1 KORINTOƑUƆ 10

1Banwa, mɔɔwia ka binyimo lɛla lɛni nálɛku bula bati kuuku bani násiaku Mose. Uyɔlɔ ɔ́tɔnku-ma, na ɔ́gyumana-ma ƒui. Na bávi Ɛpugyie ntɛ. 2Katɔti úti uyɔlɔ ku Ɛpugyie ɔmmɔ ɔ́bla-ma ntu bɔkpila ɔdi aani bekyuli bani nsiaku Mose kama. 3Bana ƒui bádi Kɔyu kemo adila enwi pɛ ammɔ. 4Na báni Kɔyu kemo ntu bunwi pɛ bɔmmɔ. Báni ntu básiku Kɔyu kemo lɛtakpɛ lɛni nkɛ nsiaku-ma mmɔ kemo. Na lɛtakpɛ lɛmmɔ lɛdi Kristo ɔmmɔ ɔlati. 5Uwi ɔmmɔ muedi kemo ni, lɛlɔ lítayɔ Katɔti na bana ketulodikɔ ɔbladu lɛlɔ. Anwuɔsu ni, békpi ketele kemo. 6Ɔmɛni ɔdi ala ani na bɔnu bɔtɛya kalɛ na alaekpidi emini asɔ alátaada-bu ɔkwɛ aani bana kalɛ, 7iye buti lɛlɔ bute lɛƒiɔkpa ala bɔbla aani bana kalɛ. Lɛni na Bunweni Kedee Ɔku ɔ́su ɔnini, “Bekyuli bammɔ bádu bebuo na báni ntɛ na badi adikpi limeyi, na bátɔ béte baƒiɔ.” 8Útalɛka butaabla kɔsɔnɔ bɔdi ala aani kalɛ na bana badi bábla, na nkyuli mpimu aavlanyɔ ɛtɛ békpi limeyi linwi. 9Na ɔɔɔdi ka bɔkɔku Blɔti bɔnu. Lɛni na bana badi bábla, na balakpi bádu-ma na békpi. 10Na ɔɔɔdi ka butaata teenye Katɔti lɛlɔ aani kalɛ na bana badi bábla ɔsu, na Katɔti ɔtu ɔni nda kukpi ɔyikun ɔ́kyula-ma. 11Ala amɛni ƒui álɛku-ma kalɛ na abu bɔnu bɔtɛya. Na bénweni-nya bése kalɛ na buti-nya bɔlɛ lɛlɔ. Ɔsika bula uwi ɔni kemo na bɔkya mɛni ni, úudu kawɔlɔkɔ. 12Ɔdi biala ɔni mɔɔkali ɔnii unye kpakplaa ni, ɔnu kaduɛ kalɛ na ulebuli. 13Lɛla biala lɛni nékpoku-ɔ lɛ́nu ni, nina udu lɛɛkana na liibo ukyuli biala lɛlɔ. Nsu ni, Katɔti ɔɔdi nwuna linyese lɛlɔ. Na ɔdubute-ɔ ɔyikun ɔni na eti enye lɛla lɛni mekpoku-ɔ manu kenye, na liletulo ƒula ɔyikun kalɛ na enye kpakplaa ete-nwu. Uwi ɔni kemo na lɛla lɛdi liikpóku-ɔ taanu ni, Katɔti ɔdubute-ɔ ɔyikun ɔni na eti enye ala ammɔ ƒui kenye, na ɔtina-a ulu ɔni lɛlɔ na asia na alɛ-nwu kemo. 14Anwuɔsu ni, banwa, bɛda lɛlɔ bidie lɛƒiɔkpa biala kemo. 15Mɔɔtɛmiku-mii aani bekyuli bani náda anu. Anwuɔsu bɛbu ala ani na mɔɔsu-mii mɛni kemo bɛnu. 16Ɔɔƒɛɛ ɔni na buuti taagya Katɔti enu ni, unye ute Blɔti ubugya. Na bodobodo ɔni na bɔɔbwɛ si bɔɔdi Blɔti adila kedee ni, ɔɔtina ka abu ku Kristo bɔɔbla unwi. 17Na ina ka bumomo ni, bɔdi ɔlɔna unwi pɛ. Ɔsika bodobodo unwi kani na bula ƒui bɔɔdi. 