1 KORINTOƑUƆ 15

1Banwa, ɔƒɛni ni, mɔɔyɔ́ ka binyimo litemi buni lɛni lɛsa na lɛ́kɔ líte-mii. Litemi lɛmɛni na bɛ́ƒɔ bɛ́di na binye bɔƒɔtaadi bɔmmɔ lɛlɔ kpakplaa. 2Na ani ndi litemi buni lɛmmɔ na nina lɛsa na lɛ́kɔ líte-mii. Litemi lɛmmɔ ndubɔƒɔ-mii ngba si bɛ́da-ni kpakplaa amu ntu ukpludi na bɛnii bɛ́ƒɔ-ni bɛ́di. 3Lɛla lɛni na lɛ́ƒɔ lɛ́siku Blɔti kudɔ ni, ani kani na líti muute-mii. Na ani ndi lɛla lɛni náƒɔ kuye lítulo ƒui, ka Kristo úkpi úte-bu na bula alaekpidi ɔsu aani kalɛ na bénweni bákya Bunweni Kedee Ɔku kemo. 4Na báva-nwu, na Katɔti ɔ́gyila-nwu ɔ́lɛku bekpine akɔ emeyi atɛ kama, na úbo uli ngba aani kalɛ na ɔkya Bunweni Kedee Ɔku kemo. 5Na údie lɛlɔ ɔ́tina Petro ku batalane leevu-inyɔ bammɔ. 6Ɔmmɔ kama ni, údie lɛlɔ ɔ́tina nwuna basiakune bani ntulo nkyuli eti leevu na mmɔ. Na bana akɔ badi bamua belie ngba ɔmwi, ina ka badi béekpi. 7Na ɔmmɔ kama údie lɛlɔ ɔ́tina Yakobo ku batalane bammɔ ƒui. 8Na kekplokɔ ni, údie lɛlɔ ɔ́tina ami lɛnɔ ina ka lɛlɛ ukyuli ɔni na nwuna bɔwɔ bɔ́bla kekuma. 9Ɔsika ami ndi batalane bammɔ akɔ ubliidi ƒui. Na ńtamanku ka balɔ-mi banii ɔtalane muedi, ɔsika ami líkpoku Katɔti baƒɔtaadine lɛkpa lɛmmɔ. 10Nsu ɔkɛnku Katɔti lɛƒɔndia ɔsu ni, ndi ukyuli ɔni ndi ɔƒɛni. Na nwuna kaƒɔbuni ala ani na úte-mi ni, ánwu ebi. Na lɛ́bla kabla kpakplaa lítulo batalane bakladi ɔni na bekyuli baaasia anu ina ka ɔɔɔdi ami ɔlati ɔyikun kemo na ɔdi. Mmomu Katɔti ɔyikun nkɛ-mi lɛlɔ na lɛ́bla ɔmɛni. 11Anwuɔsu si ami násu-mii lɛla lɛdi o-o, iye ama násu-mii o-o ni, lɛlakpa linwi lɛmɛni kani na bɔɔsu. Na ani na bɛ́ƒɔ bɛ́di. 12Ɔƒɛni ka kenye kani na bɔɔsu ndi ka Katɔti ɔ́gyila Kristo ɔ́lɛku bekpine akɔ ni, bi ɔsu na bina badi bɛɛsu bɛnii Katɔti ulágyila bekpine na basɔ bebelie ngba? 13Si sɔsɔ na use lɛni ni, na ɔɔtina ka Katɔti útagyila Kristo útalɛku bekpine akɔ. 14Na si Katɔti útagyila Kristo útalɛku bekpine akɔ bɔdi ni, na lɛsa lɛdi liiibo na bɔɔkɔ́ bute-mii. Na lɛla lɛdi lɛnɔ liiibo na bɛƒɔ bɛdi. 15Na ɔni nsɔ mbo ɔkplu ntulo ndi ka ɔɔtina ka bɔɔnyi ɔkɔ taasia Katɔti ka anwu nágyila Yesu ɔ́lɛku bekpine akɔ. Nsu si sɔsɔ na ɔdi ka bekpine