2 TIMOTEO 2

1Na awɔ, mina ubi, kya ɔkplu na bula unwi bɔbla ku Kristo na nwuna lɛƒɔndia lɛni na ubo ute-bu kemo. 2Na ala ani na énu ka lɛ́tina bekyuli pii anumi ni, anya kani na ɔlɛka eti akya bekyuli bani náƒɔ bádi enu kemo na beti-nya batina bekyuli bamba lɛnɔ. 3Nye lɛbibo lɛmmɔ kenye kpakplaa aani ukpone ɔbuni ɔni nnye ute Yesu Kristo. 4Ɔsika ukpone ɔni nnye nwuna kabla lɛlɔ geen ni, ɔɔwia ka nwuna ablala ada nwuna ɔtɔnkune ebiti. Anwuɔsu ɔsɔ ulakya bekyuli bani naaadi bekpone ablala kenye. 5Lɛni kani na asa na usi ukeline ɔni lɛnɔ nnye lɛlɔ kakukɔ wadi lɛlɔ ni, ɔlɛka ɔbla ɔsiaku nwuna ɔda bubo lɛlɔ kaduɛ. 6Umonsene ɔni nábla kogyoklo geen na nwuna kemo ni, anwu mɔɔka edula edeedi bɔdi. 7Kali ala ani mɔɔsu-ɔ mɛni ƒui nu, ɔsika ngyi nnii Blɔti ɔdubɔya na enu ana ƒui kalɔ. 8Nyimo Yesu Kristo ɔni ndi Dawid kaba kemo ubi ɔni na Katɔti ɔ́gyila ɔ́lɛku bekpine akɔ aani kalɛ na litemi buni lɛni mɔɔsu mɛni lɛɛtina. 9Muubó abi na litemi buni lɛni mɔɔsu ɔsu. Na bébo-mi lɛkpu muedi aani ukyuli ɔni na ubo lɛkanta likpidi. Nsu Katɔti litemi ni, bétebo-ni lɛkpu! 10Ɔmɛni ɔsu na mɔɔƒɔ́ lɛla biala teebweli na Katɔti bekyuli baƒunadi ɔsu, kalɛ na ama lɛnɔ bakɛ bɔƒɔ bɔni na Yesu Kristo lɛlɔ kani na bɔɔsia na buuti ngba ƒui lɛlɔ bɔyɔ teete-bu. 11Kenye kamɛni kadi litemi geen ka ni, “Si bɔ́bla unwi ku Blɔti na nwuna kukpi kemo ni, bɔdubɔsɔ bɔta buliku-nwu ngba. 12Si bɔ́kana na bunye kpakplaa na lɛbibo biala kemo ni, abu ku-nwu bɔdubɔdi lɛga. Na si buuní-nwu ni, anwu lɛnɔ ɔdubuni-bu. 13Si ina bɔlɛ bula bɔƒɔtaadi kama muedi ni, anwu ulálɛ nwuna linyese kama. Ɔsika ulakana na walɛ anwu ɔlati lɛlɔ kama kudii.” 14Ya na beteenyimo ala amɛni na alɛ-ma kpakplaa na Katɔti anumi anii batataakya unyeƒi. Ɔsika kɔsia kɔdi kulálɛ ɔmmɔ kemo. Mmomu ɔdubɔya na bekyuli bani muunú ala ammɔ bɔƒɔtaadi bɔyuɛ. 15Da lɛlɔ kaduɛ na ulu biala lɛlɔ na Katɔti uwi-ɔ livo. Taya na kɔƒa kuteekpo-ɔ na ƒula kabla lɛlɔ. Mmomu bla ukyuli ɔni mɔɔtina Katɔti litemi lɛmmɔ geen. 16Die lɛlɔ na kɔbɔ ala ku kɔdɔlɔ atɛ bɔtɛmi kemo. Ɔsika bekyuli bani na baabla ala amɛni udu ni, uudie bana kasusu na Katɔti kudɔ teesienku ɔgyu kakaaka. 17Ala ammɔ udu bɔtina ese aani lɛnyama lɛni mɔɔnyi. Na nkyuli inyɔ bani nátina ala ammɔ udu ndi Himeneo ku Ƒileto. 18Bénwini kama bákya litemi geen lɛmmɔ na bakya beeƒú baƒɔtaadine badi kasusu banii bula ngba bɔsɔ bɔta bubelie ku Katɔti búubo búbavi. 19Nsu ni, Katɔti ɔtɔ kalɔ lɛtabi lɛni na ɔ́kya ni, lɛla biala lilakana-ni bɔkunku. Na lɛtabi lɛmɛni lɛlɔ ni, únweni etemila amɛni ɔ́sia ɔnini, “Blɔti ɔgyi bekyuli bani ndi anwu badi,” ku “Ukyuli ɔni masu ɔnii ɔsiaku Blɔti ni, ɔlɛka unwini kama ɔkya ekpidi bɔbla.” 20Na ɔlakɛne ɔtɔ ni, akyami lidu lidu liisé. Na adi adi sika ugyiedi ku ɔƒualadi. Na adi lɛnɔ adi kavɔ ku kanwi akyami. Na akyami amɛni lɛlɔ kabla ni, adi ese ete emeyi buni bɔdi. Na adi lɛnɔ emeyi keeke bɔƒuƒuɛ na ese ete. 21Anwuɔsu si ukyuli ɔdi ɔ́da lɛlɔ údie likpidi kemo na ɔ́bla lɛlɔ sɛɛn ni, anwu náƒɔ Blɔti kuye aani akyami ani nse nte emeyi buni bɔdi. Na ɔ́manku ute ka ɔbla kabla kabuni. 22Da atu die lɛkloƒu bɔdi ala keeke kama bɔsiaku kemo. Na abla lɛla biala ulu lɛlɔ, na elie ɔƒɔtaadine ngba buni, na ataayɔ bekyuli, na elieku-ma ku keyi buɛɛ. Siaku ala amɛni ku bekyuli bani ƒui mɔɔkpali Katɔti na kayi sɛɛn kama. 23Da lɛlɔ mami kɔbɔ ala ku kɔdɔlɔ atɛ batɛmine lɛlɔ, ɔsika kadɔ na ala ammɔ udu eeboku. 24Na utalɛka ukyuli ɔni na ɔɔtɔnku Blɔti bekyuli utaadɔ. Mmomu ɔdi ka utaabla lɛƒɔndia teete ukyuli biala, na ɔkana ala butaatina, na ɔbla ukyuli ɔni na use buɛɛ. 25Na bekyuli bani ƒui mɔɔta teenye litemi buni lɛmɛni lɛlɔ ni, ɔlɛka udie ala kalɔ ute-ma ku kayi buɛɛ. Na ɔƒɛni kalɛ Katɔti ɔdubɔya na benwini kayi na banu litemi geen lɛmmɔ bati. 26Ɔmɛni ɔsu bana kasusu kadubɔlɛmi na balɛ Satan ɔni néti-ma únwini nwuna lɛƒɔyɔ bablane kakpagyuɛ kemo.

will be added

X\