1 KORINTOƑUƆ 14

1Anwuɔsu ni, bɔyɔ na ɔdi ka bina ƒui bɛwia kpakplaa na bɛkɛ. Na biti bina anu ƒui bɛsia Kɔyu kemo etela lɛlɔ. Na litela lɛni ntulo ƒui ndi ka bidie Katɔti litemi kenye. 2Ukyuli ɔni muutemi adi lidu ni, ulátɛmiku bekyuli, mmomu Katɔti na ɔɔtɛmiku. Ɔsika ukyuli ɔdi ulenu-ni kalɔ, na bɔsu na ɔɔsu ala abɛdi ɔkɛnku Katɔti Kɔyu ɔyikun lɛlɔ. 3Nsu ukyuli ɔni muudie Katɔti litemi kenye teete bekyuli ni, uubunku-ma na ɔɔkya-ma ogya na ɔɔsia-ma kɔnu. 4Ukyuli ɔni mɔɔtɛmi adi ani kalɔ na bekyuli belenu ni, anwu lɛti pɛ lɛlɔ kani na uubunku. Nsu ukyuli ɔni muudie Katɔti litemi kenye ni, uubunku baƒɔtaadine lɛkpa lɛmmɔ ƒui. 5Mɔɔyɔ́ si bina ƒui bɛɛkana na bɛɛtɛmi adi lidu. Nsu si bɛ́kana na biidie Katɔti litemi kenye teete bekyuli ni, ɔdia-mi utulo. Ɔsika ukyuli ɔni muudie Katɔti litemi kenye teete bekyuli ni, ubo kɔsia utulo ukyuli ɔni mɔɔtɛmi adi lidu lidu, amu ntu ukyuli ɔni makana nwuna ala ani na ɔɔsu kalɔ budie ɔkya-ma akɔ mmɔ, kalɛ na baƒɔtaadine lɛkpa lɛmmɔ lɛkɛ kebunku. 6Ɔmɛni ɔsu, banwa, si líbo-mii kudɔ na mɔɔtɛmi adi lidu lɛni na ɔdi ulenu kalɔ ni, bi kɔsia na bɛdubɔkɛ na ɔmmɔ kemo? Bilákɛ kɔsia kɔdi munu munu, amu ntu lídie lɛla lɛdi kalɔ líte-mii ɔ́si Katɔti kudɔ, iye lɛ́ya na bɛ́ti lɛla lɛdi, iye lídie Katɔti litemi lɛdi kenye, iye lɛ́tina-mii ala adi. 7Bɛkali bɛnu ala ani na bɔɔgyá ani na ngba bɔdi buuubo-nya kemo aani kakpɛɛ iye ɔsankuo ani na anya alati alakana lɛnu budie. Dɛ na ukyuli ɔdi ɔdubunu na ɔgyi ɔnu ɔni na beedie si ukyuli ɔni mɔɔvwii kakpɛɛ iye ɔɔgyá ɔsankuo ɔmmɔ ulagya-nwu kaduɛ kalɛ na akana na enu ɔnu ɔmmɔ lɛdi ati nwaa? 8Na si ukyuli ɔni mɔɔvwii kakpɛɛ ulávwii-ka taalɔ ala ammɔ kaduɛ ni, dɛ na wabla asa na bekyuli baklibi lɛlɔ bete kekpo? 9Lɛni kani na use ka ukyuli ɔni muudie lɛla lɛdi kenye na adi lidu lidu kemo ni, bekyuli belénu lɛla lɛni na ɔɔsu mmɔ kalɔ. Mmomu ɔdubo bunwini ɔƒɛƒɛɛ na ɔyii ɔkya kayaa. 10Adi pii akya kayawi, na lɛdi lɛdi liiibo lɛni neeebo kalɔ budie. 11Nsu si ɔdi ulénu lɛdi lɛni na mɔɔtɛmi kalɔ ni, na línwini ɔƒɔ na nwuna kudɔ, na anwu lɛnɔ únwini ɔƒɔ na mina kudɔ. 12Ka bina ƒui anumi égyie ka bɛkɛ Kɔyu kemo etela ni, bɛya na anumi egyie-mii na bɛkɛ etela ani mebunku baƒɔtaadine lɛkpa lɛmmɔ lɛtɔtɔ busie mmomu utulo. 