1 YOHANE 4

1Banwa bayɔne, bitaƒɔ kɔyu biala muulie ukyuli lɛlɔ bitadi. Mmomu bɛkɔku ɔdi biala bɛnu si kɔyu kɔmmɔ kɔ́si Katɔti kudɔ. Ɔsika ɔkɔ kenye bediene béegyingya bakya kayawi ekpo ƒui. 2Na ukyuli biala ɔni muudie kenye taasu ɔnii Kristo Yesu úbo aani ɔyawine kalɛ ni, ukyuli ɔmmɔ ubo Kɔyu kɔni nási Katɔti kudɔ. Na ɔmɛni ndi ulu ɔni lɛlɔ na bɛdubɔsia bɛti Katɔti Kɔyu. 3Nsu ukyuli biala ɔni meni ka ɔsu ɔnii Yesu úbo aani ɔyawine kalɛ ni, kɔyu kɔni na ubo mmɔ kútasi Katɔti kudɔ. Kɔyu kɔmɛni kɔdi Kristo ukisine. Na bínu ka kɔyu kɔmmɔ kɔdububo kayawi, na kúubo kɔkya ɔƒaani muedi. 4Nsu amii bebi bayɔne ni, bɛ́si Katɔti kudɔ, na bɛ́ɛdi ɔkɔ kenye bediene bammɔ lɛlɔ. Ɔsika Kɔyu kɔni náƒɔ-mii lɛlɔ kemo ni, kubo ɔyikun kutulo kɔyu kɔni nlie ama bani ndi kayawi badi mmɔ lɛlɔ. 5Kayawi lɛlɔ bekyuli kani na badi. Na baatɛmi taasiku kayawi ala lɛlɔ. Na kayawi bekyuli lɛnɔ beenú-ma litemi. 6Nsu abu ni, bɔdi Katɔti badi. Na ukyuli biala ɔni ngyi Katɔti ni, uunú-bu litemi. Na ukyuli biala ɔni nátasi Katɔti kudɔ ni, ulenu-bu litemi. Ɔmɛni buuti taanu taati Kɔyu kɔni mɔɔtina litemi geen lɛmmɔ ku kɔyu kɔni mɔɔtɔ́lɔ bekyuli. 7Banwa bayɔne, bɛya na bɔyɔ lɛlɔ. Ɔsika bɔyɔ bɔ́si Katɔti kudɔ. Na ukyuli biala ɔni mɔɔyɔ́ bekyuli ɔdi Katɔti ubi, na ɔgyi Katɔti. 8Na ukyuli biala ɔni naaayɔ bekyuli ni, ɔɔɔgyi Katɔti. Ɔsika Katɔti ablala ƒui adi bɔyɔ. 9Ka Katɔti ɔ́yɔ ka udie nwuna bɔyɔ ɔtina-bu ɔsu ni, ɔ́tala Ubidi unwi pɛ ɔnii ubo kayawi, kalɛ na ɔkɛnku Ubidi ɔmmɔ lɛlɔ na bɔkɛ ngba bɔni nsɔ naaadubo bɔsa kudii. 10Bɛya na lɛsu-mii lɛla lɛni geen muudie bɔyɔ keyi. Ɔɔɔdi kalɛ na bɔɔyɔ́ Katɔti muudie bɔyɔ keyi. Mmomu Katɔti ɔ́yɔ-bu, na úti Ubidi ɔ́kpa na bula ekpidi lili kalɛ na ɔklibi abu ku-nwu ntɛ. 11Banwa bayɔne, ka Katɔti ɔ́yɔ-bu geen lɛni ɔsu ni, ɔlɛka abu lɛnɔ butaayɔ lɛlɔ. 12Ukyuli ɔdi útanu Katɔti kudii. Nsu si bɔɔyɔ́ lɛlɔ ni, Katɔti uliku-bu, na bɔyɔ bɔni bubo bute-nwu búdu bɔ́wɔlɔ. 13Bɔgyi ka buliku Katɔti geen, na anwu lɛnɔ uliku-bu, ɔsika anwu ɔlati Kɔyu na úti úte-bu. 14Bɔ́nu bɔ́ti nwaa na buudie kenye ka Katɔti ɔ́tala Ubidi ka ubedie bayawine ɔlɛku ekpidi kemo. 15Si ukyuli biala údie ɔ́su ɔnii Yesu ndi Katɔti Ubidi ni, ɔɔtina ka Katɔti uliku-nwu, na anwu lɛnɔ uliku Katɔti. 16Na abu alati bɔgyi na bɔ́ƒɔ bɔ́di ka Katɔti ɔɔyɔ́-bu. Katɔti ablala ƒui adi bɔyɔ. Na ukyuli biala ɔni muulie taayɔ bekyuli ni, uliku Katɔti, na Katɔti lɛnɔ uliku-nwu. 17Na ulu ɔmɛni lɛlɔ na bɔyɔ búdu bɔ́wɔlɔ na bula akɔ. Ɔmmɔ ɔsu na bɔdubɔkana na bunye Katɔti anumi na litemi bɔtɛ limeyi lɛmmɔ lɛlɔ ku kayi buse. Ɔsika kalɛ na Kristo use ni, lɛni kani na buse na kayawi kamɛni kemo. 18Liƒu lɛdi liiibo bɔyɔ kemo. Mmomu bɔyɔ bɔni nédu bɔ́wɔlɔ bɔɔgyá liƒu biala. Ɔsika liƒu ku kɔtu bɔni nkɛ. Na ukyuli ɔni mbo liƒu ni, nwuna bɔyɔ bútedu bútawɔlɔ. 19Bɔɔyɔ́ Katɔti ku bekyuli ɔsika Katɔti náka-bu bɔyɔ. 20Si ukyuli ɔdi ɔɔsu ɔnii ɔɔyɔ́ Katɔti nsu uukisi nwuna ɔnwa ɔƒɔtaadine ni, ɔkɔ ɔnyine na ɔdi. Ɔsika ukyuli biala ɔni naaayɔ ɔnwani ɔni na ɔɔnu ku nwuna anumi ni, dɛ na wakana na wayɔ Katɔti ɔni na ulánu ku anumi? 21Na ɔda ɔni na Kristo úbo-bu ndi ka ukyuli biala ɔni mɔɔyɔ́ Katɔti ni, ɔlɛka ɔyɔ nwuna ɔnwa ɔƒɔtaadine lɛnɔ.

will be added

X\