BATALANE KABLA 10

1Lebo lɛmmɔ ni, ɔnana ɔdi úlie Kaesarea ɔma kemo ɔni baalɔ banii Kornelio. Ɔdi unengu úte Romaƒuɔ bekpone. 2Ɔdi ukyuli ɔbuni, na anwu ku nwuna kaduli bekyuli ƒui beeti ɔbu teete Katɔti. Ukyuli ɔmɛni úteete bekyuli ala ku nwuna kayi ƒui, na ɔɔyɔ́ katɔ bɔkpali lɛnɔ. 3Limeyi lɛdi ɔƒiiwi lɛdɔ ɛtɛ kemo ni, ɔ́nu budie bɔtina bɔdi. Na budie taatina bɔmɛni kemo ni, ɔ́nu ka Katɔti ɔtu ɔdi ɔ́si úbo-nwu kudɔ. Na ɔ́lɔ-nwu ɔnini, “Kornelio.” 4Amu ka Kornelio ɔ́nu-nwu ni, liƒu lɛ́da-nwu geen. Amu na úye-nwu ɔnini, “Ati, bi na aawia?” Amu na Katɔti ɔtu ɔmɛni ɔ́su-nwu ɔnini, “Ƒula bekyuli ala bute ku ƒula katɔ bɔkpali ni, búduo Katɔti kudɔ. 5Tala bekyuli badi na besie Yopa na batákpanku ɔnana ɔni baalɔ Simon Petro beboku. 6Uli Simon ɔni nli ɛpu kudɔ na ɔɔbla bebuo lɛku lɛlɔ kabla mmɔ kudɔ.” 7Amu ka Katɔti ɔtu ɔmɛni ɔ́tɔlɔ ni, Kornelio ɔ́lɔ nwuna kaduli nkyuli inyɔ ku bekpone bani mɔɔgyumana-nwu mmɔ akɔ unwi ɔni lɛnɔ ndi ukyuli ɔbuni. 8Na ɔ́su-ma lɛla lɛni nálɛ, na ɔ́tala-ma ɔnii beteesie Yopa. 9Amu ka kadi kégye na bakɛ bésela na badaku ɔma ɔmɛni bɔkpɛ bude ni, Petro ɔ́kɔ úsie nwuna lɛsa lili ɔnii utákpali katɔ ɔƒiiwi. 10Kɔka kúbo kɔɔda-nwu, nsu uwi ɔmmɔ na benye baanwá adila. Amu na ɔ́bla aani lɛlɛɛ kemo na úduo. 11Mmɔ na ɔ́nu ka kayaa kébimi, na ɔ́nu kɔdi bonwu kɔdi ka bada kuna ekpo ene ani ƒui na kɔ́si kɔɔyu kalɔ. 12Na kɔdi kɔmɛni kemo ni, bebuo lidu lidu pii ku balakpi ku baasɛ lɛnɔ bakya. 13Amu na únu ka lɛdi lɛdi lɛɛsu-nwu lɛnini, “Petro, ta, na adu akun.” 14Amu na Petro ɔ́su ɔnini, “Oowo! Kudi kudii! Blɔti, ńteti bebuo bani abu Yudaƒuɔ bukisi ńtetuku kenye kudii!” 15Lɛdi lɛmɛni lɛ́sɔ lɛ́su-nwu lɛnini, “Lɛla lɛni lɛlɔ na Katɔti úveli ɔ́bla kede kede ni, tasu anii liisé lɛlɔ!” 16Ɔ́nu búdie bɔtina bɔmɛni kɔtɛ sɔɔn. Na kɔtɛdi kɔmɛni kama ni, béti kɔdi kɔmɛni bésienku katɔ. 17Amu na uwi ɔmmɔ ni, lɛla lɛmɛni lɛkya lɛɛbla Petro dɛye dɛye, na úye lɛlɔ ɔnii, “Bi na ɔmɛni ɔɔtina?” Mmɔ kani na bekyuli bani na Kornelio ɔ́tala mmɔ bébeduo ɔma ɔmɛni kemo. Na ka bánu kaduli kani baawia ni, bébo bébenye kayakun. 