1 KORINTOƑUƆ 7

1Na ɔkɛnku ɔku ɔni na bínweni-mi etemila lɛlɔ ni, mɔɔsu-mii nnii si ɔnana ɔdi elie na átawia anii eeti uleku ni, agyi anii ábla-nwu kaduɛ. 2Nsu ka lɛsɔnɔdi lɛ́bɔ ɔsu ni, ɔlɛka ɔnana biala ɔkɛ nwuna uleku. Na uleku biala lɛnɔ ɔkɛ nwuna ɔgya. 3Útalɛka ɔnana uni ulekudi kudɔ buse. Na útalɛka uleku lɛnɔ uni ɔgyani kudɔ bɔtɛ. 4Ɔsika uleku ɔlɔna ɔɔɔdi anwu lɛti ɔdi. Mmomu ɔdi ɔgyani lɛnɔ ɔdi. Na lɛni kani na ɔnana ɔlɔna lɛnɔ ɔɔɔdi anwu lɛti ɔdi. Mmomu ulekudi lɛnɔ ɔdi na ɔdi. 5Si bana akɔ ɔdi ɔɔda ɔdi ɔkwɛ ni, ɔtuna ute-nwu amu ntu bɔka na bɛ́ka lɛlɔ kalɔ bunu ka bɛbla lɛni na biti uwi ɔmmɔ bite katɔ bɔkpali. Na ɔmmɔ kama ni, ɔdi ka bɛsɔ bilie kalɛ kani na bilie kukuuku. Si bɛ́bla lɛni ni, bileduo ukisine ɔmmɔ kakpagyuɛ kemo. Ɔsika bilakana lɛlɔ lɛlɔ bɔdi na bɛsɔ bilie lɛni ƒui. 6Ɔmɛni ɔɔɔdi ɔda na muubó-mii. Mmomu kasusu kadi na muute-mii. 7Geen geen ni, ɔdia ute-mii si banii ɔdi biala use aani kalɛ na ami nse. Nsu ni, ɔdi biala ku lɛla lɛni na Katɔti úte-nwu. Ukyuli ɔdi ubo litela lɛdi, na ɔdi lɛnɔ ubo lɛbambadi. 8Amu na bakinsi ku bekpinele ni, mɔɔsu-mii ka si bɛ́ƒɔ lɛlɔ bíse na bítelie agya iye bíteti beleku aani mina kalɛ ni, ɔdia utulo. 9Nsu si bilakana lɛlɔ bɔda ɔ́si ala ani mɔɔda-mii ɔkwɛ ɔsu ni, bɛkana na bilie agya iye biti beleku. Ɔsika si bɛ́bla lɛni ni, ɔdia utulo ɔni na bitaabla lɛyalɛ ala taavi. 10Na bagya ku bele ni, muubó-ma ɔda ɔni naaadi mina ɔdi. Mmomu Blɔti na muubó-ma ɔda ɔmɛni. Ɔɔɔdi ka uleku ɔlɛ ɔgyani kesii. 11Na si ɔ́lɛ ni, ɔdi ka anwu lɛti pɛ ɔsɔ ulie iye anwu ku ɔgyani ɔmmɔ basɔ babla unwi. Na utalɛka ɔnana lɛnɔ ɔnyonu ulekudi. 12Na amii bakladi ni, mɔɔsu-mii ɔmɛni, nsu ɔɔɔdi Blɔti ɔda bubo. Si ɔƒɔtaadine ɔdi ubo uleku ɔni naaadi ɔƒɔtaadine na uleku ɔmmɔ ɔ́tuna ka basɔ belie ni, tanyonu-nwu. 13Lɛni kani si uleku ɔƒɔtaadine ɔdi úlieku ɔnana ɔni naaadi ɔƒɔtaadine na ɔnana ɔmmɔ únu kalɔ ka basɔ belie ni, uleku ɔmmɔ utalɛ-nwu kesii. 14Ɔsika ɔgyani ɔni nátaƒɔ útadi mmɔ ni, Katɔti ɔdubɔbla-nwu kedee ɔkɛnku uleku ɔni náƒɔ ɔ́di mmɔ ɔsu. Na lɛni kani na Katɔti ɔdubɔbla uleku ɔni nátaƒɔ útadi mmɔ kedee na awɔ ɔnana ɔni náƒɔ ádi mmɔ ɔsu. Si ɔɔɔdi lɛni ni, bana bebi balabla kedee. Nsu kalɛ na use ni, Katɔti ɔɔbla bebi bamɛni kedee. 