1 KORINTOƑUƆ 9

1Bɛɛbu bɛnii liiibo kuƒi na lɛbla lɛla lɛni mɔɔyɔ́? Munuu lɛɛɛdi ɔtalane na ńtanu Blɔti Yesu? Na ɔɔɔdi amii ndi mina ebi ani na lɛ́nwu na mina kabla kani na lɛ́bla líte Blɔti kemo? 2Si ina badi balaƒɔ-mi aani Blɔti ɔtalane ni, amii bɛ́ƒɔ-mi lɛni. Na kalɛ na bɛ́bla unwi ku Blɔti ni, ɔmmɔ lɛti pɛ ɔ́ya na amii alati biidie ɔmɛni taatina nwaa ka ndi Blɔti ɔtalane. 3Na si bekyuli baakyaku-mi ɔmɛni lɛlɔ unyeƒi ni, lɛni na muudie mina lɛlɔ kenye. 4Bubo kuƒi kɔni na bete-bu adila ku ntu na bula kabla kenye. 5Bubo kuƒi ka abu lɛnɔ buti bula beleku bɔda aani kalɛ na batalane bakladi ku Blɔti banwani ku Petro lɛnɔ baabla. 6Munuu ami ku Barnaba lɛti kani nálɛka bɔnu bula lɛlɔ lɛlɔ? 7Ukpone ɔdi biala uláƒɔ nwuna lili kayu na bekpone kakyakɔ. Na umonsene biala ni, ubo kuƒi ka ɔdi nwuna kemo edula. Na bebuo lɛlɔ ɔnune biala ubo kuƒi na uti bebuo bammɔ anyi ntu ɔbla lɛdila. 8Liiinye ala ani na abu bekyuli kasusu kaanu taati mɛni lɛti pɛ lɛlɔ. Na lɛni kani na ɔda bubo bɔmmɔ bɔɔsu. 9Bɔ́ka na Mose ɔda bubo ɔku kemo ka ni, ebuo ɔni na biiti teesienku katumakɔ ni, tenyimi-nwu kenye si unye kabla lɛlɔ. Nsu ni, ɔɔɔdi bebuo bamɛni geen lɛlɔ na Katɔti ɔɔtɛmi taasiku. 10Bula lɛlɔ litemi na Katɔti ɔɔsu. Na sɔsɔ ni, abu ɔsu na bénweni litemi lɛmɛni. Ukyuli ɔni mɔɔtuma ku ukyuli ɔni mɔɔƒɛ edula ni, ɔdi ka babla kabla kammɔ ku lɛnunsia ka ɔdi biala wakɛ edula ammɔ adi. 11Bɔ́va kɔyu kemo ebi bɔ́kya-mii akɔ. Na si amii lɛnɔ bíte-bu ɔlɔna lɛlɔ ala ni, úbie? 12Si bekyuli bamba bébo kuƒi ka bakɛ kɔsia kɔdi basiku-mii kudɔ ni, na abu bubo kuƒi kɔmmɔ udu butulo-ma muedi. Nsu abu búteti kuƒi kɔmmɔ bútablaku lɛla lɛdi. Mmomu abu búti lɛla biala bɔ́sia lɛlɔ kalɛ na Kristo litemi buni lɛmmɔ lɛkɛ ulu na ligyingya lisie kesii biala. 13Bɛgyi kede kede ka bekyuli bani mɔɔbla kabla na Katɔti kakpakɔ ni, mmɔ na baakɛ́ bana lɛdila. Na bekyuli bani muuti akpala taatásia lɛkpabi lɛmmɔ lɛlɔ ni, beete-ma bana kadikɔ. 14Lɛni kani geen na Blɔti úbo ɔda ɔnii bekyuli bani mɔɔkɔ́ litemi buni lɛmmɔ lɛsa teete bekyuli ni, lɛsa lɛni baakɔ́ kemo na ɔlɛka badi. 15Nsu ńtablaku kuƒi kɔmɛni lɛla lɛdi. Munuu muunweni-mii ɔku ɔmɛni na lɛwia lɛla lɛdi lɛsiku-mii kudɔ? Si ɔmmɔ ɔsu ni, si líkpi muedi ɔdia-mi utulo. Ɔsika naaawia nnii lɛla lɛni lɛlɔ na mbo kuƒi ka lɛkun lɛmɛnɛ ni, ukyuli ɔdi uti-ni unwini etemila keeke. 