2 KORINTOƑUƆ 6

1Ka bunye bɔɔblaku Katɔti kabla ɔsu ni, buuvele-mii bɔnii bitebile Katɔti kɔnyana bɔnu. 2Ɔsika Katɔti ɔ́su ɔnii, “Uwi ɔni námanku ka lɛnu-mii kɔnyana ni, línu-mii bɔkpali. 2 Na ka limeyi lɛni na lɛƒɔ-mii lɛnɔ lídu ni, líbunku-mii.” Binu! Mɔɔsu-mii ka ɔƒaani ndi uwi ɔni námanku na Katɔti ɔnu-mii kɔnyana. Na ɔmwi ndi limeyi lɛni na Katɔti ɔƒɔ-mii. 3Bulayɔ ka ɔdi udie-bu bɔƒiɔ bɔdi na bula kabla kemo. Ɔmɛni ɔsu bulabla lɛla lɛni maya na bekyuli belebo Katɔti kudɔ. 4Mmomu ni, lɛla biala lɛni na bɔɔbla kemo ni, buudie taatina nwaa ka Katɔti kabla bablane na bɔdi. Bunye kpakplaa na lɛƒɛda ku lɛbibo ku bukpoku kemo. 5Bekyuli bébo-bu na bákya-bu aban ɔtɔ na báyoli-bu. Na bɔ́bla kabla bútulo lɛlɔ, na bútatɛ bútalɛɛ, na kɔka lɛnɔ kɔ́da-bu. 6Búdie lɛlɔ bɔ́tina ka bɔdi kabla bablane babuni na kalɛ na bɔda lɛlɔ sɛɛn ku kalɛ na bɔgyi Katɔti litemi buni lɛmmɔ. Buuwi lɛlɔ buɛɛ ku bula ablala na bekyuli akɔ, na bɔɔbla lɛƒɔndia. Katɔti Kɔyu kɔɔkya-bu lɛlɔ kemo, na bɔɔyɔ́ bekyuli ku kaƒɔ nwaa. 7Bulatɔlɔ bekyuli ku bula lɛsa bɔkɔ. Na Katɔti ɔyikun ɔni nsiaku-bu ɔɔtina lɛnɔ ka bɔdi nwuna kabla bablane. Na bula ngba siin bulie ndi bula lɛla biala na kabla kamɛni kemo. Buse aani ekpola ani ukpone ɔda uukpó. 8Bekyuli badi baabu-bu, na badi lɛnɔ beewi-bu anumi kalɔ. Badi beedumi-bu na babambadi lɛnɔ beemwi-bu. Bekyuli baanu-bu aani ɔkɔ banyine, nsu litemi geen lɛmmɔ na bɔɔsu. 9Bekyuli balákpete-bu, nsu bagyi-bu kesii biala. Uwi ndi uwi bɔkya kukpi ɔgbankpi kemo, nsu bɛnu! Bɔmua buli ngba! Báni-bu kɔtu geen, nsu bútekpi. 10Ina ka bula lɛlɔ lɛɛkywí kaƒɔ ni, lɛlɔ lɛɛyɔ́-bu uwi biala. Baanu-bu aani bawabane, nsu bɔɔyá na bekyuli beenwíni Katɔ Ɔga Ɔma balakɛne. Baanu-bu aani bekyuli bani neeebo lɛla lɛdi. Nsu geen ni, ala ƒui ása-bu. 11Banwa Korintoƒuɔ, búgyingya enu búte-mii. 12Ɔɔɔdi abu nétedie enu! Mmomu amii námana amangba bɛ́kya-bu. 13Mɔɔtɛmiku-mii aani kalɛ na ubi ɔti ɔɔtɛmiku nwuna bebi. Na kalɛ na buugyingya enu teete-mii ni, amii lɛnɔ bigyingya enu bite-bu lɛni kani. 14Bɛnu ka amii ku bekyuli bani naaadi baƒɔtaadine bítabla unwi na lɛla lɛni naaasia bula ulu lɛlɔ. Ɔsika lɛla lɛni nse siin ku lɛla lɛni neeese siin lilábla unwi. Na bukeye ku lɛdisa lilákya liku linwi. 15Kristo ku ɔbɔnsamu balatunaku lɛlɔ. Lɛni kani na ɔƒɔtaadine ku ukyuli ɔni nátaƒɔ útadi beeebo kɔna. 16Baƒiɔ ku kesii kani na Katɔti uulie ni, katamanku lɛlɔ. Anwuɔsu abu lɛnɔ bútamanku baƒiɔ, ɔsika abu ndi Katɔti ɔni neeekpi keliekɔ. Aani kalɛ na Katɔti ɔlati ɔ́su ɔnini, “Ndubɔkya-ma akɔ na lilie ku-ma, na ndubɔbla bana Katɔti, na ama lɛnɔ babla mina bekyuli.” 17Anwuɔsu Blɔti ɔɔsu nwuna bekyuli ɔnini, “Bɛlɛ-ma akɔ, na bɛda lɛlɔ bɛmami bekyuli bani mɔɔbla lɛƒiɔkpa ala lɛlɔ. Bitetuku bana ala ani muusé lɛlɔ mmɔ, na ndubɔƒɔ-mii. 18Na ami ndubɔbla bina Ɔti, na amii lɛnɔ bɛbla mina bebi banana ku belekubi. Lɛni na Katɔti Ɔyikune Ƒui ɔɔsu.”

will be added

X\