18Bɛbu bɛnu Israelƒuɔ ka ni, bekyuli bani mɔɔdi adila ani na béti bákpa béte Katɔti ni, báblaku Katɔti unwi. Ɔsika anwu na bákpa ala ammɔ béte na nwuna lɛkpabi lɛlɔ. 19Na ɔƒɛni ni, bɛɛkali bɛnii bɔɔsu na nda nnii baƒiɔ bani bávɔ béte lɛlɔ ni, ama lɛnɔ badi Katɔti ɔdi geen? Munuu adila ani na béti bákpa béte ala bamba amɛni adi lɛla geen lɛdi? 20Oowo! Lɛla lɛni na mɔɔsu-mii ni, ani ndi ka ala ani na béti bákpa na akpabi amɛni lɛlɔ ni, béti-nya bákpa béte ayu ekpidi, na ɔɔɔdi Katɔti. Na naaawia-mii nnii bɛbla unwi ku ayu ekpidi amɛni. 21Ɔɔɔdia ka ani asiku Blɔti ɔɔƒɛɛ kemo na asɔ atáni asiku ayu ekpidi lɛnɔ ɔɔƒɛɛ kemo. Útalɛka adi adila na Blɔti kakpakɔ na asɔ atádi adila na ayu ekpidi kakpakɔ lɛnɔ. 22Munuu bɛɛyɔ́ ka Blɔti uti nwuna kɔnyi ɔkya-bu? Bitaya bɔkali bɔnii bubo ɔyikun butulo-nwu. 23Bubo lɛsugba banii, “Kuƒi kɔtɛ na bɔbla lɛla biala.” Sɔsɔ na ɔdi. Nsu ɔɔɔdi lɛla biala ndia. Kuƒi kɔtɛ na bɔbla lɛla biala, nsu ɔɔɔdi lɛla biala mbo kɔsia lite-bu. 24Ɔƒɔtaadine ɔdi utawia anwu lɛti bɔdia, mmomu ɔwia lɛla lɛni madia mete nwuna ɔkpana lɛnɔ. 25Ebo kuƒi na eye lɛna lɛdi biala na beeyé na kuye na akun. Na ɔɔɔdi ka eye lɛla lɛdi enu na ati si lɛna lɛmmɔ lise kedee iye liiise. 26Ɔsika Bunweni Kedee Ɔku ɔɔsu ɔnii, “Kalɔ ku kana ala ani nkya-nya kemo ƒui ni, adi Blɔti adi.” 27Si ukyuli ɔni naaadi ɔƒɔtaadine ɔdi ɔ́lɔ-ɔ ɔnii baadi ku-nwu na átuna na ésie ni, lɛla biala na úte-ɔ ɔnii di ni, di na teye lɛla lɛdi enu ati si adila ammɔ ese kedee iye eeese. 28Mmomu si ukyuli ɔdi ɔ́su-ɔ ɔnii béti adila ammɔ bákpa béte baƒiɔ badi ni, tadi-nya. Ɔmɛni ɔdubɔya na kayi kelékpoku ukyuli ɔmmɔ. 29Ɔsika ɔɔɔdi awɔ ɔni nádi adila ammɔ na kayi kadubo bukpoku. Mmomu ukyuli ɔni nánu ɔ́su-ɔ na kayi kadubo bukpoku. Ukyuli ɔdi ɔdubɔkana na uye ɔnii, “Bi ɔsu na si mbo kuƒi na lɛbla lɛla lɛdi na ukyuli bamba kayi kani mekpoku-nwu ɔsu na ɔdi ka lɛda lɛla lɛmmɔ bɔbla lɛya? 30Si lɛ́gya Katɔti enu na lɛdila lɛni na úte-mi ɔsu ni, bi ɔsu na ukyuli ɔdi ɔnu ɔnii lɛ́ƒiɔ na ɔmɛni lɛlɔ ka lɛ́ɛgya Katɔti enu?” 31Nsu nyimo ka lɛla biala na ɔdi aabla iye aadi iye aaní ni, ɔlɛka abla ana ƒui kalɛ na eti ɔbu ete Katɔti. 32Bitabla lɛla lɛni maya na Yudaƒuɔ iye bani naaadi Yudaƒuɔ iye baƒɔtaadine belebo Katɔti kudɔ. 33Bɛbla kalɛ kani na mɔɔbla lɛla biala. Mɔɔsia anu kalɛ na naaata neeenye ɔdi lɛlɔ. Naaakali taanu mina lɛkɛ, mmomu lɛla lɛni madia mete ɔdi biala kalɛ na bakɛ bɔƒɔ.

will be added

X\