2 KORINTOƑUƆ 7

1Banwa, ka Katɔti úse-bu kenye na ala amɛni ƒui lɛlɔ úse ɔsu ni, bɛya na bɔbla lɛlɔ sɛɛn na bɔda lɛlɔ budie ala ani ƒui mɔɔyá na bula ɔlɔna ku kɔyu kuusé lɛlɔ kudɔ. Na bɛya na buti lɛlɔ ƒui bute Katɔti ka bɔɔbu-nwu na bɔɔyia-nwu ɔsu. 2Bigyingya bina enu bite-bu. Bútaƒiɔ bina akɔ ɔdi, na bútakpanku ɔdi lɛnɔ bútavinku ulu ukpidi ɔdi lɛlɔ iye bɔnya ɔdi bɔkya. 3Naaasu ɔmɛni líti lɛkya-mii kɔƒa. Ɔsika lɛ́su ḿbavi nnii bɛ́ƒɔ-bu kuye ɔni na kukpi kemo o-o, ngba kemo o-o ni, lɛla bamba lɛdi muedi lilakana-bu ntɛ bule. 4Mina anu asia-mii lɛlɔ geen! Na mɔɔtina lɛlɔ na amii ɔsu. Na kaƒɔ kaayɔ́-mi ɔsika ina ka buubó abi ni, ebiti áƒɔ-mi kayi kemo ƒui na amii ɔsu. 5Ka búbeduo Makedonia muedi ni, bútakɛ bɔnwuna bɔdi. Mmomu ɔgbankpi sɔɔn na bekyuli bada baasiaku-bu kesii biala. Na bekyuli beekpóku-bu na liƒu lɛkya-bu lɛlɔ kemo. 6Nsu Katɔti ɔni mɔɔsia bekyuli bani muuwulo kɔnyana kɔnu ni, ɔ́ya na kaƒɔ káyɔ-bu ɔni na Tito ɔ́si-mii kudɔ úbo. 7Na ɔɔɔdi Tito bubo bɔmmɔ lɛti náya na bɔ́kɛ kubiti. Mmomu ɔ́su-bu ɔnii ala ani náyɔ-nwu kaƒɔ ni, anya ndi ka bɛɛyɔ́ ka bigyingya bina enu na bɛƒɔ-mi, na bina bɔƒiɔ búduo-mii, na binye-mi kama kpakplaa. Ɔmmɔ ɔsu na ebiti ásɔ áda-mi étulo. 8Ɔku ɔni na línweni-mii ni, úkpoku-mii sɔsɔ. Nsu lɛni kani na ɔdi ka linweni-nwu. Lɛ́ti ka ɔku ɔmmɔ úduo-mii, nsu uwi klukui ɔdi kani na ɔdi. 9Kalɔ kesekɔ ni, útayɔ-mi kaƒɔ ka úduo-mii lɛni. Nsu ɔƒɛni ni, mɔɔkɛ́ ebiti. Ɔɔɔdi ɔni na ɔku ɔmmɔ úduo-mii ɔsu, mmomu ka ɔ́ya na bina bɔƒiɔ búduo-mii na bíni-mu bɔbla ɔsu. Ɔsika Katɔti ala lɛlɔ ɔsu na ala ammɔ éduo-mii lɛni. Anwuɔsu lɛla lɛdi lítebie na ɔdi lɛlɔ na abu ɔsu. 10Na si Katɔti ala lɛlɔ ɔsu na ukyuli alaekpidi ani na ɔ́bla éduo-nwu ni, uunwíni kama taakya ekpidi bɔbla na ɔɔkɛ́ bɔƒɔ ɔni na ɔsɔ ulenu ɔlɛ ɔdi. Nsu si kayawi ala lɛlɔ ɔsu na lɛla lɛdi liiduo-ɔ ni, ɔɔyá na aayila ngba geen bɔmmɔ. 11Bɛnu kalɛ binye kpakplaa ka ala ammɔ éduo-mii na Katɔti ala lɛlɔ ɔsu. Bɛɛwia kpakplaa ka bidie lɛlɔ na likpidi kemo na bilie sɛɛn. Ɔsika ala ammɔ eeƒí-mii livo na ana bɔbla bɔɔda-mii liƒu. Nu kalɛ na bígyingya enu ka bɛƒɔ-mi, na binye-mi kama kpakplaa. Na anumi égyie-mii ka bɛni likpidi ɔblane ɔmmɔ kɔtu. Na bidie lɛlɔ bɛtina na ulu biala lɛlɔ ka bɛɛɛkɛnku ɔbladu ukpidi ɔmmɔ. 12Ɔmmɔ ɔsu ɔku ɔni na línweni límene-mii ni, ɔɔɔdi ukyuli ɔni náƒiɔ lɛlɔ litemi kani na lɛdi iye ukyuli ɔni na báƒiɔ lɛti ɔsu. Mmomu línweni-nwu kalɛ na bɛti na Katɔti anumi kalɛ na bɛɛbu-bu geen. 13Ɔmɛni ƒui ɔsu kaƒɔ kaayɔ́-bu. Na lɛla lɛni náya na ebiti ásɔ aada-bu geen teetulo ndi lɛla lɛni náyɔ Tito kaƒɔ. Ɔsika bɛ́ya na nwuna kasusu kábla-nwu buɛɛ. 14Bítakya-mi kɔƒa na nwuna anumi ka lɛ́kun lɛmɛnɛ na bina lɛlɔ. Na ala ani ƒui na bɔɔsu-mii uwi biala kemo ni, adi etemila geen. Na lɛni kani na lɛmɛnɛ lɛni na bɔ́kun na Tito anumi lɛnɔ ɔdi ulu lɛlɔ. 15Anwuɔsu na ɔɔyɔ́-mii teebu si uunyimo kalɛ bina ƒui bínye kagyumana na bínu ala ani na bɔ́tina-mii ku kalɛ na bɛ́ƒɔ-nwu na bíboku lɛlɔ kalɔ bíte-nwu na bɛɛbu-nwu ɔsu. 16Lɛlɔ lɛɛyɔ́-mi ɔsika ɔƒɛni lɛkana na liti mina anu lɛsia-mii lɛlɔ na lɛla biala kemo.

will be added

X\