BATALANE KABLA 12

1Amu na uwi ɔmmɔ kemo ni, Ɔga Herode úƒie baƒɔtaadine badi kalɛ na ɔdu-ma. 2Amu na ɔ́ya na békulo Yakobo lili ɔni ndi Yohane ɔnwani. 3Na ka ɔ́nu ɔ́ti ka ebiti áda Yudaƒuɔ na lɛla lɛni na ɔ́bla mɛni ɔsu ni, úƒie Petro lɛnɔ na uwi ɔni kemo na baadi bodobodo ɔni néteƒu. 4Na béti-nwu bákya ɔtɔ kesii kani na bagyumanane ine akpa ene baavumanaku lɛlɔ na baagyumana-nwu. Herode kasusu ndi ka nka udie-nwu ute kadi na bana limeyi bamba lɛni baalɔ Kukpi Lili Bɔvia Limeyi bɔdi kama. 5Anwuɔsu bagyumanane bamɛni bágyumana-nwu na ɔtɔ ɔmmɔ kemo kaduɛ. Nsu ni, baƒɔtaadine bákpali katɔ na bévele nwuna lili kpakplaa. 6Amu na uwi ɔni na Herode ɔ́kali ka ɔdubudie Petro ute kadi si kadi kégye ni, Petro ɔtɛ ɔɔlɛɛ na bagyumanane inyɔ ntɛ. Na bébo-nwu kɔgba báda-ma. Na bagyumanane babambadi benye baagyumana kayakun. 7Kɔnakunwi ni, bukeye bɔdi búbewi ɔtɔ mmɔ. Na Katɔti ɔtu ɔdi úbenye Petro kudɔ. Amu na ɔ́lɛ-nwu kɔnu lɛmangba buɛɛ, na ɔ́gyila-nwu ɔnini, “Babla, na ata!” Na kɔgba kɔmmɔ kɔ́lɛ-nwu enu kúwi kalɔ. 8Amu na ɔtu ɔmɛni ɔ́su-nwu ɔnini, “Ti ƒula lɛwu ku lɛgbanvuo kya.” Amu na Petro ɔ́bla lɛni. Na ɔtu ɔmmɔ ɔ́sɔ ɔ́su-nwu ɔnini, “Ti kɔdi bi lɛlɔ, na asiaku-mi.” 9Na Petro ɔ́ta ɔ́siaku-nwu, na ɔ́vi ɔ́lɛ ɔtɔ ɔmɛni kemo. Uwi ɔmɛni ƒui kemo ni, ɔ́kali ɔnii kɔna na uugyé. 10Amu na bávi bálɛ kayakun kedeedi ku kanyɔdi lɛnɔ. Na ka bétédu lɛbuala kayakun kenengudi kani nkya késie ɔma kakɛ ni, aka ɔlatidi kálɛmi. Na bávi aka lɛnɔ. Na ka bésie anumi blii ni, Katɔti ɔtu ɔmmɔ ɔ́da-nwu ɔ́nyonu. 11Na ɔmmɔ kama ni, Petro úbati lɛla lɛni nébo. Na ɔ́su lɛlɔ ɔnini, “Sɔsɔ geen na ɔdi ka ni, Unwoti nátala ɔtu ɔmɛni ɔnii ubedie-mi ɔsiku Herode enu kemo ku ala ani na Yudaƒuɔ baasusu ka badubɔbla-mi lɛnɔ kemo!” 12Na ka úti kasusu blii ni, ɔ́tɔlɔ úsie Maria ɔni ndi Yohane Marko uni kesii. Mmɔ na baƒɔtaadine pii bása bewi baakpali katɔ. 13Amu ka únye kayakun kani nkya ulu kenye mmɔ ɔ́kpali ni, ulekubi ɔni baalɔ Rode úbo ɔnii ubalɛmi. 14Na ka únu Petro lɛdi ɔ́ti ni, ebiti áda-nwu ávili! Útalɛmi ɔtɔ ɔmmɔ, mmomu úkeli úsie nwuna badi akɔ na útásu-ma ka Petro úbo unye kegbuta kama. 15Nsu bátaƒɔ bátadi na básu-nwu banini, “Tabatɔlɔ-bu mɛni!” Amu na ɔ́mua unye kpakplaa ka sɔsɔ na ɔdi. Amu na básu lɛlɔ banini, “Ɔƒaalɛ nwuna ukpine nébo unye mmɔ.” 16Amu na uwi ɔmɛni kemo ƒui ni, Petro ɔ́mua unye uubó kegbuta kɔnu. Na ka bésie bátálɛmi na bánu-nwu ni, ebiti átakɔsi na áda-ma. 17Amu na ɔ́ya na bába lɛsɛ. Na ɔ́su-ma ala ani nébo ku kalɛ na Unwoti úbedie-nwu ɔ́lɛku ɔtɔ kemo. Na ɔ́su-ma ɔnii basu Yakobo ku bakladi lɛla lɛni nálɛ. Ɔmɛni kama ni, ɔ́tɔlɔ mmɔ úsie kesii bamba. 18Amu na kadi bugye kemo ni, owogyo ubendi ɔdi ɔ́ƒɔ bagyumanane ɔtɔ katɛnkɔ mmɔ. Na béye lɛlɔ banii, “Wɛ geen na Petro ɔ́vi ɔƒɛni?” 19Amu uwi ɔni na Herode ɔ́wia Petro bɔyii kalɔ na útabla-nwu nwaa ni, ɔ́ya na bétéƒie bagyumanane leevu-ɛku bammɔ béboku. Na ɔ́tɛku-ma litemi na ɔ́du-ma kukpi kɔtɔ, na bádu-ma. Na ɔmmɔ kama ni, Herode ɔ́tɔlɔ Yudea úsie Kaesarea útélie mmɔ uwi ɔdi. 20Uwi ɔmɛni kemo ni, Herode úti kɔnyi kati kati kɔdi ɔ́kya Tiro ku Sidonƒuɔ. Amu na batu badi bási Tiro ku Sidon mmɔ bébo-nwu kudɔ banii babanu-nwu. Amu na békeli bátátua Blasto ɔni ndi Herode kaduli lɛlɔ ɔnune banii utévele Herode na ɔya na unwi bɔbla bubo bana lɛma inyɔ bɔmɛni ku Herode ntɛ. Ɔsika Herode kalɔ lɛlɔ na baakɛ́ bana adila taasiku. 21Amu na limeyi lɛni na Ɔga Herode úte-ma ni, ɔ́kya nwuna agala na útélie nwuna lɛgaboku lɛlɔ na úse kalɔ ku butemi. 22Na nwuna butemi bɔwɔlɔ ni, bekyuli bamɛni bémwi-nwu ku bɔva na básu banini, “Unwoti Ɔyikune geen muutemi! Na ɔɔɔdi ukyuli ɔyawine!” 23Kɔnakunwi ni, Katɔti ɔtu ɔdi úbo Herode ɔ́ƒiɛmi kalɔ, ɔsika anwu úteti bumwi útete Katɔti. Na beklubi béyi-nwu lɛlɔ kemo ƒui, na úkpi. 24Amu na Blɔti litemi buni lɛmɛni lígyingya geen, na baƒɔtaadine lɛnɔ bémomo bébu. 25Amu uwi ɔni na Barnaba ku Saulo báwɔlɔ bana kabla kani bátala-ma bɔbla ni, bénwini bási Yerusalem na béti Yohane ɔni mɔɔdi ɔti lɛnyi Marko bébunku lɛlɔ.

will be added

X\