13Na ukyuli ɔni mɔɔtɛmi na adi lidu lidu kemo ni, uvele Katɔti na ute-nwu litela lɛni na uti udie ala ani na ɔɔsu mmɔ kalɔ. 14Ɔsika si lɛ́sia ulu ɔmɛni lɛlɔ lɛ́kpali katɔ ni, mina kɔyu aku kɔɔkpali katɔ bɔdi, nsu ɔɔɔdi ku mina kasusu. 15Anwuɔsu bi na ɔdi ka lɛbla? Ndubɔkpali katɔ ku mina kɔyu bɔdi, nsu ndubɔkpali katɔ ku mina kasusu lɛnɔ. Na ndubudie lɛnu ku mina kɔyu, nsu ndubudie lɛnu ku mina kasusu lɛnɔ. 16Na si enye aagyá Katɔti enu na ƒula kɔyu kemo kani ni, dɛ na wabla asa na ukyuli ɔni nkya-a kudɔ unu lɛla lɛni na aasu asa na wasu ɔnii ƒula katɔ bɔkpali bɔsia lɛni aani kalɛ na aagyá Katɔti enu ka ulenu lɛla lɛni geen na aasu mmɔ kalɔ? 17Na si ina ƒula enu ani na aagyá Katɔti adia muedi ni, bekyuli bamba balákɛ kɔsia kɔdi munu munu. 18Mɔɔgyá Katɔti enu ka mɔɔtɛmiku-nwu na adi lidu lidu kemo teetulo bina akɔ ɔdi biala. 19Nsu na bula kasalakɔ ni, ndubɔyɔ ka lɛsu etemila alɔ ani kalɔ na bekyuli badubunu na liti lɛtina bekyuli bamba ala litulo ka ntaasu etemila pii na adi lidu lidu kemo. 20Banwa, bitabla lɛlɔ aani banamu na bina kasusu kemo. Mmomu bɛbla lɛlɔ aani benengu si biiti kasusu. Nsu na likpidi lilu lɛlɔ ni, bɛbla lɛlɔ aani banamu. 21Na Bunweni Kedee Ɔku kemo ni, Blɔti ɔ́su ɔnini, “Ndubɔtɛmiku mina kadi bekyuli ɔkɛnku bekyuli bani mɔɔtɛmi na adi lidu lidu kemo. Na ndubɔtɛmi lɛsiaku baƒɔ kenye kemo, nsu belénu-mi lɛdi.” 22Anwuɔsu ni, adi lidu bɔtɛmi ɔdi lɛla lɛni nse nte bani nátaƒɔ bátadi. Nsu Katɔti litemi kenye budie ni, ɔdi lɛla lɛni nse nte baƒɔtaadine na ɔɔɔdi bani nátaƒɔ bátadi. 23Ɔmɛni ɔsu si baƒɔtaadine bammɔ ƒui bása na ɔdi biala úse kalɔ ɔɔtɛmi na adi lidu lidu kemo na banii ukyuli bamba ɔdi ɔkya-mii akɔ iye bekyuli bani naaadi baƒɔtaadine badi bébo-mii akɔ ni, bilánu ka badubɔsu banii biikpi libuo yoo? 24Nsu si bina akɔ ɔdi biala uudie Katɔti litemi kenye na ukyuli keeke iye ukyuli ɔni nátaƒɔ útadi ɔdi úbo-mii akɔ ni, ɔdubɔnu nwuna likpidi ɔti ɔkɛnku lɛla lɛni na uunú ɔsu. Ala ani na uunú adubɔtina-nwu ka Katɔti ɔɔtɛku-nwu litemi. 