2 KORINTOƑUƆ 10

1Ɔmɛni ɔsu ami Paulo ɔlati líti Kristo kayi buɛɛ ku lɛlɔ kalɔ buboku muuvele-mii geen nnii bise atu na binu. Muunú ka bekyuli badi baasu banii mina lɛku lɛni muunweni libo ogya si liiibo-mii kudɔ, nsu lɛ́ba na mina butemi kemo si nkya-mii kudɔ. 2Muuvele-mii nnii bitaya na libo-mii kudɔ mbatɛmiku-mii ku ogya. Ɔsika nsia ulu ndubo ku ogya mbadɔnku bina akɔ badi bani mɔɔnu-bu anumi banii kayawi kamɛni kasusu na bɔda bɔɔbla ala. 3Sɔsɔ na ɔdi ka kayawi kamɛni kemo na bɔkya bɔdi, nsu ɔɔɔdi kayawi kamɛni lɛlɔ kekpo udu na buukpó. 4Ɔsika ekpola ani na bɔda buukpó ni, aaadi kayawi kamɛni ekpola. Mmomu Katɔti ɔyikun na ɔdi na buti bɔɔdi ukisine ɔmmɔ kama kekpokɔ lɛlɔ. 5Bɔɔdi unyeƒi ku lɛla biala mɔɔtalaku lɛlɔ katɔ na liitile bekyuli kuƒi ka bati Katɔti lɛlɔ. Na buƒie kasusu biala na kasia Kristo ulu lɛlɔ. 6Na si uwi ɔni na bídie bɛ́tina ka bɛdi Kristo etemila lɛlɔ ƒui ni, ɔmmɔ kama ukyuli biala ɔni mata menye litemi lɛmɛni lɛlɔ ni, bɔdubɔni-nwu kɔtu. 7Ɔlɔna lɛlɔ kasusu kani na biiti. Si ukyuli ɔdi ɔ́ƒɔ lɛlɔ ɔ́di ka ɔdi Kristo ɔdi ni, ɔlɛka ɔnu-bu ɔti aani nwuna lɛlɔ kalɛ ka abu lɛnɔ bɔdi Katɔti ɔdi. 8Na si lɛ́kun lɛmɛnɛ líbu na kenyekɔ kani na bubo lɛlɔ ɔsu ni, Katɔti ulálɛ-mi kama. Ɔsika anwu néte-bu kenyekɔ kamɛni kalɛ na bina bɔƒɔtaadi bɔkɔ katɔ bubu. Na ɔɔɔdi kani maya na bina bɔƒɔtaadi bubo kalɔ. 9Naaawia ka bɛkali bɛnii liƒu na mɔɔkya-mii na mina lɛku lɛni na muunweni-mii kemo. 10Bina akɔ ɔdi ɔdubɔsu ɔnii muunweni lɛku kpakplaa lɛni etemila mbo unu. Nsu si nkya-mii kudɔ ni, lɛ́ba na mina etemila eeyile atu. 11Mɔɔyá na ukyuli ɔmmɔ ɔti ka ni, lɛla lɛni na bɔɔsu na lɛku kemo uwi ɔni na buuubo-mii kudɔ ni, ani kani na bɔɔbla si bɔkya-mii kudɔ lɛnɔ. 12Bulábabla taakɔku bula kenyekɔ taanu aani bekyuli bani mɔɔnu lɛlɔ katɔ katɔ. Bɔɔɔdi bana udu. Ama alati kasusu kenye na bada baanu lɛlɔ na bana akɔ ka badia. Nsu baaagyi lɛla lɛdi. 13Abu bubo ekpo ani na bɔɔkun lɛmɛnɛ taatáwɔ. Na bula lɛmɛnɛ bɔkun bɔɔwɔ́ ekpo ani na Katɔti ɔ́kɔku úte-bu. Na kesii kani na Katɔti ɔ́kɔku úte-bu kadanku amii lɛnɔ. 14Na ka bɛkya ekpo ani na Katɔti úti úte-bu kemo ɔsu ni, bútavia bula kenyekɔ. Ɔsika abu náka-mii kudɔ bubo ku Kristo litemi buni lɛmmɔ. 15Anwuɔsu bulákun lɛmɛnɛ na ukyuli bamba kabla lɛlɔ ɔni na ɔɔɔdi bula ekpo ani na Katɔti úte-bu. Mmomu bula anu asia ka bina bɔƒɔtaadi bɔkɔ katɔ bubu kalɛ na bɔkana na bɔbla ala enengudi na bina akɔ na kesii kani na Katɔti úte-bu kabla. 16Ɔmmɔ kama bɔkana na bɔsu litemi buni lɛmmɔ na ekpo bamba ani nkya bina kama lɛnɔ kemo. Na bulakun lɛmɛnɛ na kabla kani na ukyuli bamba ɔdi ɔ́bla na nwuna kakɛ lɛlɔ. 17Lɛni na bénweni bákya Bunweni Kedee Ɔku kemo banii, “Ukyuli ɔni mɔɔkun lɛmɛnɛ ni, ɔkun lɛmɛnɛ na lɛla lɛni na Katɔti ɔ́bla lɛlɔ.” 18Ɔsika ukyuli ɔni na Katɔti uumwi ni, anwu ndi lɛla lɛdi, na ɔɔɔdi ukyuli ɔni muumwi lɛlɔ.

will be added

X\