baláta teelie ngba ni, na útagyila Yesu. 16Anwuɔsu si sɔsɔ na ɔdi ka ulágyila bekpine taasiku kekpine ni, na bɛgyi bɛnii útagyila Yesu útalɛku bekpine akɔ. 17Na si Katɔti útagyila Yesu útalɛku bekpine akɔ bɔdi ni, na bina bɔƒɔtaadi buuubo kɔsia kɔdi, na bɛmua bɛkya bina ekpidi kemo. 18Na nwuna kalɔ ndi ka Kristo baƒɔtaadine bani nékpi lɛnɔ báyii. 19Na si kayawi kamɛni ngba bulie kani ɔsu na bula anu aasia Kristo lɛlɔ ni, na bula lɛlɔ libo kɔnyana litulo bekyuli ƒui. 20Nsu litemi geen lɛmmɔ ndi ka Katɔti ɔ́gyila Kristo ɔ́lɛku bekpine akɔ. Na ɔmɛni ndi bula kama kekpokɔ ka bani ƒui ntɛ kekpine badubɔsɔ bɔta. 21Ɔsika kalɛ na kukpi kɔkɛnku ukyuli lɛlɔ na kúduo bekyuli akɔ ni, lɛni kani na bekpine badubo bɔsɔ bɔta ɔkɛnku ukyuli kani lɛlɔ. 22Kalɛ na bekyuli bani nálɛ bási Adam kemo ƒui békpi ka báblaku-nwu unwi ɔsu ni, lɛni kani na Katɔti ɔdubɔsɔ ɔgyila bekyuli ƒui ɔlɛku kekpine na belie ngba ɔkɛnku bana unwi bɔbla ku Kristo ɔsu. 23Nsu Katɔti ɔdubɔgyila ɔdi biala na ulu ɔni na Katɔti ɔlati úse úse lɛlɔ. Na Kristo ndi udeedi. Na uwi ɔni lɛlɔ na wasɔ webo ni, bani na béti lɛlɔ béte Kristo ɔmmɔ na ɔdubɔsɔ ɔgyila. 24Ɔmmɔ kama ni, kawɔlɔkɔ kammɔ kadububo. Na Kristo ɔdubɔyila bayikune ku kenyekɔ ku ɔyikun ƒui udu. Na Kristo ɔdubuti lɛga kadikɔ kammɔ ɔkya Katɔti ɔni ndi Ɔti enu kemo. 25Ɔsika Kristo ɔdubo lɛlɔ butaadi wetédu ka Katɔti úti nwuna bekisine ƒui ɔ́kya Yesu lɛgba kalɔ. 26Na ukisine ukplodi ɔni udu na ɔdubɔyila ndi kukpi. 27Ɔsika Bunweni Kedee Ɔku ɔ́su ɔnini, “Katɔti úti ala ƒui ɔ́kya-nwu lɛgba kalɔ.” Na use nwaa ka si básu banii ala ƒui ni, ɔmmɔ ulátina ka Katɔti ɔni néti ala ammɔ ɔ́kya Kristo lɛgba kalɔ lɛnɔ ubunku. 28Na si uwi ɔni na Katɔti úti ala ƒui ɔ́kya Kristo kalɔ ɔ́wɔlɔ ni, anwu Kristo ɔni ndi Katɔti Ubidi ɔmmɔ ɔdubuti lɛlɔ ɔkya Katɔti ɔmmɔ kalɔ na Katɔti ɔmmɔ ɔdi ala ƒui lɛlɔ kede kede. 29Ɔƒɛni ni, na bekyuli bani mɔɔƒɔ́ ntu bɔkpila ɔdi na bekyuli bani néekpi lili ni, bi na ɔbladu ɔmmɔ ɔdanku? Na bi mɔɔlɛ́ taasiku ɔmmɔ kemo. Si sɔsɔ na ɔdi kalɛ na badi baasu banii basɔ balata balálɛ kekpine na bebelie ngba ni, bi ɔsu na baakpila bekyuli bammɔ ntu na bani néekpi lili? 30Na abu batalane nɔɔ? Bi ɔsu na bula ngba bɔkya ɔgbankpi kemo uwi biala? 