun ku ubugya bɔni baya. 21Ɔsika ɔ́si kuuku ni, ala ani na Mose únweni úse mɛni ni, anya na baaká na baasu na Yudaƒuɔ kasalakɔ na lɛnwunameyi biala na lɛma biala kemo.” 22Amu na batalane ku benengu bani nábasa mmɔ ƒui bátuna, na bédie bekyuli badi banii basiaku Paulo ku Barnaba na besie Antiokia. Nkyuli inyɔ bani na bédie mmɔ badi baƒɔtaadine bammɔ benengu inyɔ. Ama ndi Yuda ɔni na basɔ baalɔ Barsaba ku Silas. 23Na ɔku ɔni na bada bésienku mmɔ kemo etemila aasu anii Ɔmɛni ɔ́si abu batalane ku benengu ku banwa bani nkya Yerusalem kudɔ. Bɔnii buugyele amii banwa bani naaadi Yudaƒuɔ na bɛ́si Antiokia ku Siria ku Kilikia. 24Búnu ka baƒɔtaadine badi bási bula akɔ mɛni, na bébo mmɔ bábakyaku-mii unyeƒi na bula Yudaƒuɔ ɔlɔna bukulo ɔdi lɛlɔ. Nsu ni, bútatala-ma bɔnii babasu-mii ala amɛni udu. 25- 26Anwuɔsu ka bɔ́sala eli ni, bɔ́tala bula akɔ benengu inyɔ bamɛni bɔnii basiaku bula banwa bayɔne Paulo ku Barnaba bani néti bana ngba bákpa béte Blɔti Yesu Kristo bɔnii bebo-mii kudɔ. 27Yuda ku Silas ni, ama lɛnɔ badubɔsu-mii ala ani na búnweni mɛni lɛlɔ. 28Ɔsika ɔdi Katɔti Kɔyu lɛƒɔyɔ ku abu lɛnɔ ka utalɛka buti Yudaƒuɔ ɔda bubo etila butile-mii bɔgya butulo ala amɛni. 29Bini ala ani na béti bákpa béte baƒiɔ ku ubugya bɔni ku bebuo bani na bélii-ma amɔ bádu bɔkun ku kɔsɔnɔ bɔdi. Si bɛda lɛlɔ lɛni ni, keyi kadubɔyɔku-mii. Bɛkya kpoo. 30Anwuɔsu batu bamɛni ƒui bátɔlɔ bésie Antiokia. Na bana mmɔ buduo ni, bálɔ baƒɔtaadine bamɛni ƒui na bábasa. Na béti ɔku ɔni bada básiku Yerusalem mmɔ béte-ma. 31Na ama bani nkya mmɔ ƒui bákɛ ebiti ɔ́si etemila ani na báka na ɔku ɔmmɔ kemo ɔsu. 32Amu ka Yuda ku Silas ƒui badi Katɔti kenye bediene ɔsu ni, bédie ala kalɔ béte-ma bébu uwi gyɔlɔɔ, na bákya-ma ogya ku ɔyikun. 33Amu ka bélie mmɔ emeyi alɛɛ adi ni, bédie Yuda ku Silas ulu ka basɔ benwini besie Yerusalem. 34Nsu Silas ni, anwu ɔ́lɛ ugyii ka ɔƒɔ lɛlɔ ɔkya mmɔ. 35Amu na Paulo ku Barnaba básɔ bákya Antiokia mmɔ, na ama ku badi pii bakya baatina ala na baasu litemi buni lɛmmɔ. 36Amu na emeyi adi kama ni, Paulo ɔ́su Barnaba ɔnini, “Ya na bɔsɔ butánu bula banwa bani nkya lɛma lɛni kemo na bɔ́su litemi buni lɛmɛni bɔ́vi, na bɔnu kalɛ na badaku.” 37Barnaba ɔ́tuna na ɔ́wia ka nka utiku Yohane ɔni baalɔ Marko ɔda. 38Nsu Paulo anwu útayɔ lɛni munu munu! Ɔsika uwi ɔni na ama ku-nwu bésie Pamƒilia ni, Marko Yohane útáda-ma ɔ́nyonu na mmɔ. 39Amu na bana inyɔ bamɛni báni Marko Yohane lɛlɔ litemi lɛmɛni bénene laa ɔni náya na bégyingyaku lɛlɔ. Barnaba útiku Marko na básia ntu anumi na bátɔlɔ bésie Kipro. 40Nsu Paulo anwu útiku Silas, na baƒɔtaadine bani nkya mmɔ béti-ma bákya Blɔti lɛkɔkɔ na bátɔlɔ. 41Amu na bátásia Siria ku Kilikia na bákya baƒɔtaadine bani nkya mmɔ bene ɔkplu.

will be added

X\