18Na benye beeye kesii kani na Simon Petro uli. 19Amu na ɔni na Petro ulie ɔɔkali nwuna budie bɔtina bɔmɛni lɛlɔ na ulati lɛla lɛni na lɛdi ni, Katɔti Kɔyu kɔ́su-nwu kɔnini, “Nkyuli ɛtɛ bébo baawia-a. 20Ta, na esie atánu-ma. Tayia ka asiaku-ma eteesie. Ami nátala-ma.” 21Amu na Petro úsie útánu-ma na ɔ́su-ma ɔnini, “Ami ndi ukyuli ɔni na bɛɛwia. Bi nébo?” 22Amu na básu-nwu banini, “Batu na bɔdi, bɔ́si Kornelio ɔni ndi Romaƒuɔ kekpo unengu kudɔ. Ɔdi ukyuli ɔbuni na ɔɔbu Katɔti. Na Yudaƒuɔ ƒui baayɔ́-nwu litemi geen. Katɔti ɔtu ɔdi násu-nwu ɔnii ɔtala na babalɔ-ɔ na unu ƒula kenye kemo litemi.” 23Anwuɔsu Petro ɔ́ya bébeduo-nwu kudɔ na ɔ́ƒɔ-ma aani nwuna baƒɔ kalɛ. Ka kadi kégye ni, anwu ku baƒɔtaadine badi bani nási Yopa básiaku-ma bátɔlɔ. 24Amu na bétéduo Kaesarea limeyi lɛmmɔ kadi kegye. Amu na uwi ɔmɛni ni, Kornelio ɔ́sala nwuna kaduli bekyuli lisu ku nwuna bakpana badi na belie bagya Petro bubo. 25Amu ka Petro ɔ́nya úbeduo nwuna kaduli ni, Kornelio ɔ́lɛ akɔnkɔ na Petro anumi na úboku lili kalɔ. 26Amu na Petro ɔ́su-nwu ɔnini, “Ta nye! Ami lɛnɔ ukyuli na ndi.” 27Na ɔmɛni ɔsu ni, ɔ́ta únye. Na ka bátɛmi blii ni, Kornelio útiku-nwu úsienku kesii kani na bekyuli bakladi bása belie. 28Na Petro ɔ́su-ma ɔnini, “Bɛgyi ka bula Yudaƒuɔ ɔda bubo útete-mi kuƒi ka nka liduo ukyuli ɔni naaadi bula kadi ukyuli ɔdi kesii iye liti lɛlɔ lɛmana-nwu lɛlɔ. Nsu Katɔti údie ɔ́tina-mi ka ntanu ukyuli ɔdi aani ukyuli keeke. 29Anwuɔsu ka bánya bábalɔ-mi kani na lɛ́ta líbo. Na bi ɔsu na bɛɛwia-mi?” 30Na ɔmɛni ɔsu ni, Kornelio ɔ́su-nwu ɔnini, “Ɔbla emeyi ene mɛni aani uwi ɔmɛni kemo ka nkya mɔɔkpali katɔ ɔƒiiwi aani kalɛ na mɔɔyɔ́ bɔbla uwi ndi uwi. Na kɔnakunwi ni, ɔnana ɔdi ɔ́si úbenye-mi anumi, na ɔkya awu ɔni muukeye na ɔɔtu anumi! 31- 32Ɔ́su-mi ɔnini, 'Kornelio, ƒula lɛƒɔndia ku ƒula katɔ bɔkpali ƒui uudú Katɔti kudɔ! Na ɔƒaani ni, tala bekyuli badi na besie Yopa na batálɔ Simon Petro ɔni nli Simon ɔni mɔɔbla bebuo lɛku kabla na uli ɛpu kudɔ.' 33Ɔmɛni ɔsu na lɛ́tala lɛni babalɔ-ɔ, na awɔ lɛnɔ ábla kaduɛ ka áta lɛgba lɛgba ébo. Anwuɔsu na bulie bɔgya-a na Unwoti anumi ka abasu-bu litemi lɛni na ɔ́su-ɔ ɔnii su-bu.” 34Amu na Petro ɔ́su-nwu ɔnini, “Lɛ́nu lɛ́ti nwaa ka Blɔti ulánu bekyuli anumi. 