25Na anwu ɔlati ndubudie nwuna ala abɛdi keyi na ɔdubɔyu ɔtɛ kalɔ na umwi Katɔti na udie kenye ɔnini, “Sɔsɔ ni, Katɔti ɔkya-mii akɔ!” 26Banwa, mɔɔwia ka liti lɛla lɛdi libunku ɔmɛni na bina bɔsa kemo. Si uwi ɔni na bɛ́sa bɛnii bɛɛkpali katɔ ni, ɔdi ubo ɔnu ɔni na ɔɔyɔ́ ka udie, na ɔdi lɛnɔ ubo lɛla lɛdi na ɔɔyɔ́-ka ɔtina. Na ɔdi lɛnɔ ɔɔyɔ́ ka udie Katɔti lɛla lɛdi ɔtina. Na ɔdi lɛnɔ ɔdanku kenye kadi na adi lidu lidu kemo, na ɔdi lɛnɔ kalɛ na udie ala ammɔ kalɔ. Nsu ɔlɛka bɛbla ala amɛni ƒui kalɛ na ute baƒɔtaadine lɛkpa lɛmmɔ kebunku. 27Si ɔdi ubo kenye kadi na ɔɔyɔ́ ka ɔsu na adi lidu lidu kemo ni, nkyuli aani inyɔ iye ɛtɛ si bémomo bágya basu bana kenye kani badanku atɔ asia. Na bakɛ ukyuli bamba ɔni lɛnɔ medie ala ani básu mmɔ kalɔ. 28Na si ɔdi uuubo na wedie ala ammɔ kalɔ bɔdi ni, ukyuli ɔni mɔɔtɛmi na adi lidu lidu kemo mmɔ ɔda ɔya na anwu ku Katɔti kani batɛmiku lɛlɔ. 29Nkyuli inyɔ iye ɛtɛ bani ndanku kenye kadi ɔ́si Katɔti kudɔ basu bana kenye na bakladi bawia etemila ammɔ kemo banu kaduɛ. 30Na si bani nlie kasalakɔ mmɔ ɔdi ɔ́ƒɔ linyesia lɛdi ɔ́siku Katɔti kudɔ ni, ɔdi ka ukyuli ɔni mɔɔtɛmi na adi lidu lidu kemo mmɔ ɔda nwuna kenye bɔsu ɔya na ute ukyuli ɔmmɔ kuƒi. 31Bina ƒui bɛkana na bɛsu bina kenye kani bɛda unwi unwi kalɛ na ɔdi biala ɔtɛya lɛla lɛdi na ɔkɛ ɔyikun bɔkya. 32Bekyuli bani muudie Katɔti kenye baakana bana lɛlɔ bɔda na kenye kani na baasu kemo. 33Ɔsika Katɔti ɔɔwia ka bɔbla ala ulu lɛlɔ. Na ɔɔyɔ́ ka amanku keyi buɛɛ. Na lɛni na ɔlɛka use na Katɔti baƒɔtaadine akpa ƒui akɔ. 34Ɔdi ka beleku baba lɛsɛ na ɔɔɔdi ka beteetemi na kasalakɔ. Mmomu ɔdi ka beboku lɛlɔ kalɔ aani kalɛ na Katɔti ɔda bubo bɔɔtina. Na beeebo kuƒi ka batɛmi. 35Na si baawia ka beye lɛla lɛdi kalɔ benu ni, bana bagya na ɔlɛka beye na kaduli. Ɔsika ɔdi kɔƒa ka uleku unye utaatɛmi na baƒɔtaadine lɛkpa lɛmmɔ anumi. 36Munuu ni, bɔsu bɛda bɛnii bina kudɔ na Katɔti litemi lɛmmɔ lɛ́kwɛ lɛ́si? Munuu bina kudɔ kani na litemi lɛmmɔ líbedu? 37Si bina akɔ ɔdi ɔɔkali ɔnii Katɔti kenye udiene na ɔdi iye ubo Kɔyu kemo litela lɛdi ni, ɔdi ka ɔnu ɔti ka lɛla lɛni na muunweni-mii lɛdi ɔda ɔni na Katɔti úbo. 38Na si ukyuli ɔmmɔ uuní litemi lɛmɛni ni, ɔdi ka amii lɛnɔ bini-nwu. 39Anwuɔsu ni, banwa, biti bina anu ƒui bɛsia Katɔti litemi kenye budie lɛlɔ. Nsu bitetile adi lidu bɔtɛmi ulu. 40Na ɔdi ka bɛbla lɛla biala na ulu ɔbuni lɛlɔ.

will be added

X\