1 TESALONIKAƑUƆ 5

1Banwa, útalɛka linweni-mii lɛla lɛdi ɔ́si uwi iye emeyi ani na ala amɛni adubɔlɛ lɛlɔ. 2Ɔsika amii alati bɛgyi geen ka Blɔti limeyi lɛmmɔ lɛdububo aani kalɛ na uyune uuyú ukyuli taatu usien. 3Na uwi ɔni kemo na bekyuli baasu banii lɛla biala lɛ́ɛtɛ ni, uwi ɔmmɔ geen na ɔgbankpi adubɔlɛku-ma ɔni na baaagyi beeese. Ɔdububo aani kalɛ na kawɔƒɔ kaadu ɔƒɔdane. Na kekelikɔ kadi keeebo. 4Nsu ni, banwa, amii bɛɛɛkya lɛdisa kemo. Anwuɔsu limeyi libendi lɛmmɔ liléyu-mii lilatu aani uyune kalɛ. 5Ɔsika bina ƒui bɛkya bukeye kemo. Na bɔɔɔdi aani bekyuli bani náƒɔ lɛlɔ bákya likpidi kemo na baabla ala taabɛ. 6Anwuɔsu bitaya na bɔlɛɛ na budie lɛlɔ atu aani ama bani naaagyi Blɔti. Mmomu bɛya bunye kagyumana na bɔda lɛlɔ kaduɛ. 7Ɔsika ama bani mɔɔlɛɛ ni, usien na baalɛɛ. Na ama bani muukpi ntɛ ni, usien na beekpi-mu. 8Nsu abu bani nkya bukeye kemo ni, bɛya na bɔda lɛlɔ kaduɛ. Na buti bula bɔƒɔtaadi ku bula bɔyɔ butaagyumana lɛlɔ aani kalɛ na kekpo adala aagyumana ukpone. Na butaasia anu ka Blɔti ɔdubɔƒɔ-bu, aani kalɛ na kekpo kabwa kaagyumana ukpone lili. 9Ɔsika Katɔti útedie-bu ɔnii nwuna kɔnyi kubo-bu lɛlɔ. Mmomu ɔnii bɔsia Blɔti Yesu Kristo lɛlɔ na bɔkɛ bɔƒɔ. 10Yesu ɔmɛni nékpi na bula lili ɔni na si bulie o-o, si bukpi o-o ni, bɔdubulie ku Blɔti na nwuna bɔsɔ bubo kemo. 11Ɔmɛni ɔsu ni, bitaakya lɛlɔ ogya na biteebunku lɛlɔ aani kalɛ na biwi-nwu lɛlɔ ɔƒaani. 12Banwa, buuvele-mii bɔnii biti ɔbu geen bite bina batɔnkune bani mɔɔtina-mii Kristo ngba bulie ala lɛlɔ. 13Bɛyɔ-ma na bɛbu-ma kaduɛ na bana ulu ɔbuni ɔni na béti-mii baasiaku ɔsu. Na bilieku lɛlɔ ku keyi buɛɛ. 14Lɛnɔ ni, banwa, bɔɔwia kpakplaa ka bɛkɛ litemi bɛsu bakɔsɔne. Na bɛkya bani na liƒu lɛɛda ɔkplu. Na bibunku bani mɔɔwia kebunku. Na bɛkɛ kayi buɛɛ bite ukyuli biala. 15Bɛnu kaduɛ na ɔdi uteti likpidi utaƒɔ likpidi kayu. Mmomu uwi biala kemo ni, bitaabla lɛbuni teete lɛlɔ ku bekyuli ƒui. 16Bɛya na lɛlɔ litaayɔ-mii uwi biala. 17Bitaya na enu aƒɛ-mii na katɔ bɔkpali kemo. 18Na biti enugya bite Blɔti na lɛla biala kemo. Ɔsika amɛni ndi ala ani na Katɔti ɔɔwia taasiku amii bani ƒui nsiaku Yesu Kristo kama. 19Bitetile Katɔti Kɔyu ɔyikun ulu na bina akɔ. 20Biteni Katɔti kenye bediene ala kalɔ budie aani lɛla keeke. 21Mmomu bɛwia lɛla biala kalɔ binu na bɛsiaku lɛbuni kama. 22Bɛda lɛlɔ bidie likpidi ulu biala lɛlɔ. 23Na buuvele Katɔti ɔni muute-bu keyi buɛɛ bɔnii ɔbla-mii kedee na ulu biala lɛlɔ. Na ɔgyumana bina kɔyu ku kasusu ku ɔlɔna ƒui kalɛ na bɛlɛ kɔtɔ bɔdu kemo uwi ɔni na Blɔti Yesu Kristo wasɔ webo. 24Na Katɔti ɔni nálɔ-mii ɔnii binwini nwuna bekyuli ni, ɔdububunku-mii utédu kawɔlɔkɔ. Ɔsika lɛla lɛni na ɔ́nya ɔ́su ka wabla ni, ani kani na ɔdubɔbla. 25Banwa, bitaakpali katɔ na bula lili. 26Bɛkya lɛlɔ kɔgbu na bigyele lɛlɔ ku kaƒɔ ƒaa. 27Mɔɔsu-mii kpakplaa aani Blɔti Yesu Kristo kenye unyene nnii bɛka ɔku ɔmɛni bite baƒɔtaadine bammɔ ƒui. 28Muuvele Blɔti Yesu Kristo nnii ɔda-mii kɔkɔɔkɔ na nwuna lɛƒɔndia kemo.

will be added

X\