2 KORINTOƑUƆ 11

1Mɔɔwia ka bigyingya enu na bɛƒɔ-mi si ina bɛnu bɛnii lɛ́dɔlɔ. Buvele na nda-mii! 2Muukpó-mii lɛlɔ kogyulo teete Katɔti. Lívele-mii líte Kristo aani kalɛ na beevele adagyaa ɔni nse sɛɛn teete kɔgya. 3Nsu mɔɔyia ka ukisine ɔmmɔ ɔdububile-mii kasusu na bɛsɔ bilése sɛɛn na bɛsiaku Kristo lɛti kama. Lɛni na kɔlakpi kɔmmɔ kúti nwuna kɔkwɛ kukpidi kúbile Eva kasusu na ɔ́ya na ɔ́bla likpidi. 4Lɛni na bɛɛbabla teegyingya enu taaƒɔ ukyuli biala ɔni muubo taabasu-mii litemi lɛbambadi lɛni mɔɔvumana Yesu ɔni lɛlɔ lɛsa na bɔ́kɔ búte-mii udu. Na bɛɛƒɔ́ kɔyu ku litemi lɛni naaadi Katɔti Kɔyu ku bula litemi buni lɛmmɔ taadi. 5Nsu lɛ́ƒɔ lɛ́di ka lɛ́ƒɔ kuye ntulo bekyuli bani na biigyingya enu taaƒɔ aani si badi batalane babuni sɔsɔ. 6Ina kenye kátada-mii muedi ni, ɔɔɔdi Katɔti litemi na lɛɛɛgyi. Bɔ́ya na ɔmɛni ɔ́bla-mii nwaa na ulu biala lɛlɔ. 7Uwi ɔni na lɛ́ka litemi buni lɛmmɔ lɛsa bɔkɔ bute-mii ni, ńtakya-mii kayu kadi. Mmomu líboku lɛlɔ kalɔ kalɛ na lɛtalaku-mii katɔ. Na ɔni na lɛ́bla ɔmɛni ɔsu na lɛ́bla likpidi lɛdi? 8Egulabi ani na baƒɔtaadine lɛkpa bamba béyi básala ni, anya na lɛ́ƒɔ ńtaanu mina lɛlɔ uwi ɔni na lɛ́kya-mii kudɔ. Use aani si buyu na líyu-ma na liti libunku-mii. 9Uwi ɔni na lɛ́kya-mii kudɔ ni, mina lɛlɔ bɔnu bútasia-mii lɛlɔ si mɔɔyaki lɛla lɛdi. Banwa bani nási Makedonia néteete-mi kebunku na lɛla biala kemo. Na ńteti etila abambadi ńtasia-mii lɛlɔ na lɛɛɛdubo adi lɛnɔ buti bɔsia-mii lɛlɔ kudii. 10Nnye Kristo litemi geen lɛmmɔ lɛlɔ mɔɔsu nwaa ka naaayila kuƒi kɔni ɔsu na mɔɔkun lɛmɛnɛ na Akaia kalɛkɛ lɛlɔ kudii! 11Na bi ɔsu na nnii naaaƒɔ lɛla lɛdi na bina kudɔ? Ɔɔɔdi ɔni na naaayɔ-mii ɔsu. Katɔti ɔlati ɔgyi ka mɔɔyɔ́-mii. 12Ndubusie anumi na naaaƒɔ bina kebunku. Ɔmɛni ɔdubɔya na bani mɔɔlɔ lɛlɔ banii batalane ni, balákɛ kuƒi na bakun lɛmɛnɛ na basu banii ama lɛnɔ baabla kabla aani bula kalɛ. 13Bekyuli bammɔ baaadi batalane geen. Ɔkɔ batalane na badi, na baanyi ɔkɔ na bana kabla kemo. Bávumana bana lɛlɔ kalɛ na bekyuli banu-ma aani si Kristo batalane na badi sɔsɔ. 14Na ɔmɛni ɔɔɔdi lɛla lɛwɔdi, ɔsika Satan ɔɔvumana lɛlɔ na ɔɔbla aani Katɔti ɔtu ɔni ndanku Katɔti bukeye. 15Anwuɔsu ɔmɛni ɔɔɔdi lɛla lɛwɔdi uuute nwuna kama basiakune ka bavumana lɛlɔ babla aani Katɔti kabla bablane bani nse siin. Nsu kawɔlɔkɔ ni, Katɔti ɔdubo-ma kɔtu bɔni kalɛ na ɔ́manku. 