1 YOHANE 3

1Bɛnu kalɛ sɔɔn na Katɔti ɔɔyɔ́ abu bani mɔɔƒɔ́ Yesu taadi. Anwuɔsu na ɔɔlɔ-bu ɔnii nwuna bebi. Na búnwini Katɔti bebi sɔsɔ! Na lɛla lɛni ɔsu na kayawi bekyuli balánu-bu taati ndi ka baaagyi Katɔti. 2Mina banwa bayɔne, ɔƒɛni ni, búnwini Katɔti bebi. Nsu bekyuli bani udu na bɔdubo bunwini ni, Katɔti útedie-nwu tɔ keyi. Nsu bɔgyi ka si lebo lɛni na Kristo ɔ́da ɔ́lɛ ni, bɔdubo bɔbla aani nwuna kalɛ. Ɔsika bɔdubo-nwu bɔnu kalɛ geen na use. 3Na ukyuli biala ɔni mɔɔsia Kristo bubo anu ni, ɔɔklibi lɛlɔ teese sɛɛn aani kalɛ na Kristo lɛnɔ use sɛɛn. 4Ukyuli biala mɔɔbla likpidi ni, ɔɔƒiɔ́ Katɔti ɔda bubo bɔmmɔ. Ɔsika likpidi ndi Katɔti ɔda bubo bɔƒiɔ. 5Na bɛgyi ka Kristo úbo kalɛ na ubada-bu udie ekpidi kemo. Na anwu ni, likpidi lɛdi lɛɛɛma-nwu lɛlɔ. 6Anwuɔsu ukyuli ɔni nliku Kristo ni, ulélie taabla likpidi. Nsu ukyuli ɔni muulie taabla likpidi ni, ɔɔtina ka útati Kristo kudii, na ɔƒaani muedi ɔɔɔgyi-nwu. 7Bitaya na ukyuli ɔdi ɔtɔlɔ-mii! Mina bebi bayɔne, ukyuli ɔni mɔɔbla ala ulu lɛlɔ ni, ɔdi ukyuli ɔni nse siin aani kalɛ na Kristo use siin. 8Ukyuli ɔni muulie taabla likpidi ni, ɔdi Satan ɔdi. Ɔsika Satan nli mɔɔbla likpidi ɔ́si kayawi kalɔ kesekɔ. Na lɛla lɛni ɔsu na Katɔti Ubidi ɔmmɔ úbo ni, ani ndi ka ɔyila Satan ablala. 9Ama bani ndi Katɔti bebi ni, belélie taabla likpidi. Ɔsika Katɔti udu nkya-ma lɛlɔ kemo ɔƒaani. Na ka Katɔti ndi-ma Ɔti ɔsu ni, balakana bulie butaabla likpidi. 10Bɛya na lɛtina-mii kalɛ na bɔɔnu taati kavumana kani nkya Katɔti bebi ku Satan bebi ntɛ. Ukyuli biala ɔni naaabla ala siin ni, iye ulayɔ nwuna ɔnwa ɔƒɔtaadine ni, ɔɔɔdi Katɔti ubidi. 11Ɔmɛni ndi kenye kani na bínu bɛ́si kalɔ kesekɔ ƒui, na ani ndi ka ɔlɛka bɛyɔ lɛlɔ. 12Na utalɛka bɔbla lɛlɔ aani Kain kalɛ. Ɔsika anwu ɔdi Satan ɔdi, na ɔ́du ɔnwani. Na bi ɔsu na Kain ɔ́du-nwu? Ɔsika uukisi ɔnwani ka nwuna ablala ese siin ɔsu. Na anwu Kain adi eeese siin. 13Anwuɔsu ni, banwa, utabla-mii dɛye dɛye si kayawi bekyuli beekisi-mii. 14Na bɔgyi ka bɔ́ɔlɛ kukpi enu kemo, na búbo buli ngba geen, ɔsika bɔɔyɔ́ bula banwa baƒɔtaadine. Na ukyuli biala ɔni naaayɔ bekyuli ni, úkpi na kɔyu kemo. 15Na ukyuli ɔni muukisi nwuna ukyulikpana ni, ɔdi bekyuli ɔdune. Na amii alati bɛgyi ka ukyuli biala ɔni mɔɔdú bekyuli ni, uuubo ngba bɔni naaadubo bɔsa kudii. 16Kalɛ na Yesu Kristo úti nwuna ngba ɔ́kpa na bula lili ni, ɔmmɔ mɔɔtina-bu lɛla lɛni ndi bɔyɔ. Anwuɔsu na abu lɛnɔ ɔlɛka buti lɛlɔ bɔkpa bula banwa baƒɔtaadine lili. 17Si ukyuli ɔdi ubo ala adi na ɔɔnu ka ɔnwani ɔɔyaki nsu útete-nwu kebunku kadi mmomu ɔ́da anumi údie ɔnwani ɔmmɔ lɛlɔ ni, dɛ na wakana bɔsu ɔnii ɔɔyɔ́ Katɔti? 18Mina bebi bayɔne, bitaya na bɔyɔ lɛlɔ ku kenyekplu. Mmomu biteebunku lɛlɔ geen. 19Ɔmɛni bɔbla kemo na bɔdubɔti ka bɔgyi litemi geen lɛmmɔ na bɔkɛ kayi ƒaa na Katɔti anumi. 20Na si ina bula kayi kaadú-bu kɔtɔ muedi ni, enu ataƒɛ-bu. Bɔgyi ka Katɔti ɔɔtɛ litemi biala ulu lɛlɔ teetulo-bu, na ɔgyi lɛla biala. 21Anwuɔsu ni, banwa bayɔne, si bula kayi kaladu-bu kɔtɔ ni, na bɔdubɔkana na bunye Katɔti anumi ku kayi buse. 22Na lɛla biala na buuvele-nwu ni, bɔɔkɛ́-ni ɔsika bɔɔdi nwuna ɔda bubo lɛlɔ na bɔɔbla lɛla lɛni mɔɔyɔ́-nwu kaƒɔ. 23Ɔda bubo bɔni na úse úte-bu ndi ka bɔƒɔ Ubidi Yesu Kristo ɔmmɔ bɔdi, na bɔyɔ bula lɛlɔ aani kalɛ kani na úbo-bu ɔda úbavi. 24Bekyuli bani mɔɔdi Katɔti ɔda bubo lɛlɔ ni, beliku Katɔti. Na Katɔti lɛnɔ uliku-ma. Na Kɔyu kɔni na Katɔti úti úte-bu ɔsu ni, bɔgyi ka Katɔti uliku-bu.

will be added

X\