1 TESALONIKAƑUƆ 4

1Banwa, mina lɛla likplodi lɛni muuvele-mii ndi ka ni, bilie ngba bɔni mɔɔyɔ́ Katɔti kaƒɔ aani kalɛ na bɔ́tina-mii. Bɛdaku ɔkplu bɔkya bɔdi, nsu bɔɔkya-mii ogya na Blɔti Yesu lɛnyi kemo bɔnii bɛbla bitulo lɛni. 2Ɔsika bɛgyi ala ani na bɔ́tina-mii ɔkɛnku Blɔti Yesu ɔyikun kemo. 3Katɔti ɔɔwia ka bɛbla lɛlɔ kedee na bɛda lɛlɔ bidie lɛsɔnɔdi kemo ƒui. 4Ɔnana biala ku ulekudi bati lɛlɔ bɔda kaduɛ na belie ngba kedee. 5Na bitasiaku ɔlɔna emini kama aani bekyuli bani naaayia Katɔti kalɛ. 6Ɔkɛnku ɔmɛni lɛlɔ ni, ɔdi biala lɛnumi litegyie na ɔnwani ulekudi lɛlɔ kalɛ na waƒiɔ-nwu. Bɔ́su-mii na bɔ́lɛ-mii na ɔmɛni lɛlɔ búse kpakplaa ka ni, Blɔti ɔdubɔni bani mɔɔbla ala amɛni kɔtu geen. 7Katɔti ɔ́lɔ-bu ka bɔbla bekyuli kedee. Anwuɔsu bɛya bɔda lɛlɔ budie kɔbɔ ala bɔbla kemo. 8Anwuɔsu si bina akɔ ɔdi útadi ɔmɛni lɛlɔ ni, ɔɔɔdi bekyuli lɛlɔ na ɔ́ta únye. Mmomu Katɔti ɔni néti nwuna Kɔyu úte-mii lɛlɔ na ɔ́ta únye. 9Na bina banwa baƒɔtaadine lɛlɔ bɔyɔ ni, útalɛka bunweni-mii lɛla lɛdi na ɔmmɔ lɛlɔ. Ɔsika Katɔti ɔ́tina-mii ɔmɛni ƒui. 10Na sɔsɔ ni, ɔdi litemi geen ka bɛɛyɔ́ bina banwa baƒɔtaadine bani nkya Makedonia. Nsu bɔsɔ buuvele-mii bɔnii bɛbla bitulo lɛni! 11Bilie ngba ku lɛlɔ kalɔ buboku, na ɔdi biala anu asia nwuna kabla lɛlɔ, na biti bina enu bɛwia bina lɛdila aani kalɛ kani na bɔ́su-mii. 12Ɔmɛni ndubɔya na bani nátaƒɔ bátadi bataaƒalɛ-mii na bilayaki lɛla lɛdi. 13Banwa, bɔɔyɔ́ ka bɔsu-mii lɛla lɛni ndubɔlɛku bekyuli bani néekpi, kalɛ na biléteewulo kɔnyana aani bekyuli bani neeebo lɛnunsia. 14Bɔ́ƒɔ bɔ́di ka Yesu úkpi na ɔ́sɔ ɔ́ta uli ngba na ɔdubɔsɔ ɔsi katɔ mmɔ ubo lɛnɔ. Anwuɔsu bɔ́ƒɔ bɔ́di ka baƒɔtaadine bani ƒui nékpi ni, badubɔsɔ bata. Na Katɔti ɔdubɔsia Yesu ɔmmɔ kani lɛlɔ na ɔƒɔ-ma na bebelieku-nwu ngba. 15Lɛla lɛni na Blɔti ɔɔtina ni, nina lɛlɔ na bunye bɔɔsu-mii ka ni, abu bani nli ngba na Blɔti bɔsɔ bubo kemo ni, bulaka bani néekpi katɔ busie. 16Uwi ɔmmɔ kemo ni, bɔdubunu Blɔti bubo kɔku ku kudu kubendi. Bɔdubunu Katɔti ɔtu unengudi lɛdi. Na Katɔti kakpɛɛ kadubɔku. Na Blɔti ɔlati ɔdubɔda ɔlɛ kayaa. Na bekyuli bani náƒɔ Kristo bádi asa na békpi ni, badubɔka bɔta buli ngba. 17Ɔmɛni kama ni, Katɔti ɔdubutiku abu bani nébu buli ngba na uti-bu utásalaku bekyuli bani náta na butásiaku Blɔti na kayaa. Na bɔdubulieku Blɔti uwi ƒui. 18Anwuɔsu biti etemila amɛni bitaasia lɛlɔ kɔnu.

will be added

X\