2 KORINTOƑUƆ 5

1Na si bula ɔlɔna ɔni nse aani kevo kani kemo bulie na kayawi kamɛni kemo kébie ni, bubo ɔtɔ na Katɔ Ɔga Ɔma. Na ɔtɔ ɔmmɔ ni, anwu ɔlati néti nwuna enu ɔ́tu-nwu, na ɔdubunye uwi ƒui. 2Na uwi ɔni kemo na bɔmua bɔkya kayawi kamɛni ɔlɔna kemo ni, buuubo bɔnwuna bɔdi. Na bɔɔnu ulu kpakplaa ka bɔkɛ Katɔ Ɔga Ɔma ɔlɔna. 3Na si bɔ́kɛ ɔlɔna ɔmmɔ ni, ulabla-bu aani si bɔkɛ kasɔngya. 4Na uwi ɔni bɔmua bulie kayawi kamɛni ɔlɔna kemo ni, bɔɔnu taati ka búmii na buuubo bɔnwuna. Na ɔɔɔdi ka bɔɔwia bɔnii bɔɔnyonu kayawi ɔlɔna ɔmɛni. Mmomu bɔɔwia ka bɔkya Katɔ Ɔga Ɔma ɔlɔna kemo kalɛ na ɔlɔna ɔni nsɔ naaadubo bukpi ɔƒɔ ɔni muukpi mmɔ ƒui. 5Katɔti náklibi-bu úse úte ka bɔvumana lɛni. Na úti nwuna Kɔyu úte-bu aani lɛla lɛni na buti butaanu ulu bute ala ani ƒui na ɔ́klibi úse úte-bu. 6Ɔmɛni ɔsu na bɔɔkɛ́ kayi. Na bɔgyi ka si bɔkya ɔlɔna ɔmɛni kemo ni, na bulanu Blɔti ku anumi. 7Na bula ngba bɔni na bulie mɛni ni, bɔkɛnku bɔƒɔtaadi lɛlɔ. Na ɔɔɔdi lɛla lɛni na buti bula anumi bɔnu bɔti. 8Bɔɔkɛ́ kayi geen na bɔɔyɔ́ teetulo si bɔ́nyonu ɔlɔna ɔmɛni búse na bútánu Blɔti ku anumi mmomu. 9Na lɛla lɛni na bɔɔwia teetulo ndi ka si mɛni na bɔkya o-o iye Katɔ Ɔga Ɔma o-o ni, na bɔbla Blɔti lɛƒɔyɔ. 10Ɔsika bula ƒui bɔdubɔda bɔlɛ Kristo anumi na ɔtɛku-bu litemi. Na ɔdi biala ɔdubɔƒɔ nwuna lɛyuƒɔla lɛni námanku nwuna kabla. Lɛbuni lɛdi o-o iye likpidi o-o, ɔdubɔƒɔ nwuna lɛyuƒɔla ɔkɛnku ngba bɔni na búlie na kayawi kamɛni kemo. 11Ka bɔgyi kalɛ na ɔlɛka bɔyia Blɔti ɔsu ni, bunye bekyuli lɛlɔ ka benu-bu kalɔ. Katɔti ɔgyi-bu kede kede na mɔɔsia anu ka amii lɛnɔ bɛti bula udu kaduɛ. 12Ɔɔɔdi banii lɛlɔ na bɔ́sɔ buukú bɔtina-mii, mmomu bɔɔwia ka bɛkɛ kasusu kabuni na bula lɛlɔ. Mɔɔwia ka bɛkɛ kenyekɔ kabuni na abu ɔsu kalɛ na bidie kenye bɛtina bekyuli bani mɔɔkun lɛmɛnɛ na bekyuli lɛlɔ, na ɔɔɔdi ka bánu bana udu buni ɔdi báti ɔsu. 13Si ina bɛɛnu-bu aani bekyuli bani na muukpi libuo na kabla kani na bɔɔbla ɔsu ni, Katɔti ɔni na bɔɔyɔ́ ɔsu na use-bu lɛni. Nsu si bulékpi libuo ni, ɔdi bina kɔsia. 14Kristo bɔyɔ bɔni na ubo ute-bu mɔɔdi-bu lɛlɔ. Ɔƒɛni ka bɔ́nu bɔ́ti ka ukyuli unwi nékpi na bekyuli ƒui lili ɔsu ni, ɔmɛni ɔɔtina ka bula ƒui bútu kukpi kɔmmɔ kenye bɔ́nu. 15Kristo nékpi na bekyuli ƒui lili kalɛ na bekyuli bani nli ngba ni, basɔ beeelie ngba beeete bana lɛlɔ. Mmomu belie ngba bete Kristo. Ɔsika ama ɔsu na Kristo úkpi na Katɔti ɔ́gyila-nwu ɔ́lɛku bekpine akɔ. 16Na ɔ́si ɔmɛni kama ni, bɔsɔ bulátɛku ɔdi litemi na kayawi kamɛni kasusu kenye. Lɛni na bɔ́tɛku Kristo litemi dii. Nsu ɔƒɛni ni, bɔsɔ bulánu-nwu lɛni. 17Anwuɔsu si ukyuli ɔdi ku Kristo bábla unwi ni, ɔgyi ɔnii únwini ukyuli ɔwɔdi. Na nwuna ukyuli udu ɔkukudi ɔmmɔ ɔ́vi. Na ɔwɔdi ɔ́ƒɔ ɔmmɔ kenye. 18Katɔti nábla ala amɛni ƒui. Na údie lɛla lɛni nébile abu ku-nwu ntɛ kalɛ na bɔbla ku-nwu unwi ɔkɛnku Kristo lɛlɔ. Na anwu kani néti kabla kamɛni ɔ́kya-bu enu kemo ɔnii bɔkpanku bekyuli bamba buboku na ɔklibi ama ku-nwu ntɛ. 19Na lɛsa lɛmɛni ndi ka Katɔti ɔkɛ Kristo lɛlɔ na ɔ́klibi anwu ku bekyuli ƒui ntɛ. Na údie atu na bana ekpidi ƒui lɛlɔ. Na kenye kani na ɔda úte-bu ndi ka ɔɔwia ka bɔsu bekyuli ƒui ntɛ bɔklibi litemi lɛmɛni. 20Na abu nnye Kristo kenye. Na Katɔti ɔlati nkɛ-bu lɛlɔ na ɔɔsu-mii lɛla lɛni geen na ɔɔwia taasiku-mii kudɔ. Ɔmɛni ɔsu bunye Kristo kenyekɔ buuvele-mii bɔnii bɛya na Katɔti ɔklibi amii ku-nwu ntɛ. 21Kristo útabla likpidi lɛdi. Nsu bula alaekpidi lili ɔsu na Katɔti úti-nwu ɔ́bla alaekpidi ɔblane. Na ɔmɛni maya na abu bani mabla ku-nwu unwi ni, bɔbla siin na Katɔti anumi.

will be added

X\