1 KORINTOƑUƆ 5

1Na ɔƒɛni ni, bekyuli baasu nwaa ka ni, bina akɔ badi baadi kɔsɔnɔ kɔni ntulo bɔsu. Na bekyuli bani naaadi baƒɔtaadine muedi balakana ɔmmɔ udu bɔbla. Básu-mi banii ɔnana ɔdi ku ɔti ulekudi baatɛ! 2Na bi ɔsu na bɛɛtina lɛlɔ? Ɔlɛka biteewulo kɔnyana mmomu. Na ukyuli ɔni nábla lɛla lɛmɛni udu ni, ɔdi ka bɛda-nwu bidie bina baƒɔtaadine akɔ. 3Ina ka lɛ́gyunku-mii na bulánu lɛlɔ anumi ku anumi muedi ni, nkya-mii kudɔ mmɔ na kɔyu kemo. Na ka nkya-mii akɔ ɔsu ni, lɛ́du ukyuli ɔni nábla udu ukpidi ɔmɛni kɔtɔ 4na Blɔti Yesu Kristo ɔyikun kemo. Si bɛ́sala lɛlɔ ni, na ɔbla-mii ka ami lɛnɔ nkya-mii akɔ na kɔyu kemo. Na Blɔti Yesu Kristo ɔyikun ɔdubɔkya-bu akɔ. 5Ɔdi ka bɛnyonu ukyuli ɔmmɔ bite Satan na nwuna ɔyikun ususu-nwu ɔlɔna. Na ina úkpi muedi ni, ukyuli ɔmmɔ kɔyu kɔkɛ bɔƒɔ na limeyi lɛni lɛlɔ na Yesu watɛku kayawi bekyuli ƒui litemi. 6Útalɛka bitaatina lɛlɔ. Bɛɛɛgyi bɛnii bɔnyii blii mɔɔsálaku ɔlaaƒɔ ɔni na bánwu na ɔɔyá na ɔna ƒui uuƒu? 7Bɛda bɔnyii biala bɔni ndi likpidi bidie bina akɔ. Na bɛbla aani ɔlaaƒɔ ɔwɔdi ɔni na bánwu, na bɔnyii bɔdi buuubo-nwu kemo aani kalɛ na ngyi ka bise sɔsɔ kalɛ. Ɔsika bula Kukpi Lili Bɔvia Limeyi líidu. Na ɔƒɛni ni, báadu bula Kukpi Lili Bɔvia Lɛkpa Koƒonu Ubi ɔni ndi Kristo. 8Anwuɔsu ni, bitaya na bɔdi bula Kukpi Lili Bɔvia Limeyi ku bodobodo ɔni kemo na bɔnyii bɔkukudi bɔni ndi likpidi ku likyulikpi ala ani bɔɔbla akya. Mmomu bɔɔdi limeyi lɛmɛni ku bodobodo ɔni kemo na bɔnyii buuubo na bɔɔtina ka bɔɔɔdi anumi lɛlɔ bekyuli. Mmomu bɔkɛnku litemi geen lɛmmɔ. 9Na ɔku ɔni na línweni-mii kemo ni, lɛ́su-mii nnii bitasala lɛlɔ ku bekyuli bani mɔɔdi kɔsɔnɔ. 10Ɔƒɛni ni, ɔɔɔdi bekyuli bani naaadi baƒɔtaadine na nda. Badi bekyuli bani mɔɔdi kɔsɔnɔ na bebo lɛnungyie ku bani muuti bekyuli egulabi taadi, na baakpá baƒiɔ lɛnɔ. Na si bɛnii bɛɛmami-ma lɛlɔ bɔdi anwu ni, ɔdi ka bɛvi bɛlɛ kayawi kemodi kammɔ ƒui kemo. 11Mmomu lɛla lɛni mɔɔtina ndi ka ukyuli ɔni na ɔɔlɔ lɛlɔ ɔnii ɔnwa ɔƒɔtaadine nsu ɔɔdi kɔsɔnɔ iye ubo lɛnungyie iye ɔɔkpá baƒiɔ iye ɔɔlɔ bekyuli anyikpi iye uukpi ntɛ iye uuyú ni, awɔ ku-nwu bitabla lɛla lɛdi bitasala. Na bitakya kɔnu lɛkyami linwi kemo bitadi muedi. 12- 13Use nwaa ka ni, ɔɔɔdi mina kabla kadi ka lɛtɛku bekyuli bani naaadi bula baƒɔtaadine bakpana litemi. Mmomu Katɔti ndubɔtɛku-ma litemi. Nsu ɔdi ka bɔtɛku bula baƒɔtaadine bakpana litemi aani kalɛ na Bunweni Kedee Ɔku ɔɔsu ɔnii, “Bɛgya ukyuli ukpidi bidie bina kasala kemo.”

will be added

X\