15Nsu si ukyuli ɔni naaadi ɔƒɔtaadine mmɔ ɔɔwia ka ɔtɔlɔ ɔni ndi ɔƒɔtaadine ɔmmɔ kudɔ ni, ɔkana na ɔtɔlɔ ƒaa. Na ulu ɔmɛni udu lɛlɔ ni, uleku ɔƒɔtaadine ɔmmɔ iye ɔnana ni, ubo kuƒi ka ɔbla lɛla lɛni na ɔɔyɔ́. Katɔti ɔ́lɔ-bu ɔnii bubelie ngba ku keyi buɛɛ. 16Anwuɔsu awɔ uleku ɔƒɔtaadine si élieku ƒ^ɔgyani lɛni ni, ɔƒaalɛ adubudie-nwu alɛku ekpidi kemo. Lɛni kani na awɔ ɔnana ɔƒɔtaadine lɛnɔ ni, si awɔ ku ƒ^ulekudi bílie lɛni ni, ɔƒaalɛ adubudie-nwu alɛku ekpidi kemo. Lie ngba ku kuƒi kɔni na ebo asa na Katɔti úte-ɔ ƒula uleku. 17Lɛla lɛni na mɔɔtina na baƒɔtaadine akpa ƒui akɔ ni, anwu ndi ka ɔdi biala usie anumi na ulie ngba na kuƒi kɔni na Blɔti úte-nwu ɔkɛnku nwuna kenyekɔ lɛlɔ uwi ɔni na Katɔti ɔ́lɔ-nwu. 18Si ékulo lego asa na Katɔti ɔ́lɔ-ɔ ni, na eti-nwu lɛni kani. Na si étekulo tɔ lego asa na Katɔti ɔ́lɔ-ɔ ni, awɔ lɛnɔ sɔ tasu anii etékulo lego. 19Ɔsika si ɔdi ékulo lego iye étekulo lego ni, ɔmmɔ ɔɔɔda. Mmomu kalɛ na abla lɛla lɛni na Katɔti ɔ́su-bu ka bɔbla ni, anwu nda. 20Anwuɔsu kuƒi kɔni na ebo na ƒula kenyekɔ uwi ɔni na Katɔti ɔ́lɔ-ɔ ni, da-nwu lɛni kani. 21Si ukyuli bamba kabla na aabla asa Katɔti ɔ́lɔ-ɔ ni, ɔmmɔ utekpoku-ɔ. Nsu si ákɛ ulu ɔni na ada ukyuli bamba kabla bɔbla aya na akɛ bɔnwuna ni, sia ulu ɔmmɔ lɛlɔ. 22Si aabla ukyuli bamba kabla asa na Blɔti ɔ́lɔ-ɔ ni, énwini ukyuli ɔni na ebo bɔnwuna na Blɔti kudɔ. Na lɛni kani na si aabla awɔ ɔlati kabla asa na Blɔti ɔ́lɔ-ɔ ni, énwini ukyuli ɔni mɔɔbla Blɔti kabla. 23Na Katɔti ɔ́ƒɔ kayu bonwu na bina lili. Anwuɔsu bɛsɔ bitenwini bekyuli bamba kabla bablane. 24Banwa, bina akɔ ɔdi biala ɔbla unwi ku Katɔti na kuƒi kɔni na ebo na ƒula kenyekɔ kenye asa ɔ́lɔ-ɔ. 25Ɔƒɛni na lɛla lɛni na bíye na bakinsi lɛlɔ ni, ńtaƒɔ ɔda bubo bɔdi ńtasiku Blɔti kudɔ. Nsu ka Blɔti ɔ́nu-mi kɔnyana na ndi ukyuli ɔni na lɛ́manku ɔsu ni, mina kasusu ndi kamɛni. 26Si ukyuli ábu ánu kalɛ na beekpóku bekyuli uwi ɔmɛni kemo ni, mɔɔbu nnii ɔdia ute ɔnana utulo si ɔdi ɔkinsi. 