35Mmomu kalɔ biala lɛlɔ ukyuli ɔni muuboku lɛlɔ kalɔ teete-nwu na ɔɔbla nwuna lɛyɔla ni, anwu na ɔɔƒɔ́. 36Lɛ́ƒɔ lɛ́di ka bínu litemi buni lɛni na básu béte Israelƒuɔ ka ni, ɔkɛ Yesu Kristo lɛlɔ ni, badubɔkɛ keyi buɛɛ. Na anwu ndi Ukyuli Ɔƒunadi ɔni lɛnɔ ndi bayawine ƒui Ɔti. 37Na bɛgyi ala enengudi ani nálɛ na Yudea kalɔ lɛlɔ ƒui ani nése kalɔ ási Galilea kalɔ lɛlɔ uwi ɔni na Yohane ɔ́kɔ lɛsa ɔ́si ntu bɔkpila ɔdi lɛlɔ kama. 38Na bínu lɛnɔ kalɛ na Katɔti ɔ́ƒuna Yesu ɔni nási Nasaret ɔni na úti nwuna Kɔyu úse-nwu likpo na úti ɔyikun lɛnɔ úte-nwu. Na ɔ́kɛ útaavi taabla lɛbuni na útaabwi bani ƒui na ayu ekpidi eekpóku, ɔsika Katɔti ɔsiaku-nwu. 39Abu muudie kenye na ala ani na úbabla na Israel ku Yerusalem. Mmɔ na bádu-nwu na ugyii lɛlɔ. 40Nsu ni, Katɔti ɔ́sɔ ɔ́ya na ɔ́ta ɔ́si kekpine na limeyi lɛtɛdi lɛlɔ, na ɔ́ya na bekyuli bánu-nwu. 41Nsu ni, ɔɔɔdi bekyuli ƒui nánu-nwu. Mmomu abu bani na ɔ́ƒuna ni, abu bɔ́nu-nwu. Na bɔ́di na bɔ́niku-nwu lɛnɔ na nwuna bɔsɔ bɔta kama. 42Na abu na ɔ́tala ɔnii bɔsu litemi buni lɛmɛni na kesi kesii. Na budie kenye ka ni, Katɔti néti Yesu ɔ́bla bekpine ku bayawine ƒui litemi ɔtɛne. 43Na Katɔti kenye bediene bénweni básiku-nwu lɛlɔ ka ukyuli biala ɔni maƒɔ-nwu madi ni, Katɔti ɔdubɔƒɔ nwuna ekpidi udie-nwu lɛlɔ na anwu Yesu lɛnyi kemo.” 44Amu na uwi ɔni na Petro unye ɔɔsu etemila amɛni ni, Katɔti Kɔyu kɔ́yu na kɔ́ƒɔ bani nlie muunú Petro litemi mmɔ ƒui lɛlɔ kemo! 45Yudaƒuɔ baƒɔtaadine bani násiaku Petro bébo mmɔ ni, litemi lɛmɛni lítakɔsi na lɛ́bla-ma dɛye dɛye! Ɔsika Katɔti Kɔyu kɔ́yu kubo bani naaadi Yudaƒuɔ lɛnɔ lɛlɔ. 46Nsu balakana ɔkɔ bɔsia, ɔsika beenú ka beetemi adi lidu lidu na beemwi Blɔti. Amu na Petro úye ɔnini, 47“Ka báƒɔ Katɔti Kɔyu aani kalɛ na abu lɛnɔ bɔ́ƒɔ ni, bulakana buni bɔnii bulakpila-ma ntu.” 48Anwuɔsu ɔ́ya na bákpila-ma ntu na Yesu Kristo lɛnyi kemo. Ɔmɛni kama ni, bévele Petro banii ulie-ma kudɔ emeyi adi.

will be added

X\