2 KORINTOƑUƆ 13

1Ɔmɛni ndi kɔtɛdi kɔni na ndubo-mii kudɔ mbanu-mii. Na Bunweni Kedee Ɔku kemo ni, bénweni banini, “Ɔdi ka nkyuli inyɔ ku kama bedie kenye na ukyuli ɔdi bɔƒiɔ lɛlɔ asa na badu-nwu kɔtɔ.” 2Muubó bekyuli bani nábla ekpidi bábavi ɔda ku babambadi ƒui lɛnɔ uwi ɔni na lɛɛɛkya-mii kudɔ mɛni. Lɛ́ɛsu-mii ɔmɛni ḿbavi na kunyɔdi kɔni na líbo-mii kudɔ. Na nsɔ mɔɔsu-mii ɔni na liiibo-mii kudɔ mɛni nnii si lɛ́sɔ líbo-mii kudɔ ni, ndubɔni bani ƒui mɔɔbla ekpidi kɔtu. 3Ka bɛɛwia bɛnu bɛti geen ka Kristo nkɛ-mi lɛlɔ ɔɔtɛmi ku-mii ɔsu ni, bɛdubɔnu lɛla lɛni na bɛɛwia! Ulése buɛɛ ulete-mii si Katɔti ɔɔní-mii kɔtu. Na bɛdubɔti ka ubo ɔyikun na bina akɔ sɔsɔ. 4Ina ka bákana Yesu bámana ugyii lɛlɔ na úkpi uwi ɔni kemo na use kpɛtɛ kpɛtɛ ni, Katɔti ɔyikun kemo na ɔ́sɔ ɔ́ta uli ngba. Na ka abu-ku Yesu bɔ́bla unwi ɔsu ni, buse kpɛtɛ kpɛtɛ aani kalɛ na anwu lɛnɔ use kpɛtɛ kpɛtɛ. Nsu bubo Katɔti ɔyikun ka bɔbla lɛla lɛni na ɔlɛka bɔbla na bina akɔ, ɔsika abu ku-nwu bulie na nwuna ɔyikun kemo. 5Amii alati biduo bina lɛlɔ kemo na bɛkɔku lɛlɔ bɛnu. Na bɛti si bɛkya bɔƒɔtaadi bɔmmɔ kemo. Bɛɛɛgyi ka Yesu Kristo ɔkya-mii lɛlɔ kemo? Bɛgyi nii! Ntu bɔnu na bɛ́nu bɛ́ti ka bina lɛlɔ bɔkɔku bútedu. 6Na lɛ́ƒɔ lɛ́di ka bɛdubɔnu bɔti ka abu búdu. 7Buuvele Katɔti bɔnii ɔda-mii na bilabla likpidi lɛdi. Na bulévele ɔmɛni kalɛ na buti bɔtina ka abu búdu na bula batalane kabla bɔbla kemo ɔsu. Mmomu bɔɔwia ɔmɛni kalɛ na amii bitaabla lɛla lɛni ndia si ina ɔ́lɛ aani abu bútabla bula kabla na kedu. 8Ɔsika bulakana bɔta bunye litemi geen lɛmmɔ lɛlɔ na ulu biala lɛlɔ, mmomu na bɔda-ni na lisie lɛtɔtɔ libu. 9Lɛlɔ lɛɛyɔ́-bu si bina bɔƒɔtaadi bɔɔyu ɔkplu, na use aani si bula ɔyikun ɔɔƒana na bina lɛlɔ. Na lɛla lɛni na buuvele ndi ka bɛlɛ lili bɛwɔlɔ. 10Muunweni-mii ɔku ɔmɛni uwi ɔni na liiibo-mii kudɔ mɛni, kalɛ na si líbo ḿbeduo-mii kudɔ ni, na naaani-mii kɔtu kpakplaa na kenyekɔ kani na Blɔti úte-mi kenye. Úte-mi kenyekɔ kamɛni kalɛ na bina bɔƒɔtaadi bɔkɔ katɔ bubu, na ɔɔɔdi kani maya na bɔyu kalɔ. 11Banwa, na kawɔlɔkɔ mɛni ni, binye momoomo na bɛlɛ lili bɛwɔlɔ. Na binu ala ani ƒui na lívele-mii na ɔku ɔmɛni kemo. Bɛbla unwi na bilieku lɛlɔ ku keyi buɛɛ, na Katɔti ɔni mɔɔyɔ́ bekyuli na ɔɔyá na keyi kaayɔ́ku-ma ni, ɔdubɔsiaku-mii. 12Bɛkya lɛlɔ kɔgbu aani banwa kalɛ. 13Katɔti baƒɔtaadine ƒui banii beegyele-mii o-o! 14Blɔti Yesu Kristo lɛƒɔndia ku Katɔti bɔyɔ ku Katɔti Kɔyu unwi bɔbla ɔsiaku bina ƒui.

will be added

X\