2 KORINTOƑUƆ 9

1Geen ni, útalɛka linweni-mii lɛla lɛdi lɛsiku kalɛ na biibunku Katɔti bekyuli bani ndi bawabane na Yudea kalɔ lɛlɔ. 2Ngyi ka bɛɛyɔ́ geen ka bite bekyuli bamɛni kebunku. Na mɔɔkun lɛmɛnɛ na ɔmɛni lɛlɔ uwi biala taatina baƒɔtaadine bani nkya Makedonia. Lɛ́su nnii banwa bani nkya Akaia kalɔ lɛlɔ ni, báklibi lɛlɔ bése ɔ́si lɛkwɛni ka bete kebunku kamɛni. Na bina kebunku ogya bɔkya nágyila bana akɔ pii. 3Na ɔƒɛni ni, líti banwa bamɛni muumene-mii kalɛ na bula lɛmɛnɛ lɛni na bɔɔkun na bina lɛlɔ ni, lɛ́bla sɔsɔ. Na aani kalɛ na mɔɔsu uwi biala ni, ngyi ka bɛ́klibi bina ala ani na biti bite kebunku kammɔ bíse. 4Na si nka banwa bani nkya Makedonia badi básiaku-mi bébo-mii kudɔ na bábanu ka bítaklibi lɛla lɛdi bítese aani kalɛ na lɛ́su ni, abu ku amii lɛnɔ geen anumi adubuwi-bu kalɔ. Na buláwia kɔƒa kɔdi na kalɛ na búti anu bɔ́sia-mii lɛlɔ ɔsu. 5Ɔmɛni ɔsu na lɛ́bla kasusu ka banwa bamɛni bagyu batɔ-mi bina kudɔ. Na bebunku-mii na bɛsala etela ani na bɛ́su ka bɛdubute mmɔ bise. Na bulayɔ ka ɔbla aani si ukyuli ɔdi nénye-mii lɛlɔ asa na bɛ́bla lɛni. Mmomu ɔdi kaƒɔ ƒaa ala bute. 6Bɛya na ɔbla-mii nwaa ka ni, si ágya edula blii suɛ ni, adubɔƒɛ-nya blii suɛ lɛni kani. Na si ágya-nya pii ni, adubɔƒɛ-nya pii lɛnɔ. 7Bina akɔ ɔdi biala ute lɛla lɛni na anwu ɔlati ɔ́lɛ ugyii ka wete ku lɛlɔyɔ. Na utabla aani si ukyuli ɔdi nnye-nwu lɛlɔ asa na uute. Ɔsika Katɔti ɔɔyɔ́ ukyuli ɔni muute ala ku kaƒɔ ƒaa. 8Na Katɔti ɔkana na ute-ɔ lɛla biala kalɛ na akɛ ala ani ƒui na aawia uwi biala. Na akana ebunku na kabla kabuni biala kemo kaduɛ. 9Bunweni Kedee Ɔku ɔ́su na ukyuli ɔni nse siin lɛlɔ ɔnini, “Uute bekyuli bani mɔɔyaki ala ku kaƒɔ ƒaa, na uláda lɛbuni bɔbla taaya kudii.” 10Katɔti ɔni muute umonsene edula ani na ɔɔgya na uute-nwu adila na ɔɔdi ni, anwu ndubute-nwu edula agyadi ani ƒui na ɔɔwia. Lɛni kani na ɔdubɔya ukyuli siin ala ani na uute ɔya na nwuna kabla buni kanwu ebi pii na bekyuli akɔ. 11Katɔti ɔdubɔya na bɛkɛ ala pii na lilu pii lɛlɔ kalɛ na amii lɛnɔ biteete bekyuli bamba ala pii. Na bekyuli bammɔ badubɔgya Katɔti enu na bina etela ani na búti búsienku-ma ɔsu. 12Ɔsika kabla kani na bɔɔbla teete baƒɔtaadine bani mɔɔyaki ala mɛni ni, uubunku-ma geen. Nsu ɔɔɔdi ɔmmɔ lɛti, mmomu ɔdubɔya na bekyuli pii bagya Katɔti enu uwi biala. 13Bina kaƒɔ ƒaa kebunku kani biite bekyuli mɛni mɔɔtina ka bɛɛdi Kristo litemi buni lɛmmɔ lɛlɔ geen. Na kalɛ na biidie bina bɔƒɔtaadi keyi ku kalɛ na biile ala ani nse-mii teete lɛlɔ ku bekyuli bamba lɛnɔ ɔsu ni, bekyuli pii badubuti ɔbu bete Katɔti. 14Na badubɔkpali katɔ na bina lili ku bɔyɔ geen na Katɔti lɛƒɔndia libendi lɛni na údie ɔ́tina ɔkɛ bina lɛlɔ ɔsu. 15Bɛya na bɔgya Katɔti enu na litela libendi geen lɛni na úti úte-bu ɔsu. Bulakana litela lɛmɛni kalɔ budie.

will be added

X\