1 YOHANE 5

1Bekyuli bani ƒui náƒɔ bádi ka Yesu ndi Ukyuli Ɔƒunadi ɔmmɔ ni, badi Katɔti bebi. Na alakana ubi ɔti bɔyɔ na ekisi nwuna bebi! Anwuɔsu si aayɔ́ Katɔti ni, aayɔ́ nwuna bebi lɛnɔ. 2Na dɛ na bɔdubɔnu bɔti ka bɔɔyɔ́ Katɔti bebi? Bɔɔnu ɔmɛni taati si bɔɔyɔ́ Katɔti na bɔɔdi nwuna etemila lɛlɔ. 3Na dɛ na bɔɔnu bɔti ka bɔɔyɔ́ Katɔti? Bɔɔnu ɔmɛni taati si bɔɔdi nwuna etemila lɛlɔ. Na nwuna etemila eeese aani etila ani nétulo-bu. 4Ɔsika Katɔti ubi biala ɔɔkana na ɔɔdi kayawi lɛlɔ. Na bɔƒɔtaadi ndi lɛla lɛni na buuti taadi kayawi lɛlɔ. 5Nsu ukyuli ɔdi ulakana kayawi lɛlɔ bɔdi amu ntu ɔ́ƒɔ ɔ́di ka Yesu ndi Katɔti Ubidi ɔmmɔ. 6Yesu ɔmɛni ndi Ukyuli Ɔƒunadi ɔni nébo kayawi, na bɔ́nu-nwu bɔ́ti ɔkɛnku ntu bɔkpila ɔdi ɔni na ɔ́ƒɔ ku nwuna ubugya ɔni néwi kalɔ lɛlɔ ɔsu. Na ɔɔɔdi ntu lɛti pɛ lɛlɔ na ɔkɛ úbo, mmomu ntu ku ubugya ƒui lɛlɔ. Na Katɔti Kɔyu muudie-nwu kenye na ulu lɛlɔ. Ɔsika Kɔyu kɔmmɔ ablala ƒui adi litemi geen. 7Ala ani muudie-nwu kenye mmɔ ebo atɛ. Na anya ndi 8Katɔti Kɔyu ku ntu ku ubugya ɔni lɛlɔ na ɔ́sia úbo mmɔ. Na kenye budie ɛtɛ bɔmɛni ƒui buse unwi. 9Bɔɔƒɔ́ ukyuli kenye budie taadi bɔdi. Nsu Katɔti kenye budie na ulu ɔmmɔ lɛlɔ ni, bɔdia butulo. Ɔsika kenye budie bɔmmɔ bɔdi Katɔti ɔlati bɔdi na Ubidi lɛlɔ. 10Anwuɔsu ukyuli ɔni náƒɔ Katɔti Ubidi ɔmmɔ ɔ́di ni, ɔgyi geen na nwuna kayi kemo ka kenye budie bɔmmɔ bɔdi litemi geen. Nsu ukyuli ɔni nátaƒɔ Katɔti útadi ni, ɔɔnu Katɔti aani ɔkɔ ɔnyine, ɔsika útaƒɔ ala ani na Katɔti ɔ́su ɔ́siku Ubidi ɔmmɔ lɛlɔ útadi. 11Na kenye budie bɔni na bubo ni, amu ndi ka Katɔti úte-bu ngba bɔni nsɔ naaadubo bɔsa kudii. Na uute-bu ngba bɔmɛni ɔkɛnku Ubidi kudɔ. 12Ukyuli ɔni mbo kɔna ku Ubidi ɔmmɔ ni, ubo ngba bɔmɛni. Na ukyuli ɔni neeebo kɔna ku Katɔti Ubidi ɔmmɔ ni, uuubo ngba bɔmmɔ. 13Muunweni ɔku ɔmɛni lite amii bani mbo ngba bɔƒɔ lɛnunsia na Katɔti Ubidi Yesu lɛnyi kemo kalɛ na bɛti ka bibo ngba bɔni nsɔ naaadubo bɔsa kudii. 14Bɔgyi nwaa ka si buuvele Katɔti lɛla biala na nwuna bɔyɔ kenye ni, uunú-bu bɔkpali. 15Na si bɔgyi ka uunú-bu lɛla biala na buuvele-nwu ni, bɔgyi geen ka ala ani buuvele taasiku-nwu kudɔ mmɔ éenwini bula ɔdi. 16Si ɔdi ɔ́nu ka nwuna ɔnwa ɔƒɔtaadine ɔ́bla likpidi lɛdi lɛni na lilákpanku-nwu taatákya kukpi ƒui kemo ni, ɔkpali katɔ na nwuna lili na Katɔti ɔdubute-nwu ngba. Na ɔmɛni use ute bekyuli bani na bana ekpidi alákpanku-ma taatákya kukpi ƒui kemo. Nsu likpidi lɛdi lɛkya lɛni mɔɔkpanku bekyuli taatákya kukpi ƒui kemo. Na naaasu nnii bɛkpali katɔ na likpidi lɛmɛni lili. 17Lɛla biala naaakɛ ulu siin lɛlɔ ni, ɔdi likpidi. Nsu ekpidi adi akya ani naaakpanku ukyuli taatákya kukpi ƒui kemo. 18Bɔgyi ka ukyuli ɔni ndi Katɔti Ubi ni, ulélie taabla likpidi. Ɔsika Katɔti Ubidi ɔɔgyumana-nwu kalɛ na uleduo ukisine ɔmmɔ enu kemo. 19Abu bɔgyi ka bɔdi Katɔti badi geen, na kayawi bekyuli bakladi ƒui bakya ukisine ɔmmɔ lɛlɔ bɔdi kalɔ. 20Na abu bɔgyi lɛnɔ ka Katɔti Ubidi úbo kayawi kamɛni úbedie ala kalɔ úte-bu kalɛ na bɔti anwu ɔni geen ndi Katɔti. Na ɔƒaani ni, buliku anwu ɔni geen ndi Katɔti ɔmmɔ ku nwuna Ubidi Yesu Kristo lɛnɔ. Na anwu geen ndi Katɔti ɔmmɔ ɔni ndi ngba bɔni nsɔ naaadubo bɔsa kudii. 21Anwuɔsu, mina bebi bayɔne, bɛda lɛlɔ bidie lɛƒiɔkpa kemo.

will be added

X\