27Na si éti uleku ni, tasu anii aanyonu-nwu. Na si eeeti ni, tasu anii atáwia uleku ɔdi eti. 28Nsu ni, si éti uleku ni, átabla likpidi lɛdi. Na si uleku ɔni na nka uuulie kɔgya úlie kɔgya ni, útabla likpidi lɛdi. Nsu mɔɔyɔ́ ka lɛda-mii lidie abi ani na ɔgya ku ule beebó na bana ngba kemo. 29Lɛla lɛni na mɔɔsu-mii ni, ani ndi ka uwi ɔ́sɔ útene. Na ɔ́si ɔƒɛni úsela ni, ɔdi ka amii beleku bagya bilie ngba aani bakinsi. 30Na bekyuli bani muuwulo ni, babla aani si bana lɛlɔ liiibo kɔnyana. Na bani mɔɔmá ni, babla aani si kubiti kuláda-ma. Na bekyuli bani muuyé ala ni, babla aani si ala ani na béye ƒui aaadi bana ɔdi. 31Na bani nnye kayawi kamɛni akɛla kenye ni, beteti anu batasia-nya lɛlɔ. Ɔsika kalɛ na bɔɔnu kayawi kamɛni ɔƒɛni ni, ɔɔɔdi lɛni na kadubo buse na uwi klukui ɔdi kama. 32Mɔɔwia ka bɛda kasusu bidie lɛla biala lɛlɔ. Ɔsika ɔnana ɔkinsi ni, uuti nwuna kasusu taasia Blɔti kabla lɛlɔ na ɔɔkya ɔkplu ka ɔbla lɛla lɛni mayɔ Blɔti kaƒɔ. 33Nsu ɔnana ɔni nti uleku anwu ni, nwuna kasusu kaasia kayawi ala lɛlɔ. Ɔsika ɔɔwia ka ɔbla lɛla lɛni mayɔ ulekudi kaƒɔ. 34Ɔmmɔ ɔsu ni, ala ammɔ aaní-nwu teenene ɔƒɛnyi ɔni ku ɔni ƒui. Na uleku ɔkinsi iye adagyaa ni, uuti nwuna kasusu taasia Blɔti kabla lɛlɔ. Ɔsika ɔɔwia ka uti lɛlɔ ƒui ute na kɔyu ku ɔlɔna kemo. Na uleku ɔni na ulie kɔgya ni, nwuna kasusu kaasia kayawi ala lɛlɔ, ɔsika ɔɔwia ka ɔbla lɛla lɛni mayɔ ɔgyani kaƒɔ. 35Mɔɔwia ka libunku-mii. Ɔmɛni ɔsu na mɔɔsu-mii ala amɛni. Neeenyimi-mii ku ɔda bubo bɔdi. Mmomu mɔɔyɔ́ ka bilie ngba na ulu geen ɔmmɔ lɛlɔ. Na bɛkana na biti lɛlɔ bite Blɔti lɛti ƒui kede kede ku bina kayi ƒui. 36Na si ɔnana ku uleku ɔni na bálɛ lɛlɔ kegye bánu ka basɔ balakana bulie kpoo na betu uwi kalɛ na nka bákali ni, bakana na beti lɛlɔ. Na ɔɔdi likpidi. 37Nsu ɔnana ɔni nábla kasusu kpakplaa ka uleti-nwu na wakana na wada lɛlɔ lɛni ni, ɔkana na ɔda-nwu buti ɔya. Ɔnana ɔmɛni lɛnɔ ɔ́bla kaduɛ. 38Anwuɔsu ni, ɔnana ɔni néti uleku mmɔ ni, ɔ́bla kaduɛ. Nsu ɔni néteti uleku mmɔ ni, ɔ́bla kaduɛ útulo. 39Uleku ɔni na ulie kɔgya ni, uuubo kuƒi ka ulie kɔgya bamba na uwi ɔni na ɔgyani ɔmua uli ngba. Na si ɔgyani ɔmmɔ úkpi ni, mmɔ asa na ɔdubɔkana na ulieku ɔnana ɔbambadi biala na ɔɔyɔ́. Nsu ɔdi ka ɔnana ɔmmɔ ɔbla ɔƒɔtaadine. 40Na si ɔ́kana na ɔ́sɔ útelie kɔgya ni, ɔdubɔkɛ ebiti utulo. Ɔmɛni na mina kasusu kaatina-mi, na lɛ́ƒɔ lɛ́di ka ɔdi Katɔti Kɔyu lɛƒɔyɔ lɛnɔ.

will be added

X\