31Banwa, kukpi ɔgbankpi ɔsiaku-mi kadi biala megye! Na mɔɔkɔliku lɛlɔ katɔ na amii ɔsu ɔkɛnku kalɛ na bɔ́bla unwi ku Kristo ɔsu. Anwuɔsu na muudie ɔmɛni keyi nwaa. 32Nsu si kayawi kamɛni kasusu kani ɔsu na líkpoku bekyuli bani nse aani beƒiebuo na Eƒeso ni, bi kɔsia na lɛ́kɛ? Na si bekyuli basɔ balata balálɛ kekpine na bebelie ngba bɔdi ni, na bɛgyi bɛnii ɔlɛka bɔbla aani kalɛ na lɛsugba lɛdi lɛɛsu lɛnii, “Bɛya bɔdi na bɔni, ɔsika kɔnaadi bɔdubo bukpi.” 33Bitabla susuusu. Kɔkpana kukpidi kuubile udu buni. 34Bɛsɔku kasusu buni bɛbla, na bɛda bina ekpidi lilu bɛva. Mɔɔsu-mii nwaa kalɛ na kɔƒa kukpo-mii ka bina badi bɛɛɛgyi Katɔti. 35Ukyuli ɔdi ɔdubuye ɔnii, “Dɛ na baasɔ taagyila bekpine na baasɔ teebelie ngba? Na ɔlɔna ɔmani udu ndubo-ma bɔkya?” 36Bekyuli susuusu! Si bɛ́va edula kebi bɛ́kya kalɔ ni, lilakwɛ teenwini lɛla lɛni mbo ngba si útebu. 37Na lɛla lɛni na bɛɛvá ni, edula kebi kani na kadi ɔƒaalɛ lɛntabi na lɛdi iye edula kebi kabambadi kadi. Na ɔɔɔdi kebi kammɔ kugyii na bɛɛkya kalɔ asa na ɔɔlɛ́ lili kama. 38Katɔti muute kebi kammɔ ugyii udu ɔni na ɔɔyɔ́. Uute kebi biala ku kana kugyii udu ɔni námanku-ka. 39Na ala ani ƒui nli ngba ni, ɔlɔna ɔɔɔdi ɔlɔna udu unwi. Bekyuli bebo bana ɔlɔna bun. Na bebuo lɛnɔ bebo bana ɔlɔna bun. Baasɛ lɛnɔ bebo bana ɔlɔna, na kɔbɛ lɛnɔ kubo kuna ɔlɔna bun. 40Katɔ ala akya. Na kayawi kamɛni lɛlɔ ala lɛnɔ akya. Katɔ ala bɔdia bɔvumana ku kalɔ lɛlɔ ɔlɔna bɔdia. 41Ɔƒɛ ɔdanku nwuna bukeye, na kɔbuli lɛnɔ kɔdanku bukeye bɔbambadi. Na ayabi lɛnɔ ana bukeye buse bun. Na ayabi ammɔ akɔ muedi kavumana kakya ana bukeye kemo. 42Lɛni kani na ɔdubo buse uwi ɔni na Katɔti ɔdubɔgyila bekpine na basɔ bebelie ngba. Si báva ukyuli ɔlɔna ni, ɔdi lɛla lɛni muubie taayii udu. Na si bágyila-nwu ni, ɔsɔ ulekpi. 43Si uwi ɔni na báva-nwu ni, údubie na use kpɛtɛ kpɛtɛ. Na si uwi ɔni na bágyila-nwu básiku kekpine ni, ɔdubɔdia bɔnu na ɔyu ɔkplu. 