2 TIMOTEO 1

1Ami Paulo ɔni nkɛnku Katɔti lɛƒɔyɔ lɛlɔ na ndi Yesu Kristo ɔtalane ni, ami muunweni-ɔ ɔku ɔmɛni taasiku ngba bɔni na bɔdubɔkɛ na Blɔti Yesu Kristo lɛlɔ na abu ku-nwu unwi bɔbla kemo. 2Mina ubi ɔyɔne Timoteo, muuvele Katɔti ku Blɔti Yesu Kristo lɛƒɔndia nnii lɛsiaku-ɔ na lɛnu-ɔ kɔnyana na lite-ɔ keyi buɛɛ. 3Mɔɔgyá Katɔti ɔni na mɔɔkpá enu aani kalɛ kani na mina bati kuuku bátaabla. Na mɔɔbla lɛni na kayi kani naaadu-mi kɔtɔ kemo. Lɛnɔ ni, mɔɔgyá-nwu enu usien ku ɔƒɛ na muuvele na ƒula lili si mɔɔkpali katɔ. 4Na mɔɔkali taanu ƒula keku kani na éwulo na mɔɔwia geen ka lɛnu-ɔ kalɛ na ebiti ada-mi. 5Mɔɔkali taanu ƒula bɔƒɔtaadi kpakplaa bɔni na ebo. Bɔƒɔtaadi bɔmmɔ nákya ƒ^inieku Lois ku ƒ^ini Eunike alati kemo. Lɛ́ƒɔ lɛ́di ka awɔ lɛnɔ ebo-mu. 6Kasusu kamɛni geen ɔsu na muunyimene-ɔ kalɛ na ada litela lɛni na Katɔti úte-ɔ kpakplaa uwi ɔni na líti mina enu lɛ́sia-a lɛlɔ na lɛ́kpali katɔ. 7Ɔsika Katɔti úteti kɔyu kɔni náya na liƒu litaada-bu útete-bu. Mmomu ni, úte-bu Kɔyu kɔni mɔɔyá na bɔɔkɛ́ ɔyikun, na bɔɔyɔ́ lɛlɔ, na bɔɔkana na bɔɔtí lɛlɔ bɔda lɛnɔ. 8Ɔmɛni ɔsu ni, taya na kɔƒa kukpo-ɔ ka enye Blɔti litemi kama, iye kɔƒa kukpo-ɔ na mina lɛlɔ aani ɔtɔntɛne kalɛ na Kristo ɔsu. Mmomu ni, awɔ lɛnɔ nye lɛbibo lɛmmɔ kenye kpakplaa na eteedie Blɔti litemi buni lɛmmɔ keyi. Ɔsika Katɔti úte-ɔ ɔyikun kalɛ na akana na abla ɔmɛni. 9Blɔti ɔmmɔ náƒɔ-bu ngba na ɔ́lɔ-bu ɔnii bunwini nwuna bekyuli. Ɔɔɔdi bula lɛbuni lɛni na bɔ́bla ɔsu. Mmomu ni, Katɔti ɔmmɔ ɔlati kasusu ku lɛƒɔndia lɛni na ubo ute-bu ɔsu. Na ɔkɛ Blɔti Yesu Kristo lɛlɔ na bɔ́kɛ Katɔti lɛƒɔndia lɛmɛni asa na údie kayawi. 10Nsu ɔƒɛni na Katɔti údie ɔmɛni ɔ́tina-bu nwaa na Blɔti Yesu Kristo ɔmɛni bubo kemo. Anwu nádi kukpi ɔyikun lɛlɔ. Na ɔkɛ nwuna litemi buni lɛlɔ ni, údie ngba bɔni nsɔ naaadubo bɔsa kudii keyi. 11Katɔti úti-mi ɔ́bla lɛsa ɔkɔne ku ɔtalane ku nwuna litemi buni lɛmɛni ala ɔtinane. 12Na ɔkɛ ɔmɛni lɛlɔ ɔsu muubó abi na kɔƒa kulekpo-mi. Ɔsika lɛ́ƒɔ lɛ́di geen, na ngyi ukyuli ɔni lɛlɔ na mina anu asia. Na ngyi lɛnɔ ka ɔdubɔgyumana-mi na lɛda lɛla lɛni na úti ɔ́kya-mii enu kemo kaduɛ wetédu limeyi lɛkladi lɛmmɔ lɛlɔ. 13Da etemila geen ani na lɛ́tina-a ƒui kaduɛ na abla asiaku-nya lɛlɔ. Nye bɔƒɔtaadi bɔmmɔ lɛlɔ kpakplaa na abla unwi ku Blɔti Yesu Kristo na bɔyɔ kemo. 14Na ɔkɛ Katɔti Kɔyu ɔyikun ɔni nkya-bu lɛlɔ kemo ɔsu ni, da ala abuni ani ƒui na Blɔti úti ɔ́kya-a enu kemo kaduɛ. 15Agyi ka Asiaƒuɔ baƒɔtaadine ƒui bálɛ-mi kama, na Ƒigelo ku Hermegene lɛnɔ báda-mi bése. 16Muuvele Katɔti nnii ɔnu Onesiƒoro ku nwuna kaduli bekyuli kɔnyana, ɔsika kɔƒa kútekpo-nwu na mina lɛlɔ aani ɔtɔntɛne kalɛ. Mmomu ɔ́kya-mi lɛlɔ na úbunku-mi kaduɛ. 17Na uwi ɔni na Onesiƒoro úbo Roma ni, ɔwia-mi ɔ́vi laa útédu uwi ɔni na ɔ́nu-mi. 18Na muuvele Katɔti nnii ɔnu-nwu kɔnyana na Litemi Bɔtɛ Limeyi lɛmmɔ lɛlɔ. Ɔsika awɔ ɔlati agyi kɔlɛ kɔlɛ kɔni na úbunku-mi na Eƒeso.

will be added

X\