1 KORINTOƑUƆ 16

1Ɔƒɛni ni, bínweni lɛla lɛdi bɛ́siku egulabi ani na bɛɛyɔ́ ka biyi bɛsala na biti bibunku Katɔti bekyuli bani nkya Yudea kalɔ lɛlɔ. Na ɔdi ka bɛbla lɛla lɛni na lɛ́su Galatiƒuɔ baƒɔtaadine nnii babla. 2Na Kwasida limeyi biala ni, ɔdi biala ɔklibi lɛla lɛdi use sɛsɛɛ na kalɛ na ɔ́kɛ kenye na ɔklibi-nya use kalɛ na ɔ́sɔ ulabla egulabi adi buyi si líbo-mii kudɔ. 3Na si líbo ḿbeduo ni, ndubute bekyuli bani na amii alati bɛ́ƒuna kakunkɛ kani na badubuti bada asa beti bina etela ammɔ beteesienku Yerusalem. 4Na si ɔ́manku ka ami lɛnɔ lisie ni, na bɔsiaku lɛlɔ. 5Ndubɔsia Makedonia asa na mebedu-mii kudɔ, ɔsika ɔdi ka lɛka mmɔ bɔsia. 6Use-mi aani ndubɔdi emeyi alɛɛ adi na bina kudɔ mmɔ. Ɔƒɛni kalɛ kɔyɔ uwi ɔmmɔ ƒui ni, ndubɔkya-mii kudɔ. Na ɔmmɔ kama ni, bɛdubudie-mi ulu na lisie kesii biala na ɔ́manku ka lisie. 7Naaawia ka likeli mbavi-mii kudɔ kani. Mmomu mɔɔyɔ́ ka lɛkya-mii kudɔ na uwi utu blii si Blɔti úte kuƒi kɔmmɔ. 8Ndubo Eƒeso mɛni bɔkya butédu Pentekoste limeyi lɛlɔ. 9Kuƒi kɔbuni kɔkya mɛni geen ute kabla kenengudi kani náƒɔ kuye geen, ina ka bekyuli bani mɔɔta teenye-mi lɛlɔ na kabla kani mɔɔbla na mɛni bemomo. 10Si Timoteo úbeduo-mii kudɔ ni, na bɛƒɔ-nwu kaduɛ. Ɔsika ɔɔbla kabla teete Blɔti aani kalɛ kani na ami lɛnɔ mɔɔbla. 11Ɔdi biala utanu-nwu anumi klukui. Mmomu bibunku-nwu na usie anumi na nwuna ulu busie kemo ku keyi buɛɛ kalɛ na wasɔ wenwini webo-mi kudɔ. Ɔsika mɔɔnu-nwu anumi ka unwini ubo ku nwuna banwa baƒɔtaadine. 12Ɔƒɛni na bula ɔnwa Apolo litemi lɛlɔ ni, lɛ́ɛkya-nwu ogya kɔlɛ kɔlɛ ka ubo-mii kudɔ ku banwa badi. Nsu útenu tɔ kalɔ kaduɛ ka ubo uwi ɔmɛni kemo. Nsu lɛ́ƒɔ lɛ́di ka si kuƒi kɔ́tɛ ni, ɔdububo. 13Binye kagyumana na binye kpakplaa na bɔƒɔtaadi bɔmmɔ kemo. Bise kayi na bɛyu ɔkplu. 14Na bɛbla bina kabla ƒui na bɔyɔ kemo. 15Bɛgyi Steƒana ku nwuna kaduli bekyuli. Ama ndi bekyuli bedeedi bani nénwini kayi na Akaia kalɛkɛ lɛlɔ mmɔ. Na béti lɛlɔ béte ka beteebunku Katɔti bekyuli. Banwa, muuvele-mii nnii, 16biti ɔbu bite batɔnkune bamɛni ku babambadi bani muubunku-ma kabla kammɔ. 17Lɛlɔ lɛɛyɔ́-mi ka Steƒana ku Ƒotunato ku Akaiko bébeduo, na ɔ́bla-mi aani amii na lɛ́nu. 18Báya na lɛ́sɔ lɛ́kɛ ɔkplu aani kalɛ kani na bákya-mii ɔkplu. Na bekyuli bamɛni udu bámanku ka babu-ma geen. 19Baƒɔtaadine bani nkya Asia kalɛkɛ lɛlɔ ƒui beegyele-mii o-o! Akwila ku Priskila ku lɛkpa lɛni mɔɔsa na bana kaduli beegyele-mii kaduɛ na Blɔti lɛnyi kemo. 20Banwa bani nkya mɛni ƒui beegyele-mii o-o! Bɛkya lɛlɔ kɔgbu na bigyele lɛlɔ aani banwa kalɛ. 21Ami ɔlati mina kɔnu na líti muunweni ɔmɛni nnii, “Ami Paulo muugyele-mii o-o!” 22Ukyuli biala na ulayɔ Blɔti ni, ɔdubɔnuku-ni! O Blɔti, bo! 23Blɔti Yesu Kristo lɛƒɔndia lɛsiaku-mii. 24Líti bɔyɔ geen muute-mii na Yesu Kristo lɛnyi kemo. Ɔsia lɛni.

will be added

X\