2 PETRO 3

1Mina banwa bayɔne, ɔmɛni ndi ɔku unyɔdi ɔni na línweni muute-mii. Líti lɛ́sia lɛlɔ ka lɛku inyɔ bɔmɛni kemo ni, ndubɔsɔ lɛgyila-mii kasusu na kabla-mii nwaa na ala amɛni lɛlɔ. 2Mɔɔyɔ́ ka binyimo ala ani na Katɔti kenye bediene kedee básu dii ku ala ani na batalane bátina na Blɔti Yesu Kristo lɛlɔ. 3Kudeedi ni, bɛya na ɔbla-mii nwaa ka na emeyi ekplodi ammɔ kemo ni, bekyuli bani nsiaku bana ɔlɔna ala ɔkwɛ adala kama badububo-mii kudɔ na bama-mii. 4Na badubuye-mii banii, “Wɛ na ukyuli ɔni ndubo mmɔ ɔkya? Ɔsika ɔ́si uwi ɔni na bula bati békpi ni, lɛla lɛdi biala lɛmua lise aani uwi ɔni na bédie kayawi kalɛ!” 5Na bagyi ƒui nsu béni kalɛ na Katɔti útemi na úti údie katɔ ku kalɔ. Ɔ́bla na kalɔ kákɔ kálɛ ntu kemo. 6Na ɔkɛnku ntu bɔmmɔ kani lɛlɔ ni, ɔ́ya na ntu búyi bɔ́ƒɔ kalɔ kammɔ lɛlɔ ƒui, na ɔ́du kuuku bekyuli bammɔ. 7Na litemi lɛni lɛlɔ na ɔkɛ údie katɔ ku kalɔ ƒui ni, litemi lɛmmɔ kani na úti ɔda kayawi kammɔ use ute uwi ɔni na ɔdubɔkyula-ka ku ogya. Na Katɔti ɔ́bla lɛni úse úte limeyi lɛni na ɔdubɔtɛku bekyuli bekpidi litemi na ɔkyula-ma. 8Banwa bayɔne, ɔƒɛni ni, bitayiƒla lɛnɔ ka na Katɔti anumi ni, kavumana kadi keeebo limeyi linwi ku akwa apimu kemo. Ɔsika ɔna ƒui use-nwu likeke. 9Katɔti uuuse nyɔɔ ka ɔbla lɛla lɛni kenye na ɔ́su úse aani kalɛ na badi baakali. Mmomu ni, ɔɔkɛ́ kayi teete-bu. Ɔsika ulayɔ ɔnii ɔdi ɔyii. Mmomu ɔɔyɔ́ ka bula ƒui bɔda bula ekpidi bɔbla bɔya. 10Nsu Blɔti limeyi likplodi lɛmmɔ ni, lɛdubo-bu buyu bɔtu. Na bɔdubunu kɔku bonwu kɔdi. Na kayaa kadubo bɔyii udu. Na ala ani ƒui nkya kayaa mmɔ ni, adubɔkywi kede kede! Na kalɔ ku kana ala ƒui adubo bɔyii. 11Na si ala amɛni ƒui adubɔkywi lɛni ni, dɛ na ɔlɛka bɛda bina lɛlɔ? Ɔdi ka bɛda ngba bɔni nse kedee na biti lɛlɔ bite Katɔti. 12Na kalɛ na bíti bilie siin bɛgya Blɔti limeyi lɛmmɔ ni, anwu ndubɔya na limeyi lɛmmɔ libo pla. Limeyi lɛmmɔ na kayaa kadubo bɔkywi, na ogya liwulu lɛdubɔya na ala ani nkya kayawi ƒui ayɛɛlɛ. 13Nsu abu bunye bɔgya Katɔti kenye kani na úse-bu úse kani ndi katɔ kawɔdi ku kalɔ kawɔdi kani kemo na ala bɔbla siin sɔɔn ndubɔkya. 14Anwuɔsu ni, mina banwa, bina ƒui anu asia Blɔti limeyi lɛmmɔ bubo lɛlɔ. Na uwi ɔni binye bɛgya-nwu ni, bɛya na amii ku Katɔti ntɛ bɔdia na bilabla likpidi iye biláƒiɔ-nwu. 15Na bɛbu bɛnu kalɛ na Katɔti ɔɔkɛ́ku-mii kayi. Ɔmmɔ ndi kuƒi kɔni na úte-bu ka bɔkɛ ngba bɔƒɔ. Lɛni kani na Ɔnwa Paulo ɔkɛnku lɛlati lɛni na Katɔti úte-nwu kenye únweni ɔku úte-mii. 16Na ɔmɛni lɛlɔ kɔtɛ kani na ɔɔtɛmiku-mii si uunweni nwuna lɛku. Ɔƒɛni ni, nwuna ala adi bene kalɔ bunu bɔɔyu ɔkplu teete bekyuli bani néteduo tɔ litemi lɛmmɔ kemo kaduɛ ku bani naaasia ulu geen ɔmmɔ lɛlɔ. Lɛni kani na Bunweni Kedee Ɔku kemo etemila lɛnɔ ese ete-ma. Anwuɔsu beedie-nya kalɔ na ulu bamba lɛlɔ. Ɔmɛni ɔsu na badubo bɔyii ku udu. 17Nsu ni, mina bayɔne, bɛgyi ɔmɛni bise. Anwuɔsu bɛti lɛlɔ bɔda kalɛ na bekyuli bekpidi balátɔlɔ-mii ku bana ekpidi ablala na bideyi ulu geen ɔmmɔ lɛlɔ. Naaawia ka bina bɔƒɔtaadi bɔyuɛ! 18Bisie anumi na Katɔti lɛƒɔndia ku kalɛ na bɛ́ƒɔ Blɔti Yesu Kristo ɔni ndi bula Ɔƒɔne bɛ́di kemo. Anwu na buute ɔbu ɔ́si ɔƒɛni úsela ƒui! Ɔsia lɛni.

will be added

X\