1 PETRO 5

1Muuvele amii bani ndi baƒɔtaadine benengu na bina akɔ, ɔsika ami ɔlati lɛ́nu kalɛ na Kristo úbo abi na muudie ɔmmɔ kenye. Na mina anu asia ka ami ku-nwu bɔdubɔdi lɛga na nwuna bukeye bɔmmɔ kemo na uwi ɔni na wasɔ webo. 2Na mɔɔsu-mii nnii bɛda bina baƒɔtaadine bani na Katɔti úti úte-mii kaduɛ aani kalɛ na baƒonu ɔdane ɔɔnu nwuna baƒonu lɛlɔ. Bɛda-ma aani kalɛ na Katɔti ɔɔwia, na utabla aani si ukyuli ɔdi nnye-mii lɛlɔ. Na bitabla kabla kammɔ na lɛyuƒɔla ɔsu, mmomu ka bɛɛyɔ́ ka bibunku bekyuli ɔsu. 3Bitanya bekyuli bani lɛlɔ bɛɛnu bitamana, mmomu bɛbla bekyuli bani na banu-mii udu batɛya. 4Na uwi ɔni na Kristo ɔni ndi Baƒonu Ɔdane Unengudi ƒui wada walɛ ni, na wete-mii kagabwa kani muukeye na kana udu ulávumana. 5Lɛni kani na ɔlɛka amii bani ndi baƒɔtaadine bawɔdi lɛnɔ biboku lɛlɔ kalɔ bite baƒɔtaadine benengu bammɔ. Na bina ƒui bɛda lɛlɔ na biboku lɛlɔ kalɔ na biteebunku lɛlɔ. Ɔsika Bunweni Kedee Ɔku ɔɔsu ɔnini, “Katɔti uléte bekyuli bani mɔɔtalaku lɛlɔ katɔ kuƒi. Mmomu uubunku bani muuboku lɛlɔ kalɔ.” 6Anwuɔsu bɛya na Katɔti ɔyikun utaadi-mii lɛlɔ. Na watalaku-mii katɔ na uwi ɔni lɛlɔ na ɔɔyɔ́. 7Biti bina ala ani muukpóku-mii ƒui bɛkya Katɔti enu kemo, ɔsika anwu uuti-mii lɛlɔ kasusu uwi biala. 8Bɛda kayi bɛva kalɔ buɛɛ na binye kagyumana! Ɔsika bina ukisine ɔni ndi ɔbɔnsamu mmɔ ɔsiaku-mii aani gyata ɔni nkɛ mɔɔva taavi na ɔɔwia ukyuli ɔni na uƒie. 9Binye kpakplaa na bina bɔƒɔtaadi kemo na bitile-nwu kuƒi, ɔsika abi amɛni udu kani na bina bakpana baƒɔtaadine bani nkya kayawi mɛni ƒui beebó. 10Na si bíbo abi ammɔ uwi klukui ɔdi kama ni, Katɔti ɔni kaƒɔ ndia geen na ɔ́lɔ-mii ɔnii bibelie ngba ƒui na nwuna bukeye kemo ɔkɛ Blɔti Yesu Kristo ɔsu ni, ɔsɔ ɔdubɔbla-mii kedee, na ute-mii ɔyikun, na bɛsɔ binye kpakplaa. 11Anwu mbo ɔyikun úsela ƒui. Ɔsia lɛni. 12Silvano ɔni na mɔɔbu aani ɔƒɔtaadine ɔnwa ɔni mɔɔdi bɔƒɔtaadi bammɔ lɛlɔ geen ni, anwu nébunku-mi na búnweni ɔku klukui ɔmɛni buute-mii. Na mɔɔwia ka lɛkya-mii ogya na lidie kenye lɛsu-mii ka ni, ala ani lɛlɔ na línweni ɔku ɔmɛni lɛ́siku ni, adi kalɛ na Katɔti kaƒɔ kadia kete-bu. Anwuɔsu binye kpakplaa. 13Bina baƒɔtaadine bakpana bani lɛnɔ na Katɔti ɔ́ƒuna na Babilon kalɔ lɛlɔ ku Marko banii beegyele-mii o-o. 14Bɛkya lɛlɔ kɔgbu bɛtina ka bɛɛyɔ́ lɛlɔ na bigyele lɛlɔ. Keyi buɛɛ kasiaku amii bani ƒui náblaku Kristo unwi.

will be added

X\