2 KORINTOƑUƆ 1

1Ami Paulo ɔni nkɛnku Katɔti lɛƒɔyɔ lɛlɔ na ndi Blɔti Yesu Kristo ɔtalane ni, ami ku Ɔnwa Timoteo muunweni ɔku ɔmɛni bute amii Korintoƒuɔ bani néti lɛlɔ bíte Katɔti ku bekyuli bani ƒui mɔɔbla Katɔti kabla na Akaia kalɛkɛ lɛlɔ mmɔ. 2Buuvele bɔnii Unwoti Katɔti ku Blɔti Yesu Kristo lɛƒɔndia ku keyi buɛɛ kasiaku-mii. 3Bɛya na bɔgya Katɔti ɔni ndi Blɔti Yesu Kristo Ɔti enu. Anwu ndi Ati ɔni mɔɔnu-bu kɔnyana, na nwuna kudɔ na kebunku kaasí. 4Anwu mɔɔsia-bu kɔnu na bula lɛbibo biala kemo, kalɛ na abu lɛnɔ bɔkana na bubunku bula bekyulikpana na bana lɛbibo biala kemo. Na kalɛ na Katɔti uubunku-bu ni, lɛni na abu lɛnɔ buubunku bekyuli. 5Ɔsika kalɛ na buubó abi geen ani udu na Kristo lɛnɔ úbo na Katɔti ɔ́sia-nwu kɔnu ni, lɛni kani na ɔkɛ bula unwi bɔbla ku Kristo na Katɔti lɛnɔ ɔɔsia-bu kɔnu geen. 6Uwi biala si ami ku mina banwani buubó abi ni, bɔɔkana na bɔkya-mii ogya na bɛkɛ bɔƒɔ lɛnɔ. Katɔti ɔɔsia-bu kɔnu uwi ɔni na buubó abi biala. Lɛni kani na ɔdubɔsia amii lɛnɔ kɔnu uwi biala kemo na biisé kayi teebo abi. 7Bubo lɛnunsia lɛni naaayuɛ na bina lɛlɔ, ɔsika bɔgyi ka kalɛ na biibó abi ani udu na abu lɛnɔ buubó mɛni ni, lɛni kani na Katɔti ɔdubɔsia-mii kɔnu aani kalɛ na ɔɔsia abu lɛnɔ kɔnu. 8Banwa, bɔɔwia ka bɔsu-mii abi ani udu na búbo na Asia kalɛkɛ lɛlɔ. Lɛbibo lɛmmɔ línwini etila líte-bu ɔni na bɔsɔ buuubo lɛnunsia lɛdi bɔnii bɔdubɔkɛ ngba muedi. 9Ɔ́bla-bu aani si kukpi kɔtɔ na bádu-bu! Nsu ɔmɛni úbo úte lɛni kalɛ na buti bula anu bɔsia Katɔti ɔni mɔɔgyila bekpine na baasɔ teebelie ngba lɛlɔ. Ɔɔɔdi abu alati bula lɛlɔ na buti anu bɔsia. 10Údie-bu ɔ́lɛku kukpi ɔgbankpi ɔmmɔ kemo. Na ɔdubudie-bu lɛnɔ. Sɔsɔ ni, nwuna lɛlɔ na bɔɔsia anu ka ɔdubo-bu buteedie lɛnɔ. 11Ɔlɛka amii lɛnɔ bibunku-bu na bɛkpali katɔ bite-bu. Ɔsika si bekyuli pii bákpali katɔ na Katɔti úbunku-bu ni, bekyuli pii badubɔgya Katɔti enu na kalɛ na úbunku-bu ɔsu. 12Lɛla lɛni ɔsu na bɔɔkun lɛmɛnɛ ndi ka bula kayi kaladu-bu kɔtɔ, ɔsika bɔ́da bula lɛlɔ kaduɛ na bekyuli ƒui akɔ. Na abu ku-mii kelie kakɛ Katɔti