16Liiibo kuƒi kɔni na ntaakun lɛmɛnɛ ka mɔɔkɔ́ litemi buni lɛmmɔ lɛsa ɔsu. Blɔti ɔdubɔni-mi kɔtu si ńtakɔ litemi buni lɛmmɔ lɛsa ńtete bekyuli! 17Si banii ami ɔlati náƒuna kabla kamɛni na mina bɔyɔ kenye ni, nka ndubɔsia anu ka baƒɔ-mi kayu. Nsu ɔdi kabla kani na Blɔti nnye-mi lɛlɔ ɔnii mbla. Ɔsika Katɔti néti-mi únyene-ka kenye. 18Na bi kayu baaƒɔ-mi? Lɛyuƒɔla lɛni na mbo ndi ka lɛkɔ litemi buni lɛmmɔ lɛsa ku kaƒɔ ƒaa. Na lɛɛɛdubo mina kadikɔ ƒui kama bɔsia na litemi buni lɛni mɔɔsu mɛni kemo. 19Mbo mina lɛlɔ kuƒi biala ɔni na lɛɛɛkya ukyuli bamba ɔdi kalɔ. Nsu lɛ́bla lɛlɔ aani ukyuli ɔni mɔɔbla bekyuli ƒui kabla kalɛ na lɛƒɔ bekyuli pii lite Blɔti. 20Uwi ɔni na mɔɔbla kabla na Yudaƒuɔ akɔ ni, lílie ngba aani Yudani kalɛ na lɛkana lɛƒɔ-ma lite Blɔti. Na ina ka lɛɛɛkya Mose ɔda bubo kalɔ muedi ni, lílie ngba lɛni ku bani mɔɔdi nwuna ɔda bubo bɔmmɔ lɛlɔ uwi ɔni na lɛ́kya-ma akɔ kalɛ na lɛkana na lɛƒɔ-ma lite Blɔti. 21Lɛni kani na mɔɔbla ku bekyuli bani naaadi Yudaƒuɔ lɛnɔ. Na lílie-ma akɔ aani ukyuli ɔni naaadi Yudani. Na naaadi Yudaƒuɔ ɔda bubo bɔdi lɛlɔ kalɛ na lɛƒɔ-ma lite Blɔti. Ɔmɛni ulátina ɔnii lɛ́ta línye Katɔti ɔda bubo lɛlɔ. Ɔsika geen ni, Kristo ɔda bubo lɛlɔ na mɔɔdi. 22Si nkya bani na bana bɔƒɔtaadi buse kpɛtɛ kpɛtɛ akɔ ni, mɔɔbla lɛlɔ aani ama kani kalɛ na lɛkana lɛƒɔ-ma lite Blɔti. Ɔmɛni ɔsu lɛ́manku-ma na línwini bekyuli ƒui ɔkpana kalɛ na lɛsia ulu biala lɛlɔ na lɛƒɔ bekyuli badi lite Blɔti. 23Ala amɛni ƒui na mɔɔbla na litemi buni lɛmmɔ ɔsu kalɛ na ami lɛnɔ lɛkɛ lɛlɔyɔ lɛni nkɛnku kabla kammɔ kemo. 24Bɛgyi nwaa ka bekyuli pii muusié usi kekelikɔ. Nsu ukyuli unwi pɛ mɔɔdi lɛlɔ taaƒɔ lɛyuƒɔla. Anwuɔsu bikeli usi ɔmmɔ kalɛ na bɛdi lɛlɔ na bɛkɛ lɛyuƒɔla. 25Ukyuli biala ɔni mɔɔklibi lɛlɔ ka úsela utékeli usi ni, uuboku lɛlɔ kalɔ na baatina-nwu kɔkwɛ kɔna ƒui kalɛ na ɔƒɔ lɛlɔ bɔdi kabwa kani neeetu uwi asa na keebie. Nsu abu ni, bɔɔsa lɛlɔ bute kabwa kani na kelebie kudii. 26Ɔmɛni ɔsu na muukeli siin kalɛ na ntékulo kabuli. Na nse aani ukyuli ɔni muukpó lɛvu ɔni na ulébeyi nwuna lɛvu na kayaa ukpludi. 27Lɛ́ya na lɛvu lɛma-mi kalɛ na mina ɔlɔna ɔkana na ɔƒɔ lɛbibo biala. Ɔsika si lɛ́kɔ litemi buni lɛmɛni lɛsa líte bekyuli bamba na búbasa bɔnii bɔɔkɔ́ku lɛlɔ ni, naaawia ka bada-mi bedie na lɛyuƒɔla lɛmmɔ kenye!

will be added

X\