1 TIMOTEO 4

1Katɔti Kɔyu kuudie taasu-bu nwaa ka ni, asa na emeyi ekplodi adubudu ni, bekyuli badi badubɔlɛ bɔƒɔtaadi litemi geen lɛmɛni kama na basiaku ayu ekpidi katɔlɔ ku bani néti lɛlɔ béte ukisine ɔmmɔ ala bɔtina kama. 2Bekyuli bamɛni mɔɔtina ɔkɔ ala, na baabɛla ama alati bana likyulikpi, ɔsika bana kayi kaladu-ma kɔtɔ. 3Na baatina banii utalɛka bekyuli beti beleku. Na baasu banii batadi adila lidu lɛdi bene lɛnɔ. Nsu Katɔti nédie adila ƒui úse kalɛ na bani náƒɔ-nwu litemi geen bádi na basiaku-nwu kama ni, badi-nya ku linugya. 4Na sɔsɔ ni, lɛla biala na Katɔti údie ni, lɛdia. Anwuɔsu útalɛka bekyuli beni lɛdila lɛdi. Mmomu ɔlɛka baka Katɔti enu bɔgya na ana lili. 5Ɔsika Katɔti litemi ku bula linugya lɛ́bla adila ammɔ kedee. 6Si átina ƒula banwa ala amɛni ni, mmɔ na adubɔbla Yesu Kristo kabla ubunkune buni. Na bɔƒɔtaadi etemila amɛni ku bula ala bɔtina bɔni kama na asia ni, anya muute-ɔ kenyekɔ kamɛni. 7Anwuɔsu da lɛlɔ mami kɔbɔ ala batɛmine ku atɛ keeke ani neeebo kɔsia lɛlɔ. Na ataatɛya Katɔti etemila na asiaku-nya kama kpakplaa, na elie ngba buni aani ɔƒɔtaadine kalɛ. 8Ɔlɔna lɛlɔ ɔkplu ɔdia bɔdi, nsu kalɛ na baatɛya Katɔti etemila kama bɔsiaku bubo kɔsia butulo ƒui. Ɔsika uute-ɔ kɔsia na ngba bɔmɛni ku kekpima ngba lɛnɔ kemo. 9Ɔmɛni ɔdi litemi geen lɛni na ɔlɛka ukyuli biala ɔƒɔ ɔdi. 10Ɔmɛni ɔsu na bunye kabla lɛlɔ kpakplaa na buubó abi. Ɔsika bula anu asia ngba ƒui Katɔti ɔni ndi bekyuli ƒui Ɔƒɔne lɛlɔ. Na bani geen na ɔdubo bɔƒɔ ndi bani náƒɔ-nwu bádi. 11Na ala amɛni na ɔlɛka atina-ma. 12Taya na ukyuli ɔdi ɔnu-ɔ ɔnii ásɔ ka adi ɔnamu ɔsu. Mmomu ni, nwini kanu te baƒɔtaadine bammɔ ƒui na ƒula kɔtɛ ku udu ku ƒula bekyuli bɔyɔ ku bɔƒɔtaadi kemo ku ƒula kedee bulie lɛnɔ kemo. 13Nye kpakplaa na ataaka Katɔti litemi lɛmmɔ na ataakɔ-ni lɛsa teete baƒɔtaadine ƒui. Na eteedie-ni kalɔ na ataatina-ma ala ammɔ wetédu uwi ɔni na mebo. 14Na Katɔti Kɔyu kemo kabla etela ani na úti ɔ́kya-a lɛlɔ kemo ɔkɛnku nwuna kenye bediene ku baƒɔtaadine benengu bani néti enu básia-a lɛlɔ ni, tada-nya aya. 15Ya na ƒula kasusu kasia ɔmɛni lɛlɔ, na ataabla-nya taasia kama kalɛ na bekyuli ƒui banu ƒula ngba buni bulie lɛtɔtɔ busie bati. 16Da lɛlɔ kaduɛ ku ala ani na aatina. Nye kabla kammɔ lɛlɔ kpakplaa. Ɔsika si ábla lɛni ni, adubudie awɔ ku bekyuli bani ƒui muunú ƒula litemi lɛmmɔ alɛku kɔtu bɔni kemo.

will be added

X\