2 KORINTOƑUƆ 3

1Ɔmɛni ulátina ka buukú lɛlɔ aani si bɔdi lɛla lɛdi. Buuuse aani bekyuli bamba bani mɔɔwia kakunkɛ kani medie-bu matina-mii. Na lɛni kani na buláwia ka bɔsu-mii bɔnii binweni kakunkɛ kadi na bidie-bu bɛtina bekyuli bamba badi. 2Ɔsika amii alati ndi bula kakunkɛ kani na Katɔti únweni ɔ́sia-mii kayi lɛlɔ. Na ukyuli biala ɔdubɔnu bula udu ɔti na bina lɛlɔ. 3Use nwaa ka Kristo ɔlati ɔ́sia-bu lɛlɔ na ɔ́ya na bɛ́ƒɔ bɛ́di. Anwuɔsu bise aani ɔku ɔni na únweni. Ɔɔɔdi unwenigyii na úti únweni ala ammɔ. Mmomu Katɔti Kɔyu ɔyikun na úti na únweni-nya ɔsia. Na ɔɔɔdi atabi lɛlɔ na únweni ɔ́sia aani kalɛ na ɔ́bla kukuuku, mmomu bekyuli kayi. 4Bɔ́kana bɔɔsu ɔmɛni na kenyekɔ kani na Katɔti úte-bu na Kristo ɔsu. 5Buuubo kenyekɔ kadi na abu alati lɛlɔ ka bɔbla kabla kamɛni. Mmomu Katɔti kudɔ na kási. 6Anwu úte-bu kenyekɔ ka bɔtina bekyuli kalɛ na badi bunyimi bɔwɔdi bɔni na Katɔti únyimi ku bekyuli mɛni lɛlɔ. Na bunyimi bɔwɔdi bɔmɛni bɔɔɔdanku ɔda bubo bɔkukudi bɔni na bénweni. Mmomu bɔdanku Katɔti Kɔyu. Ɔsika ɔda bubo bɔkukudi bɔmmɔ ni, bɔɔdú-bu kukpi kɔtɔ. Nsu Katɔti Kɔyu muute-bu ngba. 7Katɔti ɔda bubo bɔni na bénweni kukuuku mmɔ ni, bɔdi etemila ani na bánwi bámana atabi lɛlɔ. Na uwi ɔni na béti-nya béte bekyuli ni, Katɔti bukeye bɔ́ya na Mose anumi eekeye. Na ina ka bukeye bɔmmɔ bɔɔƒana na Mose anumi muedi ni, Israelƒuɔ bátakana na benye bataanu-nwu anumi. Na si ɔda bubo bɔni mɔɔdú-bu kukpi kɔtɔ bɔ́da bɔ́lɛ uwi ɔmmɔ ku Katɔti bukeye bɔmmɔ udu ni, 8nwuna Kɔyu ablala bɔdubɔda bɔlɛ ku bukeye bɔni ntulo budeedi bɔmmɔ ƒui! 9Na si ɔda bubo bɔkukudi bɔni muuti kɔtɔ bɔdu teete ukyuli bɔdanku bukeye bɔmɛni udu ni, ɔlɛka bɔti ka litemi buni lɛni mɔɔbla-bu siin ni, nina bukeye butulo budeedi ƒui. 10Bɔɔsu ɔmɛni ɔsika bukeye bunengudi ƒui bɔni kemo na bɔkya ɔmwi mɛni ni, bɔ́ƒɔ bukeye bɔkukudi bɔmmɔ ƒui. 11Na si lɛla lɛni na nina uwi ɔ́vi líkeye lɛni uwi ɔmmɔ kemo ni, bɛgyi bɛnii lɛla lɛwɔdi lɛni neeebo kawɔkɔ ni, nina bukeye butulo bɔmmɔ ƒui. 12Na ka bubo lɛnunsia na lɛla lɛwɔdi lɛni neeebo kawɔkɔ lɛlɔ ɔsu ni, anwuɔsu na buusé kayi taasu lɛla biala nwaa. 13Na abu buuuse aani Mose ɔni néti lɛdiku úbi anumi kalɛ na Israelƒuɔ balanu baláti ka Katɔti bukeye bɔni na nsia-nwu anumi bɔɔƒana. 14Sɔsɔ na ɔdi ka bana kasusu kalánu ɔmɛni taati. Use aani si lɛdiku lɛmmɔ udu kani lɛmua libi-ma kasusu lɛlɔ si baaká bunyimi bɔkukudi ɔku ɔmmɔ kemo etemila. Ɔsika lɛla lɛni kani na ndubɔya na lɛdiku lɛmmɔ lɛmami ndi si ukyuli úti lɛlɔ ɔ́mana Kristo. 15Sɔsɔ úti úbedu ku ɔmwi ni, si baaká Mose ɔda bubo ɔku kemo etemila ammɔ ni, use aani lɛdiku lɛmmɔ lɛmua libi-ma kasusu lɛlɔ na belenu-mu kalɔ. 16Nsu ni, aani kalɛ na Bunweni Kedee Ɔku kemo etemila aasu ni, si ukyuli únwini úbo Blɔti kudɔ ni, lɛdiku lɛmmɔ lɛɛmami-nwu kasusu lɛlɔ na uunú etemila ammɔ kalɔ. 17Na ɔƒɛni ni, Blɔti ɔni na bɔɔlɔ mɛni ni, anwu ndi Katɔti Kɔyu. Na kesii kani na Katɔti Kɔyu kɔkya ni, lɛla lɛdi lɛsɔ lilényimi ukyuli. 18Na abu baƒɔtaadine bani na lɛla lɛdi liiibi-bu anumi ni, bɔɔnu Blɔti bukeye nwaa. Na Blɔti ɔni ndi Katɔti Kɔyu mɛni ni, anwu mɔɔvumana-bu udu taabla nwuna udu kalɛ na buteekeye teebu.

will be added

X\