1 KORINTOƑUƆ 4

1Bitaanu-bu aani Kristo kabla bablane bani mɔɔnu Katɔti etemila geen aani na útedie keyi dii lɛlɔ. 2Na lɛlakpa linwi lɛni kani na unwoti ɔɔwia taasiku nwuna ala lɛlɔ ɔnune ɔmɛni udu kudɔ ndi ka ɔ́bla kabla kammɔ ulu lɛlɔ. 3Ɔƒɛni ni, lɛɛɛdaku-ni si ɔdi ɔɔtɛku-mi litemi iye ɔdi ɔkɛnku kayawi lɛnunda lɛdi kenye ɔɔnu ɔnii lɛ́ƒiɔ. Naaatɛku ami ɔlati lɛlɔ muedi litemi. 4Mina kayi kaladu-mii kɔtɔ kɔdi. Nsu ɔmɛni uléte-mi ubo ɔnii lɛ́ɛlɛ sɛɛn na likpidi ku litemi bɔtɛ kemo. Ɔsika Blɔti ndubɔtɛku-mi litemi. 5Anwuɔsu ni, ɔdi utatɛku ɔkpanadi litemi wetédu ka uwi ɔbuni ɔmmɔ webo. Si uwi ɔni na Blɔti úbo ni, anwu ndubɔtɛku ukyuli biala litemi na limeyi likplodi lɛmmɔ lɛlɔ. Na anwu ndubudie kasuudikɔ ala abɛdi keyi na ɔdubudie ala ani na bekyuli kakali kadanku ɔtina. Mmɔ na Katɔti ɔdubumwi ukyuli biala kalɛ na ɔ́bla nwuna kabla ɔ́vinku. 6Banwa, kalɛ na binu ala ani na mɔɔsu kalɔ ɔsu na líti ami ku Apolo línwini lɛla lɛni na bɛnu bɛtɛya. Na bɛtɛya ala ani kalɔ na etemila amɛni eedie taatina ɔni na bénweni banii, “Bɛbla ala bɛsiaku ulu lɛlɔ.” Ɔmɛni ɔsu bitatalaku ukyuli ɔdi katɔ bitetulo ɔbambadi. 7Ɔma nédie-ɔ na áƒɔ kuye étulo ƒula ɔkpana? Ala ani na ebo ƒui ni, Katɔti néti-nya úte-ɔ. Na si lɛni na ɔdi ni, bi ɔsu na aakun lɛmɛnɛ aani si ɔɔɔdi Katɔti néte-ɔ ala ani na ébo? 8Bɔsa na ala ani ƒui na bɛɛwia áasa-mii? Munuu balakɛne na biinwíni? Bɛ́ɛta bínwini baga ina ka bɔɔɔdi baga? Awo! Mɔɔyɔ́ si nka banii baga na bíinwini. Na abu lɛnɔ bunwini baga aani bina kalɛ! 9Ɔsika use-mi aani si abu batalane ni, keliekɔ kekplodi na Katɔti úti ute-bu. Na buse aani bekyuli bani na bádu-ma kukpi kɔtɔ ka badu-ma na kadi anumi. Na kayawi ƒui ku Katɔti batu benye banu. 10Bɔdi badɔlɔdi na Kristo ɔsu. Nsu amii bɛdi banundane ka bɛ́bla unwi ku Kristo ɔsu. Abu buse aani bekyuli bani na ekubi eeebo-ma lɛlɔ kemo. Nsu amii ni, lɛlɔ lɛ́sa-mii. Bɔɔɔdi lɛla lɛdi na bekyuli anumi. Nsu amii ni, bibo ɔbu. 11Úti úbalɛ ku ɔƒɛni ni, bɔkɛ ku kɔka ku utukwɛ. Na buuubo adala abuni adi. Na bekyuli beebó-bu. Na buuubo keliekɔ kadi. 12Na bɔɔbla kabla kpakplaa na buutú lɛlɔ. Si bekyuli béwida-bu ni, abu buute-ma kusɛ kusɛ. Ina dɛ na basiaku-bu beekpóku-bu ni, bɔɔkya ɔkplu. 13Si bédumi-bu ni, kayi buɛɛ etemila na buuti teedie lɛlɔ kenye. Bɔɔɔdi lɛla lɛdi buuutulo kayawi kamɛni kebu. Kalɔ kamɛni alaekpidi kewiakunkɔ na bɔdi úti úbalɛku ɔƒɛni. 14Ɔɔɔdi kɔƒa na nnii mɔɔkya-mii ɔsu na muunweni-mii ɔku ɔmɛni udu. Mmomu mɔɔlɛ-mii aani mina bebi bayɔne kalɛ. 15Ɔsika si ina bibo bekyuli mpimu leevu muedi bani mɔɔnu-mii lɛlɔ na bina bɔƒɔtaadi ngba bɔni na bilie kemo ni, ɔɔɔdi bati pii náwɔ-mii. Ɔsika kalɛ na bilie ngba na bɛ́bla unwi ku Kristo ɔsu ni, ami nénwini bina ɔti na ɔni na lɛ́ka litemi buni lɛmmɔ buti buboku-mii ɔsu. 16Anwuɔsu ni, muuvele-mii nnii bɛsiaku mina ɔbladu kama. 17Ɔmɛni lɛlɔ geen ɔsu na mɔɔtala Timoteo lɛkya-mii. Ɔdi-mi ubi ɔyɔne geen ɔni mɔɔbla Blɔti kabla ulu lɛlɔ. Ɔdubo ubenyimene-mii Kristo ngba bɔwɔdi ulu ɔni kama na nsia. Na ɔmmɔ na mɔɔtina baƒɔtaadine ƒui na kesii biala. 18Bina akɔ badi báta bénwini bekyuli bani mɔɔtina lɛlɔ teetulo bakpanadi, ɔsika bákali banii nsɔ lɛɛɛdubo naaabanu-mii. 19Na si Blɔti ɔ́tuna ni, ndubo mbanu-mii na uwi klukui ɔdi kemo. Na ami ɔlati ndubɔnu ɔyikun ɔni na bekyuli bani mɔɔtina lɛlɔ mɛni bebo, na lɛnu si ɔɔɔdi atɛ keeke kani na baatɛmi. 20Ɔsika Katɔti lɛga bɔdi bɔɔɔdanku atɛ keeke bɔtɛmi. Mmomu bɔdanku ɔyikun. 21Bɛɛyɔ́ ka libo-mii kudɔ na mbani-mii kɔtu, munuu mbo-mii kudɔ ku anumi buɛɛ na bɔyɔ kemo?

will be added

X\