16Nsɔ mɔɔsia kama lɛsu-mii nnii ɔdi utakali ɔnii lɛ́dɔlɔ. Nsu ina ɔdi wakali lɛni ni, amii biti-nwu lɛni kani kalɛ na ɔdia-mi na lɛkun lɛmɛnɛ blii. 17Na lɛla lɛni mɔɔsu mɛni ni, lɛɛɛdi lɛla lɛni na Blɔti úbo-mi ɔda ɔnii nsu. Ɔsika lɛmɛnɛ bɔkun litemi lɛmɛni kemo ni, ɔdubɔbla-mii aani ɔdɔlɔdi kalɛ. 18Nsu ka bekyuli pii baakun lɛmɛnɛ na kayawi ala lɛlɔ ɔsu ni, bɛya na ami lɛnɔ lɛkun lɛmɛnɛ lɛdi blii. 19Ka amii alati bɛ́da anu geen ɔsu na bɛɛtunaku badɔlɔdi bamɛni. 20Na bɛɛtunaku-ma si ɔdi úti-mii ɔ́bla nwuna kabla ɔblane iye ɔ́kɛ-mii lɛlɔ kɔsia kɔdi iye ɔ́kywɛ-mii kakpagyuɛ kadi iye baanu-mii kalɔ kalɔ iye ɔ́ƒiɛmi-mii ɔtugya muedi. 21Nsu abu ni, bɔɔyia ka bɔbla ala ammɔ udu. Munuu bɛɛbu bɛnii kɔƒa muukpó-bu? Nsu si ɔdi ɔkana kayi buse na ɔkun lɛmɛnɛ ni, ami lɛnɔ mbo kuƒi kɔmmɔ udu. Ala amɛni ƒui ese aani kɔnamutɛ, nsu ɔlɛka lɛsu. 22Si Hebriƒuɔ na badi ni, ami lɛnɔ anwu ndi. Na si Israelƒuɔ badi ni, ami lɛnɔ anwu ndi. Na si Abraham bawɔ lɛnɔ na badi ni, ami lɛnɔ anwu ndi. 23Kristo kabla bablane na badi? Ndi Kristo kabla ɔblane ntulo-ma. Báya na mɔɔtɛmi aani ukyuli ɔni muukpi libuo, nsu ɔdi litemi geen ka lɛ́bla Kristo kabla lítulo-ma. Bekyuli bani muukisi Kristo ni, bákya-mi aban ɔtɔ kɔlɛ kɔlɛ. Na bébo-mi lɛnɔ kɔlɛ kɔlɛ. Na líduo kukpi ku ngba ntɛ uwi pii. 24Kɔlɔ sɔɔn na Yudaƒuɔ bámii kɔbuli bébo-mi bɔka aavlatɛ yaalenwi. 25Na kɔtɛ na Romaƒuɔ bébo-mi kugyiimi. Na kunwi na bébo-mi atabi. Na kɔtɛ na ɔkɔlɔ bonwu ɔ́bwɛ ku-mii na lɛ́nu líduo ɛpu kemo. Na ɔmmɔ kemo ni, kunwi na ɛpu ntu bútiku-mi usien ku ɔƒɛ ƒui. 26Na mina ulu busie pii kemo ni, líduo ɔgbankpi lidu lidu kemo. Ketu keyi káda-mi kɔlɛ kɔlɛ, na líduo beyune enu kemo. Líduo ɔgbankpi kemo na mina badi bekyuli Yudaƒuɔ enu kemo ku bani naaadi Yudaƒuɔ lɛnɔ enu kemo. Líduo ɔgbankpi na lɛma linengudi kemo ku ketele kemo. Líduo ɔgbankpi na ntu anumi ku ɔkɔ baƒɔtaadine enu kemo. 27Lɛ́bla kabla kpakplaa lítu lɛlɔ kaduɛ. Ńtatɛ ńtalɛɛ usien pii. Na kɔka ku utukwɛ ɔ́da-mi, na adila ábɔ-mi uwi pii. Na kɔyɔ kɔda-mi, na ńtakɛ lɛla lɛni na libi lɛlɔ. 28Na ala pii amɛni kama ni, mina kasusu kalakɛ bɔnwuna ɔ́si baƒɔtaadine akpa ani nkya ekpo ekpo ɔsu. 29Si ɔdi ɔbla kpɛtɛ kpɛtɛ na kalɛ na ɔ́ƒɔ ɔ́di ɔsu ni, ɔɔyá na enu aaƒɛ-mi. Na si likpidi kemo na ɔdi úduo ni, ɔɔyá na ɔƒɛ ɔɔdá-mi. 30Si ɔdi ka lɛkun lɛmɛnɛ ni, nka ndubɔkun lɛmɛnɛ na ala ani muudie taatina kalɛ na lɛ́sɔ lɛlɔ. 31Katɔti ɔni ndi Blɔti Yesu Kristo Ɔti, na anwu na buumwi uwi ƒui ni, anwu ngyi geen ka ala ani mɔɔsu mɛni ni, sɔsɔ na adi. 32Uwi ɔni na lɛ́kya Damasko ni, aban unengu ɔni nákya Ɔga Areta kalɔ ɔ́wia ka uƒie-mi. Anwuɔsu úti bagyumanane útényene kowodu kɔni na bátu báka bámana ɔma ɔmmɔ kɔyakun. 33Nsu ni, kowodu kɔmmɔ liƒi na báyula-mi básiaku na kagyigyɛ kemo, na lɛ́lɛ-nwu enu kemo.

will be added

X\