BATALANE KABLA 11

1Uwi útetu asa na batalane ku baƒɔtaadine bakladi na Yudea bénu ka kadi bamba bani naaadi Yudaƒuɔ lɛnɔ báƒɔ Blɔti litemi lɛmmɔ. 2Anwuɔsu ka Petro únwini úsie Yerusalem ni, Yudaƒuɔ baƒɔtaadine bani nkya mmɔ bátatunaku-nwu, na básu-nwu banini, 3“Awɔ ábla unwi ku baƒɔ bani naaasiaku Yudaƒuɔ ala bɔtina, na bɛ́kya kɔnu bɛ́di na lɛkyami linwi kemo!” 4Amu na Petro údie etemila amɛni ƒui kalɔ ɔ́tina-ma na ɔ́su ɔnini, 5“Uwi ɔni na nkya Yopa na mɔɔkpali katɔ ni, lɛ́nu ala budie bɔtina bɔdi. Mmɔ na lɛ́nu kɔdi bonwu kɔdi ka báda kuna ekpo ene na kɔ́si katɔ kúbayu. 6Bebuo lidu lidu ƒui bakya kɔdi bonwu kɔmɛni kemo, bebuo bani mbo agyobi ku bebuo bani mɔɔkpɛ́ kalɔ ku baasɛ bekpidi lɛnɔ. 7Na línu ka lɛdi lɛdi lɛɛsu-mi lɛnii, 'Petro! Du bana akɔ ɔdi biala na akun.' 8Amu na lídie kenye nnini, 'Oowo! Kudi kudii! Ńtakun lɛla lɛni na Yudaƒuɔ bukisi kudii.' 9Nsu lɛdi lɛmɛni lɛ́sɔ lɛ́su lɛnini, 'Lɛla lɛni na Katɔti úveli ɔ́bla kede kede ni, tasu anii liisé lɛlɔ.' 10Ɔmɛni ɔ́lɛ kɔtɛ sɔɔn. Na nwuna kama ni, kɔdi bonwu kɔmɛni ku bebuo bani nkya-ku kemo mmɔ ƒui báta bákɔ katɔ na bátáyii bákya na kayaa. 11Na uwi ɔmmɔ lɛlɔ kani ni, nkyuli ɛtɛ bani bátala banii bebetiku-mi besienku Kaesarea mmɔ bébeduo kaduli kani kemo na nli. 12Amu na Katɔti Kɔyu kɔ́su-mi kɔnii nsiaku-ma nteesie, na ntayia. Mina banwani ɛku bamɛni básiaku-mi, na búsie bútéduo ɔnana ɔni nátala batu ɔ́kya-mi mɛni kudɔ. 13Anwu lɛnɔ ɔ́su-bu kalɛ na Katɔti ɔtu ɔdi údie lɛlɔ ɔ́tina-nwu na ɔ́su-nwu ɔnini, 'Wia Simon Petro. 14Na anwu matina kalɛ na wabla na awɔ ku ƒula kaduli bekyuli ƒui bɛdubɔkɛ bɔƒɔ.' 15Na ɔmɛni kama ni, líse kalɔ mɔɔsu-ma litemi buni lɛmɛni. Nsu asa na meduo litemi buni lɛmɛni ɔlati kemo ni, Katɔti Kɔyu kúbo na kɔ́ƒɔ-ma lɛlɔ kemo ƒui aani kalɛ na kɔ́ƒɔ abu lɛnɔ lɛlɔ kemo ƒui na kalɔ kesekɔ! 16Amu na líti kasusu lísienku uwi ɔni na Blɔti ɔ́su ɔnini, 'Sɔsɔ ni, Yohane úti ntu ɔ́kpila bekyuli. Nsu ni, Katɔti ɔdubuti nwuna Kɔyu ɔkpila-mii.' 17Na ka Unwoti néte bekyuli bani naaadi Yudaƒuɔ litela lɛmɛni aani kalɛ na úti úte-bu uwi ɔni na bɔ́ƒɔ Blɔti Yesu Kristo bɔ́di ni, naaakana Katɔti ulu butile.” 18Uwi ɔni na bénu etemila amɛni ni, báda bana unyeƒi báya na bése kalɔ beemwi Unwoti. Na básu banini, “Sɔsɔ ni, Katɔti úte bekyuli bamba lɛnɔ kuƒi ka benwini bebo-nwu kudɔ na bakɛ ngba.” 19Na uwi ɔni na ala amɛni aalɛ́ ni, baƒɔtaadine bani nékeli na lɛbibo lɛni nébo-ma lɛlɔ na Steƒano bɔdu ɔsu ni, bésie bétédu Ƒoinike ku Kipro ku Antiokia lɛma kemo. Na bakɛ baasu litemi buni lɛmmɔ, nsu ɔɔɔdi bekyuli ƒui, mmomu Yudaƒuɔ lɛti. 20Nsu ni, baƒɔtaadine bani nási Kipro ku Kirene bésie Antiokia bátásu Blɔti Yesu lɛlɔ litemi béte Grikiƒuɔ. 21Na ka Blɔti ɔyikun ɔkya-ma akɔ ɔsu ni, baƒɔtaadine bammɔ bémomo bébu. 22Uwi ɔni na baƒɔtaadine bani nkya Yerusalem bénu lɛla lɛni nébo na mmɔ ni, bátala Barnaba banii uteesie Antiokia. 23Ka útéduo mmɔ na ɔ́nu kalɛ na Katɔti úbunku-ma ni, ebiti áda-nwu geen na ɔ́kya-ma ogya úbu ɔnii benye Blɔti kama kpakplaa ku bana kayi ƒui. 24Barnaba ɔdi ukyuli ɔbuni ɔni mbo bɔƒɔtaadi, na Katɔti Kɔyu kɔ́ƒɔ-nwu lɛlɔ kemo ƒui. Nwuna kebunku ɔsu ni, baƒɔtaadine bammɔ bémomo bébu. 25Amu na Barnaba úsie Tarso ɔnii utáwia Saulo na mmɔ. 26Uwi ɔni na ɔ́nu-nwu ni, úti-nwu úboku Antiokia na bana inyɔ ƒui bélie mmɔ lɛkwa limodi. Mmɔ na bakya baatina bekyuli pii ala. Amu na Antiokia mmɔ ni, bése kalɔ baalɔ baƒɔtaadine banii Kristoƒuɔ. 27Uwi ɔmɛni kani kemo ni, Katɔti kenye bediene badi bási Yerusalem bébo Antiokia. 28Amu na bana akɔ unwi ɔni baalɔ Agabo ni, ɔ́ta únye na Katɔti Kɔyu ɔyikun kemo na ɔ́su ɔnii kɔka kubendi kɔdi kɔdubo kayawi ƒui lɛlɔ. Ɔmɛni úbebo uwi ɔni na Klaudio ɔɔdi lɛga. 29Anwuɔsu baƒɔtaadine bamɛni bábla kasusu ka beyi ala bemene banwa bani nkya Yudea. Na bana akɔ ɔdi biala úte kalɛ na wakana. 30Ka béyi ala amɛni ni, béti-nya béte Barnaba ku Saulo na béti bésienku Yudea baƒɔtaadine benengu bammɔ.

will be added

X\