ulu lɛlɔ, na katɔlɔ keeebo-nwu kemo. Ɔɔɔdi kayawi kamɛni kemo lɛnunda na búti bulieku-mii lɛni, mmomu Katɔti lɛƒɔndia ku nwuna ɔyikun lɛlɔ na bɔ́sia. 13Ala ani na bɛkana bɔka na binu kalɔ ni, anya lɛti na buunweni teete-mii. Na lɛ́ƒɔ lɛ́di ka bɛdubunu ala amɛni kalɔ ƒui, 14aani kalɛ na bínu ekpo adi kalɔ. Na bɛdubunu kalɔ ka bɛkana bɛkun lɛmɛnɛ na bula lɛlɔ, na abu lɛnɔ bɔkun lɛmɛnɛ na bina lɛlɔ na limeyi lɛni na Blɔti Yesu Kristo wasɔ webo lɛlɔ. 15- 16Ka lɛ́ƒɔ lɛ́di ka bɛ́ƒɔ-mi ku kayi ƒui ɔsu ni, lɛ́bla kasusu kudeedi ka lɛka-mii kudɔ bubo bubavi na Makedonia asa na linwini libo kalɛ na bibunku-mi si lísela Yudea. Nka ɔmmɔ ndubɔya na bɛkɛ ebiti kunyɔ kunyɔ. 17Uwi ɔni na lɛ́bla mina kasusu ka lɛvumana bina kudɔ bubo ni, ɔmmɔ ulátina ɔnii mina ablala eeese siin. Na ɔɔɔdi kayawi kamɛni ala kakali kenye na líti mɔɔbla mina kasusu kammɔ aani ukyuli ɔni mɔɔbabla taasu ɔnii ɛɛn ku oowo. 18Mmomu kalɛ na Katɔti ɔɔdi nwuna etemila lɛlɔ geen ni, lɛni kani na lɛla biala na búnweni búmene-mii lise. Na lɛɛɛdi kalɛ na ukyuli ɔɔbabla taasu ɔnii ɛɛn ku oowo na ɔdi. 19Katɔti Ubidi Yesu Kristo ɔni lɛlɔ litemi lɛsa na ami ku Silvano ku Timoteo bɔɔkɔ́ teete-mii ni, ɔɔɔdi ɛɛn ku oowo ukyuli. Mmomu ɔdi ukyuli ɔni litemi ndi ɛɛn uwi biala. 20Ɔsika Katɔti kenye biala na úse-bu úse ni, kébo kéte lɛni na Yesu Kristo lɛlɔ. Ɔmmɔ ɔsu na bɔɔsu na nwuna lɛnyi kemo bɔnii, “Ɔsia lɛni.” Na buti bumwi bute Katɔti. 21Katɔti ɔ́ya na abu ku-mii ƒui bɔ́bla unwi ku Kristo, na anwu ɔlati náƒuna-bu úse ka butaabla nwuna kabla. 22Anwu nése-bu likpo úti ɔ́tina ka anwu mbo-bu uwi ɔni na úti nwuna Kɔyu ɔ́kya-bu lɛlɔ kemo. Na kuna lɛlɔ na búti bula kama búkpo na ala ani ƒui na ɔ́klibi úse úte-bu lɛlɔ. 23Katɔti ɔlati ɔgyi ka naaayɔ ka libo mbani-mii kɔtu. Na ɔmɛni ɔdubɔya na lɛla lɛdi lɛsɔ lilékpoku-mii ka ɔɔɔdi ɔmɛni ɔsu na lɛ́bla kasusu nnii neeebo Korinto tɔ. 24Ɔɔɔdi banii bɔɔdi-mii lɛlɔ na ala amɛni kemo. Bɔgyi geen kalɛ na bɛda bina bɔƒɔtaadi kpakplaa. Anwuɔsu abu ku-mii bɔɔsála taabla kabla na bɛkɛ ebiti.

will be added

X\