1 KORINTOƑUƆ 3

1Banwa, na litemi geen bɔsu kenye ni, naaakana na matɛmiku-mii aani kalɛ na mɔɔtɛmiku bekyuli bani na Katɔti Kɔyu kɔ́ƒɔ-ma lɛlɔ kemo. Mmomu ndubɔtɛmiku-mii aani bekyuli bani na bana anu amua asia kayawi ala lɛlɔ. Na bɛmua bɛdi banamu wɛlɛ wɛlɛ na Kristo bɔƒɔtaadi bɔmmɔ kemo. 2Mina ala ani matina-mii ni, ɔlɛka ese kpɛtɛ kpɛtɛ aani kalɛ na lɛnyintu lɛ́manku líte ubiwɔ. Na ɔɔɔdi ala ani kalɔ bunu mbo ɔkplu aani kalɛ na ukyuli ɔni nálɛ lili ɔɔdi ala ani mbo unu kalɛ. 3Ɔsika bɛmua bilie ngba aani bekyuli bani néti bana kasusu básia kayawi kamɛni lɛlɔ ala lɛti pɛ lɛlɔ. Na si lɛnungyie lɛkya-mii akɔ na bɛɛdɔ ni, ɔmmɔ lɛti muedi ɔɔtina ka kayawi kamɛni lɛlɔ ala na bilie bite. 4Si bina akɔ ɔdi ɔ́su ɔnii, “Ami Paulo kama nsia,” na ɔbambadi lɛnɔ ɔnii, “Ami Apolo kama nsia” ni, bɛɛbla ala aani bekyuli bani na kayawi kasusu kani ńaƒɔ-ma lɛlɔ kemo. 5Na amɛni ƒui kama ni, ɔma ndi Apolo? Na ɔma ndi Paulo? Katɔti kabla bablane kani na bɔdi. Na bula lɛlɔ na bɛ́sia bɛ́ƒɔ bɛ́di. Na bula akɔ ɔdi biala ɔdanku kabla kani na Katɔti úte-nwu ɔnii ɔbla. 6Ami nése kabla kammɔ kalɔ aani kalɛ baavá kugyii kebi. Na Apolo néwi-ka ntu. Nsu Katɔti náya na kálɛ lili. 7Ɔmɛni ɔsu ni, ukyuli ɔni náva ku ukyuli ɔni néwi ntu ni, bana ƒui baaadi lɛla lɛdi. Na mmomu Katɔti ɔdi nda, ɔsika anwu náya na kálɛ lili. 8Kavumana kadi keeebo ukyuli ɔni náva ku ɔni néwi-ka ntu kemo. Katɔti kani ndubɔƒɔ bana ƒui kayu na bana kabla kenye. 9Ɔsika bɔdi bakpana na kabla kenwi kemo. Na bɔ́sala bɔɔbla-ka teete Katɔti. Na amii bise aani Katɔti kemo kani lɛlɔ na bunye bɔɔtuma. Na bise lɛnɔ aani ɔtɔ ɔni na Katɔti ɔ́tu. 10Na Katɔti lɛla lɛni na úte-mi kenye ni, lɛ́bla kabla aani ɔtɔ ɔtune ɔbuni kalɛ. Na lɛ́kya ɔtɔ kalɔ lɛtabi. Na ukyuli bamba úbo ɔɔtú taasia. Nsu ɔdi ka ɔdi biala ɔnu kaduɛ kalɛ na ɔɔtú taasia ɔtɔ ɔmmɔ lɛlɔ. 11Ɔsika Yesu Kristo na Katɔti úti ɔ́bla ɔtɔ kalɔ lɛtabi lɛni kani lɛlɔ na bekyuli batu ɔtɔ basia. Na ɔdi ɔsɔ ulakana na wakya lɛtabi lɛbambadi lɛdi kalɔ. 12Badi badubuti sika ugyiedi iye ɔƒualadi iye atabi ani náƒɔ kuye iye ligyii iye livo batu ɔtɔ ɔmmɔ. 13Nsu si ɔtɔ ɔni na ɔdi biala ɔ́tu ɔdia iye ɔɔɔdia ni, Kristo limeyi bonwu lɛmmɔ ndubudie bana kabla bɔtina. Ɔsika limeyi lɛmmɔ lɛlɔ ni, ogya ndubo ɔdi biala kabla keyi budie. Ogya ɔmɛni ndubo kabla biala bɔkɔku bɔnu na ɔnu si kabla kammɔ kadia. 14Si lɛla lɛni na ɔdi úti ɔ́tu ɔtɔ ɔ́sia ɔtɔ kalɔ lɛtabi lɛmɛni lɛlɔ lɛ́kana bunye si ogya ɔ́kywi ɔ́vi-ni lɛlɔ ni, ɔtune ɔmmɔ ɔdubɔƒɔ lɛyuƒɔla. 15Nsu si ɔdi atula ani na úti ɔ́tu ɔtɔ ɔmmɔ ákywi ni, ulákɛ lɛyuƒɔla lɛdi. Nsu anwu ɔlati ɔdubɔkɛ bɔƒɔ aani si úkeli ɔ́lɛ ogya ɔmmɔ kemo. 16Bɛti nwaa ka amii alati ndi Katɔti kakpakɔ. Na Katɔti Kɔyu kɔkya-mii lɛlɔ kemo. 17Ɔsika Katɔti kakpakɔ kese kedee, na amii ndi nwuna kakpakɔ kammɔ. Anwuɔsu si ɔdi úgyingya Katɔti kakpakɔ kammɔ ni, Katɔti ɔdubɔyila-nwu udu. 18Bina akɔ ɔdi utatɔlɔ lɛlɔ. Si bina akɔ ɔdi ɔɔnu lɛlɔ aani kayawi kamɛni ɔnundane ni, ɔbla lɛlɔ ɔdɔlɔdi mmomu na bekyuli anumi kalɛ na wenwini ɔnundane geen sɔsɔ na Katɔti anumi. 19Ɔsika lɛla lɛni na bayawine baanu aani lɛnunda na kayawi ni, ani ndi kɔdɔlɔ na Katɔti anumi. Na lɛni na Bunweni Kedee Ɔku ɔ́su ɔnini, “Banundane kakwɛ na Katɔti uuti taakywɛ ama alati kakpagyuɛ.” 20Na básɔ bénweni banii, “Katɔti ɔgyi ka banundane bamɛni kasusu kaaadi lɛla lɛdi.” 21Ɔmɛni ɔsu ni, utalɛka ukyuli ɔdi utaakun lɛmɛnɛ na lɛla lɛni na bekyuli bakana bɔbla lɛlɔ. Ɔsika geen geen ni, lɛla biala lise lite bina bɔdia. 22Paulo iye Apolo iye Petro iye kayawi kamɛni o-o iye kukpi ku ngba o-o iye ɔƒɛni ku uwi ɔni mebo ni, ala ammɔ ƒui adi amii adi. 23Na Kristo ɔdi na bɛdi. Na Kristo lɛnɔ ɔdi Katɔti ɔdi.

will be added

X\