1 KORINTOƑUƆ 11

1Bɛnu mina ɔbladu bɛtɛya aani kalɛ na ami lɛnɔ mɔɔnu Kristo ɔdi taatɛya. 2Muumwi-mii ɔsika bina anu asia-mi lɛlɔ uwi biala na biinyimo ala ani na lɛ́tina-mii na bɛɛbla taasiaku-nya lɛlɔ uwi biala. 3Nsu mɔɔwia ka binu kalɔ nwaa ka ni, Kristo ɔdi ukyuli biala lili. Na ɔgya lɛnɔ ɔdi uleku lili. Na Katɔti ndi Kristo lili. 4Anwuɔsu ɔnana ɔni mɔɔkpali katɔ iye ɔɔkɔ́ Katɔti litemi buni lɛsa na Katɔti kakpakɔ na úti lɛla lɛdi úbi lili ni, ɔɔkya Kristo kɔƒa. 5Na uleku ɔni mɔɔkpali katɔ iye ɔɔkɔ́ Katɔti litemi buni lɛsa na kakpakɔ na útamana lɛdiku lili ni, ɔɔkya ɔgyani kɔƒa. Na kavumana kadi keeebo anwu ku uleku ɔni nékpeyi lili na ɔɔɔda lɛlɔ ntɛ. 6Si uleku ɔmmɔ útamana lɛdiku lili ni, na ɔlɛka ɔkpɛ lili linwini. Na ka ɔdi lɛla lɛni muuwi uleku anumi kalɔ si úkpeyi lili iye ɔ́kpɛ lili ɔsu ni, ɔdi ka ɔmana lɛdiku lili. 7Útalɛka ɔnana ubi lɛla lɛdi lili, ɔsika Katɔti údie ɔnana na nwuna udu kenye. Na uudie Katɔti ɔbu keyi. Nsu ulekudi anwu uudie ɔnana ɔbu keyi. 8Ɔsika Katɔti útaka ɔnana budie bɔlɛku uleku kemo. Mmomu uleku na údie ɔ́lɛku ɔnana kemo. 9Na ɔɔɔdi uleku ɔsu na Katɔti údie ɔnana. Mmomu ɔnana ɔsu na Katɔti údie uleku. 10Na kayaa batu ɔsu ni, ɔlɛka uleku ɔmana lɛdiku lili uti ɔtina ka ɔkya ɔnana kalɔ. 11Na bula baƒɔtaadine ngba bulie kemo ni, uleku ulesie taaya ɔnana, na ɔnana lɛnɔ ulesie taaya uleku. 12Ɔsika kalɛ na bábla uleku bálɛku ɔnana kemo ni, lɛni kani na uleku lɛnɔ ɔ́wɔ ɔnana. Nsu lɛla biala ni, Katɔti kudɔ kani na lɛɛsí. 13Amii alati bɛbu bɛnu si ɔ́manku uleku ka unye utaakpali katɔ ɔni na útamana lɛla lɛdi lili? 14Kalɛ na Katɔti údie kayawi ala ni, ɔmmɔ lɛti ɔɔtina-bu lɛla lɛdi. Na útamanku ka ɔnana ɔda nwuna lili linwini use na liyi line gyɔlɔɔ. Ɔdi kɔƒa lɛla. 15Nsu si uleku linwini ani líne-nwu lɛni ni, ɔdi-nwu ɔbu. Ɔsika Katɔti úte-nwu linwini gyɔlɔɔ lɛmmɔ aani lɛla lɛni nébi-nwu lili. 16Nsu si ukyuli ɔdi ɔɔkya unyeƒi na ɔmɛni lɛlɔ ni, lɛla lɛni kani na ami masu-nwu ndi ka abu ku Katɔti baƒɔtaadine akpa ƒui bɔsɔ buuubo ulu ɔbambadi ɔdi na bula bɔsala bɔmmɔ kemo. 17Nsu na ala ani ndubo bɔtina mɛni kemo ni, ɔɔɔdi bumwi na nda-mii. Ɔsika si uwi ɔni na bíbasala ni, ɔɔɔdi lɛbuni mɔɔlɛ́ taasiku bina bɔsa bɔmmɔ kemo. Mmomu ala muubie teebu. 