1 TESALONIKAƑUƆ 3

1Na ka bina takana tɔ bɔnu lɛƒɛda lítulo-bu ɔsu ni, bɔ́tuna bɔnii bula inyɔ bɔɔsɔ bɔkya Atene. 2Na bɔtala Timoteo na ubo ubakya-mii ɔkplu, na ubunku-mii na bina bɔƒɔtaadi kemo. Anwu ndi bula ɔnwa ɔni muubunku-bu na Katɔti kabla ku Kristo litemi buni lɛmɛni bɔsu kemo. 3Bɔ́bla lɛni ɔsika buláwia ka bukpoku bɔmɛni bɔƒɛ ɔdi enu. Amii alati bɛgyi bise ka bukpoku bɔmɛni buse bute Kristo kama basiakune ƒui. 4Bɛdubunyimo ka uwi ɔni na bɔkya-mii kudɔ ni, bɔ́lɛ-mii ɔmɛni lɛlɔ búse ka bukpoku bɔmɛni bɔdububo. Na aani kalɛ bɛgyi ni, úbo lɛni sɔsɔ. 5Ala amɛni ɔsu na lɛ́tala Timoteo nnii ubanu si bɛmua bɛda bɔƒɔtaadi bɔmmɔ kpakplaa. Ɔsika litemi lɛmɛni liléte-mii bɔlɛɛ. Na mɔɔyia ka ɔƒɛni kalɛ ukisine ɔmmɔ úbo úbeƒu-mii kasusu na bula lɛbibo ƒui lɛ́bla keeke. 6Nsu Timoteo ɔ́sɔ úbo ku kubiti úbasu-bu ka bina bɔƒɔtaadi ku bina bakpana bɔyɔ bútavumana. Mmomu bɛɛkali-bu geen na binye kuƒi bɛɛyɔ́ ka bɛnu-bu aani kalɛ abu lɛnɔ bɔɔwia-mii bɔnu. 7Ɔmɛni ɔsu ni, banwa, ina ka buubó abi na ala amɛni ényimi-bu muedi ni, bina bɔƒɔtaadi bɔɔkya-bu kubiti na kayi kaayɔ́-bu. 8Ɔƒɛni na bula ngba bulie bɔ́sɔ bɔ́bla ɔwɔdi, ɔsika búnu kalɛ na binye kpakplaa na Blɔti bɔƒɔtaadi lɛlɔ. 9Bulakana Katɔti enu bɔgya na bina lili na wedu ebiti ani na úte-bu na amii ɔsu. 10Buuvele Blɔti kpakplaa usien ku ɔƒɛ bɔnii ɔya na bɔsɔ bɔsa na bɔkya-mii bɔƒɔtaadi unu. 11Na ɔƒɛni ni, Unwoti Katɔti ɔlati ku Blɔti Yesu balɛmi ulu bete-bu na bubo-mii kudɔ. 12Na Blɔti ɔya na bina bɔyɔ bɔni bibo bite lɛlɔ bumomo bubu. Na bɛyɔ bekyuli bamba lɛnɔ aani kalɛ na bɔɔyɔ́-mii. 13Ɔmɛni ndubɔya na Unwoti Katɔti ɔkya-mii ɔkplu na uveli-mii lɛlɔ ekpidi ƒui na ɔbla-mii kedee na nwuna anumi ute limeyi lɛni na Blɔti Yesu Kristo wasɔ webo kayawi kamɛni ku nwuna badi kedee.

will be added

X\