2 PETRO 1

1Ami Simon Petro ɔni ndi Yesu Kristo kabla ɔblane ku ɔtalane ni, ami muunweni ɔku ɔmɛni lite amii baƒɔtaadine ƒui bani na abu ku-mii ƒui bɔdi benwi ku Katɔti. Na ɔ́ya na bula ƒui bɔ́ƒɔ bula Ɔti ku Ɔƒɔne Yesu Kristo ɔni nse siin bɔ́di. 2Muuvele Katɔti nnii nwuna lɛƒɔndia ku keyi buɛɛ kasiaku-mii kebu uwi biala kemo ɔkɛnku kalɛ na bɛgyi-nwu ku Yesu ɔni ndi Blɔti lɛlɔ ɔsu. 3Blɔti Yesu Kristo ɔkɛ Katɔti ɔyikun lɛlɔ úte-bu lɛla biala na bɔɔwia kalɛ na bulie ngba sɛɛn aani baƒɔtaadine. Úte-bu ala amɛni, ɔsika bɔgyi-nwu geen ka anwu nálɔ-bu ɔnii bula ukyulidu ɔbla kedee na buteekeye aani nwuna kalɛ. 4Na ɔkɛnku ala amɛni lɛlɔ ɔsu ni, Katɔti úti nwuna kaƒɔ buni ala enengudi ani náƒɔ kuye úte-bu na kenye kani na úse ɔsu. Na ɔkɛ etela ammɔ lɛlɔ ni, na bɛkana bɛlɛ ɔlɔna ala ani mɔɔda-mii ɔkwɛ na kayawi kamɛni kemo na bɛbla kedee aani nwuna kalɛ. 5Kasusu kamɛni geen lɛlɔ ɔsu ni, bɛkya ɔkplu biala na bɛbla lɛbuni lɛni ndanku kalɛ na bɛ́ƒɔ Kristo bɛ́di. Na lɛbuni lɛmmɔ lɛya na bɛti lɛla lɛni na Katɔti ɔɔyɔ́. 6Na lɛla lɛni bɛgyi mmɔ lɛya na bɛkana na bɛdi lɛlɔ. Na si bɛ́di lɛlɔ ni, na bɛkana na binye kpakplaa. Na si bínye kpakplaa ni, na bɛkana na bilie ngba bɔbuni aani baƒɔtaadine kalɛ. 7Na si bílie ngba bɔbuni bɔmɛni ni, na bɛkana na bɛdi kɔnwa geen. Na si bɛ́di kɔnwa geen kɔmɛni ni, na ɔya na bitaayɔ bekyuli ƒui. 8Ɔsika si ala amɛni ƒui ásadi éte-mii na bítayuɛ ni, adubɔya na bɛkana bitaabla kabla na bɛnwu ebi buni ka bɛ́ti Blɔti Yesu Kristo ɔmmɔ ƒui ɔsu. 9Na si ɔdi ɔɔyaki ala amɛni adi ni, na ukyuli ɔmmɔ use aani ukyuli ɔni na ulánu ɔgyu. Na ɔ́yiƒla lɛnɔ ka Katɔti úti nwuna ekpidi ani na ɔ́ɔbla ƒui ɔ́kyiɛ-nwu. 10Banwa, ɔmɛni ɔsu ni, binye kpakplaa bibu. Na lɛla lɛni na Katɔti ɔ́lɔ-mii na ɔ́ƒuna-mii ɔnii bɛbla ni, bɛkya-ni ɔyikun uwi biala kalɛ na bina bɔƒɔtaadi bulayuɛ. 11Si bɛ́bla lɛni ni, bɛdubɔkɛ kuƒi biala biduo Blɔti ku Ɔƒɔne Yesu Kristo ngba ƒui lɛga kadikɔ. 12Ina ka bɛgyi ala amɛni na éedie litu na bina lɛlɔ kemo muedi ni, ndubɔsɔ lɛya na biteenyimo-nya na ɔmɛni ɔsu. 13Mɔɔnu ka ɔlɛka ntaalɛmi-mii kasusu na ɔmɛni lɛlɔ uwi ɔni na nli ngba mɛni. 14Ngyi ka kébu blii na linwini kama aani kalɛ na Blɔti Yesu Kristo ɔ́su-mi nwaa kalɛ. 15Na ndubɔnu ka mina kekpima ni, bɛdubɔkana na biteenyimo ala amɛni uwi biala kemo. 16Ɔɔɔdi kɔtɛ keeke na bɔ́nwi búti bɔ́tina-mii ka Blɔti Yesu Kristo ɔsɔ ɔdububo na ɔyikun kemo. Bɔgyi lɛla lɛni na bɔ́su-mii. Ɔsika abu alati bɔ́nu-nwu ku bula anumi kalɛ na use kedee na ɔdi Ɔga. 17Na bunye mmɔ uwi ɔni na Katɔti úti ɔbu úte-nwu na ɔ́ya na uukeye ku uwi ɔni na Katɔti ɔmmɔ lɛdi lɛ́si katɔ na nwuna lɛgadi bukeye kemo lɛnini, “Ɔmɛni ndi mina Ubi ɔni mɔɔƒɔ́-mi anu.” 18Na búnu lɛdi lɛni nási katɔ uwi ɔni abu ku-nwu bunye kɔbi kedee kɔmmɔ lili. 19Ɔmɛni ɔsu bɔ́sɔ bɔ́ƒɔ kenye bediene linyese lɛmmɔ bɔ́di geen búbu. Na ɔlɛka amii lɛnɔ bise atu geen na binu-ni. Ɔsika lise aani ogya ɔni mɔɔda na kesii kani nse suu utálɛ uwi ɔni na kadi kadubugye. Na kadi bugye bɔmmɔ ndi Kristo bukeye bɔni ndubukeye na bula kayi kemo aani kalɛ na ɔtanta ayabi eekeye lɛdigye. 20Lɛla lideedi lɛni nálɛka lɛbla-mii nwaa ni, ani ndi ka ukyuli ɔdi ulakana na wedie Katɔti kenye bediene ala ani na básu bése na Bunweni Kedee Ɔku kemo kalɔ. 21Ɔsika kenye bediene bátasia lɛla lɛni na ukyuli ɔɔyɔ́ kenye bátasu lɛla lɛdi bétese. Mmomu Katɔti Kɔyu náƒɔ-ma lɛlɔ kemo ƒui na kɔ́ya na básu kenye kani nási Katɔti ɔlati kudɔ bése.

will be added

X\