2 YOHANE 1

1Ami baƒɔtaadine unengu muunweni ɔku ɔmɛni lite awɔ uleku ɔni na Katɔti ɔ́ƒuna aani nwuna ɔdi ku ƒula bebi. Mɔɔyɔ́-mii na litemi geen lɛmmɔ kemo. Na ɔɔɔdi ami lɛti mɔɔyɔ́-mii, mmomu ami ku bani ƒui ngyi litemi geen lɛmmɔ. 2Ɔsika litemi geen lɛmmɔ lɛ́ƒɔ abu ku-mii ƒui lɛlɔ kemo na lɛdubulie-bu kudɔ uwi ƒui. 3Na si bulie na litemi geen lɛmmɔ ku bɔyɔ kemo ni, lɛƒɔndia ku kɔnyana bɔnu ku keyi buɛɛ kadubɔsiaku-bu ɔ́si Katɔti ɔni ndi bula Ɔti Ku Yesu Kristo ɔni ndi Katɔti Ubidi kudɔ. 4Kubiti kɔ́da-mi geen ka lɛ́nu ka ƒula bebi badi bamua basiaku litemi geen lɛmmɔ kama aani kalɛ kani na Katɔti úbo-bu ɔda. 5Na ɔƒɛni ni, uleku ɔyɔne, muuvele-ɔ ka aya na bula ƒui bɔyɔ lɛlɔ. Ɔmɛni ɔɔɔdi ɔda bubo bɔwɔdi na muunweni lite-ɔ. Mmomu ɔdi ɔda bubo bɔni nkya ɔ́si kalɔ kesekɔ. 6Na bɔgyi ka bɔɔyɔ́ lɛlɔ si bɔsiaku Katɔti ɔda bubo bɔmmɔ kama. Na ɔda bubo bɔmɛni ndi ka bulie ngba na bɔyɔ kemo aani kalɛ na bínu ɔ́si kalɔ kesekɔ mmɔ. 7Bekyuli bani mɔɔtɔ́lɔ bekyuli béebo bakɛ baaví kayawi. Bekyuli bamɛni muuní ka basu banii Yesu Kristo úbo kayawi aani ukyuli ɔyawine kalɛ. Na ukyuli ɔmɛni udu ni, unye ute ɔkɔ ɔnyine ɔni ndi Kristo ukisine ɔmmɔ. 8Anwuɔsu binye kagyumana kalɛ na bilatuma bilewiakun, mmomu na bina katuma kalɛ-mii kɔsia kudu kɔwɔlɔ. 9Ukyuli ɔni náda ɔ́via Kristo ala bɔtina na ulásia-nya kama ni, uuubo kɔna ku Katɔti. Nsu ukyuli ɔni nsiaku Kristo ala bɔtina bɔmmɔ kama ni, uliku Katɔti ku Ubidi lɛnɔ. 10Ɔmɛni ɔsu si ukyuli ɔdi úbo-mii kudɔ na ɔɔɔda Kristo ala bɔtina bɔmɛni ni, bitegyingya enu bitaƒɔ-nwu na uduo-mii kaduli. 11Ɔsika ukyuli ɔni megyingya enu waƒɔ-nwu ni, ɔ́blaku-nwu unwi na nwuna udunkpi ala bɔbla kemo. 12Mbo ala pii na lɛsu-mii, nsu naaayɔ ka linweni ala ammɔ limene-mii. Mmomu mɔɔwia kuƒi ka libo-mii kudɔ na bɔtɛmi anumi ku anumi kalɛ na bula ebiti edu-bu ɔkwɛ. 13Ƒula ɔnwani ulekubi ɔni lɛnɔ na Katɔti ɔ́ƒuna bebi beegyele-ɔ kaduɛ.

will be added

X\