44Uwi ɔni na báva-nwu ni, ɔdi kayawi ɔlɔna ɔni muukpi. Na si bágyila-nwu ni, únwini kɔyu kemo ɔlɔna. Si kayawi ɔlɔna ɔkya ni, na bɛgyi bɛnii kɔyu kemo ɔlɔna lɛnɔ ɔkya. 45Ɔsika ɔkya Bunweni Kedee Ɔku kemo ka ni, “Ukyuli udeedi ɔni ndi Adam ni, Katɔti nédie-nwu na úte-nwu ngba aani ɔyawine.” Na Adam ukplodi ɔmɛni anwu ni, ɔdi Kɔyu kɔni muute ngba geen. 46Ɔɔɔdi kɔyu kemo lɛla mɔɔgyú taatɔ. Mmomu ɔlɔna kemo lɛla mɔɔtɔ. Kama asa na kɔyu kemo lɛdi lɛɛsia. 47Adam udeedi ɔni na Katɔti úti lɛti ɔ́vɔ ni, kalɔ lɛlɔ na ɔ́si. Na Adam unyɔdi ni, katɔ na ɔ́si. 48Na bekyuli bani na kalɔ lɛlɔ mɛni na bási ni, bese aani ukyuli ɔni na béti lɛti bávɔ-nwu. Na bani na katɔ na bási ni, ama lɛnɔ bese aani ukyuli ɔni nási katɔ. 49Kalɛ kani na bubo ukyuli ɔni nási kalɔ lɛlɔ mɛni udu ni, lɛni kani na ukyuli ɔni nási katɔ ɔdubɔya na bɔkɛ nwuna udu. 50Banwa, lɛla lɛni kalɔ na muudie ndi ɔmɛni. Lɛla lɛni ndi ɔlɔna ku ubugya ni, lilakana Katɔti lɛga kadikɔ ala bɔdi. Na lɛla lɛni muubie taayii udu ni, lilakana na lɛkya kesii kani na lɛla lɛni neeebie taayii udu. 51Binu lɛbɛla lɛmɛni. Ɔɔɔdi bula ƒui ndubukpi. Nsu si kakpɛɛ kekplodi káku ni, Katɔti ɔdubo bula ƒui udu bɔvumana kɔnakunwi. 52Na ɔdubɔbla aani kalɛ na beebó anumi. Ɔsika si kakpɛɛ kammɔ káku ni, Katɔti ɔdubɔgyila bekpine ɔni na basɔ belekpi kudii. Na ɔdubo bula ƒui udu bɔvumana. 53Ɔsika lɛla lɛni muubie taayii udu ni, badubo-ni bɔvumana bunwini lɛla lɛni nsɔ neeebie taayii udu. Na lɛla lɛni muukpi lɛnɔ ni, ɔdubo-ni bɔvumana bunwini lɛla lɛni nsɔ naaadubo bukpi. 54Anwuɔsu si ala amɛni álɛ na bávumana ala ebiedi na énwini ani nsɔ neeebie ni, na Bunweni Kedee Ɔku kemo etemila ani mɔɔsu anii, “Báyila kukpi udu na bɔdi lɛlɔ!” ébo éte lɛni sɔsɔ. 55Na bénweni lɛnɔ banii, “Kukpi, wɛ na ƒula lɛlɔ bɔdi bɔkya. Na wɛ na ƒula ɔyikun ɔni mɔɔta-bu mmɔ ɔkya?” 56Kukpi kɔɔkɛ́ ɔyikun ɔni na ɔda ɔɔta-bu taasiku likpidi kudɔ. Na likpidi lɛnɔ lɛɛkɛ́ nwuna ɔyikun taasiku ɔda bubo kudɔ. 57Nsu bɔɔgyá Katɔti enu. Anwu náya na bɔ́di lɛlɔ ɔkɛnku Blɔti Yesu Kristo lɛlɔ! 58Anwuɔsu ni, banwa, binye kpakplaa na bitagbanta. Na binye Blɔti kabla lɛlɔ uwi biala. Ɔsika bɛgyi ka lɛla lɛdi liiibo na bɛdubɔbla na Blɔti kabla kemo na wabla keeke.

will be added

X\