2 TIMOTEO 3

1Se ɔmɛni likpo ka ni, na emeyi ekplodi kemo ni, likyulikpi lɛdubɔya na keliela kayu ɔkplu. 2Bekyuli badubɔyɔ bana lɛlɔ lɛti bɔdia na bayɔ egulabi. Badubo lɛmɛnɛ butaakun na bataatalaku lɛlɔ katɔ. Ama ndi bekyuli bani muudumi bekyuli, ku bani naaabu bana bawɔne. Na belese kɔdɛ, ku bekyuli bani naaasiaku bɔƒɔtaadi bɔmmɔ kama. 3Badi bekyuli bani na ukyuli bamba lɛlɔ lilakywi-ma kaƒɔ, ku bani naaanu kɔnyana. Badi bekyuli bani mɔɔnyi ɔkɔ taada litemi taasia bekyuli lɛlɔ, ku bekyuli bani mbo kalala. Na bana anumi eeese buɛɛ. Na badi bekyuli bani nkisi lɛla lɛbuni. 4Badi bekyuli bani mɔɔkya bana bakpana kakya. Na badi bekyuli bani nábi basiaku bana lɛnunsia kama, ku bekyuli bani mɔɔkali banii ama kani ntulo ku bekyuli bani mɔɔyɔ́ kayawi ebiti teetulo Katɔti. 5Bekyuli bamɛni udu mɔɔtina ku kenyekplu ka badi bekyuli babuni, nsu beení Katɔti ɔyikun ka ɔdi-ma lɛlɔ na bana keliela kemo. Da lɛlɔ mamiku bekyuli bamɛni lɛlɔ 6Ɔsika bekyuli bamɛni udu ni, baabɛ́ teeduo bekyuli kɔduli na baadi beleku bani naaakana bana lɛlɔ bɔda lɛlɔ, ɔsika ekpidi lidu lidu bɔbla bɔ́ya na beeebo bunwini teewi. 7Beleku bamɛni baatɛya ala uwi ƒui, nsu belenu etemila geen ammɔ kalɔ kudii. 8Na aani kalɛ na Yane ku Yambri báta bénye Mose lɛlɔ dii ni, lɛni kani na ɔkɔ ala batinane bamɛni lɛnɔ baata teenye litemi geen lɛmɛni lɛlɔ. Bekyuli bamɛni badi bekyuli bani na likpidi bɔbla bɔ́ƒɔ-ma kasusu ƒui, na báyila baƒɔtaadine geen bɔmmɔ ulu. 9Nsu ni, bekyuli bamɛni belésie ɔgyu, ɔsika bana kɔkwɛ kukpidi kɔdubɔlɛ keyi na bekyuli ƒui anumi aani bani nábla udu ɔmɛni bávi kalɛ kani. 10Nsu awɔ ni, áanu mina ala bɔtina áti ku mina ngba keliela ku mina kasusu ku mina bɔƒɔtaadi ku kalɛ na muuwi lɛlɔ ku kalɛ mɔɔyɔ́ bekyuli ku kalɛ na mɔɔkya ɔkplu na lɛbibo kemo. 11Agyi kalɛ na básiaku-mi na békpoku-mi ku abi ani na líbo na Antiokia ku Ikonion ku Listra. Kali nu bukpoku bɔni kemo na línye kpakplaa. Nsu na ɔna ƒui kemo ni, Blɔti údie-mi. 12Sɔsɔ na ɔdi ka ni, bekyuli bani ƒui melie ngba buni na Kristo kemo ni, badububo abi na bekpoku-ma. 13Nsu bekyuli bekpidi ku ɔkɔ ala batinane ama ni, bubie bɔmmɔ bɔdubɔkɔ-ma katɔ bubu na bataatɔlɔ bekyuli. Na bana ɔbladu ɔmmɔ ɔdubɔtɔlɔ ama alati lɛnɔ. 14Nsu awɔ ni, mɔɔwia ka enye ala ani na atɛya na áƒɔ ádi lɛnɔ lɛlɔ kpakplaa. Ɔsika agyi bekyuli bani kudɔ na átɛya-nya. 15Ka ɔ́si-ɔ lɛnamu uwi ni, áti Bunweni Kedee Ɔku kemo etemila ani náya-a na áda anu na ebo ngba bɔƒɔ etemila ɔkɛ Kristo bɔƒɔtaadi lɛlɔ. 16Katɔti ɔyikun lɛlɔ na bɔ́sia bɔ́kɛ ala ani ƒui bénweni na Bunweni Kedee Ɔku kemo. Na ɔdia ute ukyuli bɔdɔnku ku bɔklibi ku bɔnyuɛ na ngba buni bulie kemo. 17Bénweni-nya kalɛ na ukyuli biala ɔni néti lɛlɔ úte Katɔti wamanku na ɔklibi-nwu ute ala abuni bɔbla.

will be added

X\