18Ɔsika kudeedi ni, línu ka si bɛ́sala aani baƒɔtaadine ni, biile lɛlɔ kemo akpa akpa. Na use-mi ka sɔsɔ na ɔdi. 19Unyeƒi ɔdi uuubo ka ɔdi ka kavumana kadi kakya-mii akɔ uti ɔtina bani ndi baƒɔtaadine geen kalɛ na bekyuli banu-ma bati. 20Na si bɛ́sala aani lɛkpa ni, ɔɔɔdi Blɔti adila kedee na bíbo bibadi. 21Ɔsika si bɛɛdi ni, bilénye taagya lɛlɔ asa na ɔdi biala uti nwuna adila ɔdi. Ɔmɛni ɔɔyá na kɔka kɔɔda badi na badi ama baaní ntɛ teekpi. 22Bubo na biiibo kɔduli kɔni kemo na bilie bɛdi na bɛni? Munuu bɔyɔ na bɛɛyɔ́ ka biwi lɛkpa lɛmmɔ anumi kalɔ na bɛkya baƒɔtaadine bani mɔɔyaki ala kɔƒa. Bi na ɔlɛka lɛsu-mii? Bumwi na ɔlɛka limwi-mii na ɔmɛni ɔsu? Oowo! 23Ɔsika lɛla lɛni na lɛ́ƒɔ lɛ́siku Blɔti kudɔ ni, ani kani na lɛ́tina-mii. Na usien ɔmmɔ asa na badubɔkya-nwu kakya ni, úti bodobodo, 24na ka ɔ́gya Katɔti enu ni, ɔ́ƒɛ-nwu kemo na ɔ́su ɔnini, “Ɔmɛni ndi mina ɔlɔna ɔni na ndubuti lɛkpa lite Katɔti na bina lili. Bɛƒɔ bɛdi na biti biteenyimo-mi.” 25Lɛni kani na adila ammɔ kama ni, úti ɔɔƒɛɛ na ɔ́su ɔnini, “Ɔɔƒɛɛ ɔmɛni ndi Katɔti bunyimi bɔwɔdi bɔni na úti mina ubugya úse likpo. Na uwi biala na bɛdubɔni-nwu ni, bɛni na biti biteenyimo-mi.” 26Ɔmɛni ɔɔtina ka uwi biala na bɛɛdi iye bɛɛní na ɔɔƒɛɛ ɔmɛni kemo ni, biibó Blɔti kukpi kudu wetédu uwi ɔni na wasɔ webo. 27Anwuɔsu ukyuli biala madi Blɔti adila amɛni iye wani na ɔɔƒɛɛ ɔmɛni kemo na ulu ɔni nátamanku lɛlɔ ni, ɔdubɔtina ka ɔ́bla likpidi ka útabu Blɔti ɔlɔna ku ubugya ɔmmɔ ɔsu. 28Ɔmɛni ɔsu ni, ɔdi biala ɔka nwuna lɛlɔ kemo buduo asa na ɔdi bodobodo na ɔni na Blɔti ɔɔƒɛɛ ɔmmɔ kemo. 29Ɔsika si útanu lɛla lɛni na Blɔti ɔlɔna ɔmɛni ɔdanku útati uwi ɔni na ɔɔdi bodobodo ɔmmɔ iye ɔɔní na ɔɔƒɛɛ ɔmmɔ kemo ni, ɔɔdi na ɔɔní na uuti litemi bɔtɛ teewi lɛlɔ. 30Ɔmmɔ náya na bina akɔ pii biiƒi na lɛlɔ liiibo-mii ɔkplu. Na pii lɛnɔ békpi. 31Na si bɔdubɔsia anu na bɔka lɛlɔ kemo buduo bɔnu ni, nka Katɔti ulatɛku-bu litemi. 32Nsu Blɔti ɔɔtɛku abu litemi na ɔɔní-bu kɔtu kalɛ na Katɔti ulayila-bu udu ku bekyuli bani nátaƒɔ bátadi. 33Ɔmɛni ɔsu ni, banwa, si bɛ́sala bɛnii bɛɛdi Blɔti adila ni, binye bɛgya lɛlɔ. 34Na si kɔka mɔɔda ɔdi ni, ɔlɛka ɔdi na nwuna kaduli kalɛ na Katɔti ulatɛku-mii litemi si bɛ́sala aani lɛkpa linwi kalɛ. Na etemila akladi anya ni, si líbo mmɔ ni, bɔdubɔda-nya bɔnu.

will be added

X\