1 PETRO 3

1Na amii beleku lɛnɔ ni, ɔlɛka biboku lɛlɔ kalɔ bite bina bagya. Ɔmɛni ndubɔya na si ɔdi útaƒɔ útadi ni, ɔdubuti lɛlɔ ute Katɔti ɔkɛnku bina udu buni ɔsu. Na ɔɔɔdi ɔni na bitemi bite-ma. 2Mmomu ama alati badubɔnu kalɛ na bina udu use sɛɛn ku lɛlɔ kalɔ buboku. 3Bitatina bina bɔdia na ala ani na bɛɛda ku kalɛ na biinyimi lili linwini iye asɛɛ ku adala ani bɛɛkya kemo. 4Mmomu ni, bɛya na kalɛ na bɛda lɛlɔ ku udu buɛɛ udie bina bɔdia ɔtina. Ɔmɛni ndi udu ɔni mɔɔda kubiti uwi biala na ɔ́ƒɔ Katɔti kuye geen. 5Lɛni kani na kuuku beleku bani néti lɛlɔ básia Katɔti lɛlɔ báda bana adala, na béboku lɛlɔ kalɔ béte bana bagya. 6Sara ɔ́bla lɛni, ɔsika únu Abraham litemi na ɔ́lɔ-nwu ɔnii, “Mina unwoti.” Bɛdubunwini Sara ɔmɛni bebi belekubi geen si bilie ngba bɔbuni na enu aláƒɛ-mii si lɛla lɛdi liikpóku-mii. 7Amii bagya lɛnɔ ni, bɛya ala kalɔ bunu bɔkya amii ku bina beleku ntɛ, ɔsika beeebo ɔyikun aani bina kalɛ. Biti ɔbu bite-ma, ɔsika amii ku-ma ƒui na Katɔti ɔ́su úse ka ɔdubuti ngba bɔni nsɔ naaadubo bɔsa kudii ute. Na si amii bagya bɛ́bla ɔmɛni ni, Katɔti ɔdubunu bina ƒui katɔ bɔkpali. 8Na ɔmɛni kawɔlɔkɔ ni, bina ƒui bɛkɛ kɔyu kemo kasusu kenwi bɛyɔ lɛlɔ aani banwani kalɛ na bɛnu ɔdi biala kɔnyana, na biboku lɛlɔ kalɔ bite lɛlɔ. 9Biteti likpidi bitaƒɔ bani mɔɔbla-mii ekpidi kayu, iye bidumi bani muudumi-mii. Na mmomu bivele Katɔti na ute-ma keyi buɛɛ. Ɔsika ɔmɛni na Katɔti ɔɔwia ka bɛbla. Na ɔ́su bula ƒui úse ka ɔmɛni ɔsu na ɔdubute-bu keyi buɛɛ. 10Bunweni Kedee Ɔku ɔɔtina ɔnii, “Ukyuli ɔni mɔɔwia ka ulie ngba na lɛlɔ litaayɔ-nwu na nwuna ngba emeyi ayɔku-nwu buɛɛ ni, utataalɔ bekyuli anyikpi na utataanyi ɔkɔ lɛnɔ. 11Ɔda likpidi bɔbla ɔya na utaabla lɛbuni, na ɔsia ulu biala lɛlɔ na nwuna kayi kabla ƒaa ku bekyuli ƒui. 12Ɔsika Katɔti ɔɔnu bekyuli bani nse siin lɛlɔ, na uunú bana bɔkpali. Nsu bekyuli bani mɔɔbla likpidi ni, bana lɛlɔ liláda Katɔti ebiti.” 13Si anumi eegyie-mii ka bɛbla lɛbuni uwi biala kemo ni, ɔma ndubukpoku-ɔ? 14Nsu si eebó abi adi na lɛbuni lɛni na aabla ɔsu ni, ya na lɛlɔ litaayɔ-ɔ. Tayia bekyuli bammɔ, na kayi lɛnɔ ketekpoku-ɔ. 15Mmomu bitaabu Kristo aani Blɔti. Na si ukyuli ɔdi uuye-mii lɛla lɛni lɛlɔ na bɛsia anu lɛni ni, binye kagyumana na bidie lɛlɔ kenye. Nsu bɛbla ɔmɛni ku udu buɛɛ ku lɛlɔ kalɔ buboku. 16Bɛya na bina kayi kemo keteese ƒaa uwi biala kalɛ na si beedumi-mii ka bɛsiaku Kristo kama ni, na kɔƒa kukpo bekyuli bani mɔɔlɔ-mii anyikpi mmɔ. 17Ɔdia si biibó abi na lɛbuni lɛni bɛɛbla ɔsu si Katɔti lɛnɔ ɔ́tuna lɛni utulo si biibó abi na ala ekpidi ani na bɛɛbla ɔsu. 18Ɔsika Kristo ɔni nse siin ni, úkpi na bekyuli bani neeese siin lili. Na kunwi kɔni kani na úkpi mmɔ ni, ɔ́ƒɔ ala ekpidi ƒui kayu na ɔ́klibi abu ku Katɔti ntɛ. Bekyuli bádu Kristo. Nsu ɔkɛnku Katɔti Kɔyu lɛlɔ ni, Katɔti ɔ́sɔku-nwu úboku ngba. 19Na Kɔyu kemo na Yesu úsie útébo nwuna lɛlɔ bɔdi kudu úte ayu ani nkya kekpine. 20Ama ndi bani nétenu Katɔti bɔlɛ uwi ɔni na ɔ́kɛku-ma kayi na Noa ɔkya ɔɔnwí nwuna ɔkɔlɔ ubendi ɔmmɔ. Nkyuli ɛlɛɛ bani bumomo mabla aani nkyuli maane kani nákɛ ngba na ntu búteti-ma. 21Na ɔmmɔ mɔɔtina-bu lɛla lɛni na bula ngba bɔƒɔ ntu bɔkpila ɔdi ɔmɛni ɔdanku. Ɔɔɔdi ɔlɔna lɛlɔ bɔkpi na ɔdi, mmomu ɔkɛnku kenye kani na búse búte Katɔti ku kayi kani nse sɛɛn lɛlɔ na ɔdi. Katɔti ɔɔƒɔ́-bu ɔkɛnku kalɛ na bɔ́ƒɔ Yesu Kristo bɔsɔ bɔta bɔlɛ bekpine akɔ bɔ́di ɔsu. 22Kristo ɔmɛni nésie katɔ na ulie Katɔti kɔdianu. Na katɔ batu ku lɛlɔ badine ku kayaa bayikune ƒui bakya-nwu kalɔ.

will be added

X\