1 KORINTOƑUƆ 1

1Ami Paulo ɔni nkɛnku Katɔti lɛƒɔyɔ lɛlɔ ɔsu na ndi Yesu Kristo ɔtalane ku bula ɔnwa Sostene muunweni-mii ɔku ɔmɛni. 2Búnweni ɔku ɔmɛni buute Korintoƒuɔ baƒɔtaadine bani na ɔkɛnku Yesu Kristo lɛlɔ na Katɔti údie úse na ɔ́lɔ-ma ɔnii babla nwuna bekyuli kedee. Lɛni na ɔ́bla bekyuli bani ƒui lɛnɔ mɔɔkpali Blɔti Yesu Kristo. Anwu ndi Blɔti ute abu ku-ma ƒui. 3Buuvele bɔnii bula Unwoti Katɔti ku Blɔti Yesu Kristo lɛƒɔndia ku keyi buɛɛ kasiaku-mii. 4Mɔɔgyá Katɔti enu uwi biala na bina lili ɔkɛnku lɛƒɔndia lɛni na úte-mii ɔ́siaku Yesu Kristo lɛlɔ ɔsu. 5Ɔni bɛ́bla unwi ku Kristo ɔsu ni, bɛɛtí litemi buni lɛmmɔ na biidie-ni keyi na bínwini Kɔyu kemo balakɛne lɛnɔ. 6Yesu Kristo lɛlɔ litemi lɛmɛni lɛ́kɛ keliekɔ na bina akɔ kaduɛ. 7Ɔmɛni ɔsu ni, bilayaki litela lɛdi ɔni na binye bɛgya ka Katɔti ɔya na Blɔti Yesu Kristo ɔ́da ɔ́lɛ. 8Na ɔdubɔgyumana-mii na bɛda bina bɔƒɔtaadi kaduɛ utédu kawɔlɔkɔ. Anwu ndubɔya na si Blɔti Yesu Kristo úbo ubatɛku bayawine litemi ni, kɔtɔ bɔdu bɔdi bulebo-mii lɛlɔ. 9Katɔti ɔni nálɔ-mii ɔnii bɛbla unwi ku Ubidi Blɔti Yesu Kristo ni, ɔdi ukyuli ɔni lɛlɔ na bɛkada bikpo. 10Na kenyekɔ kani na Blɔti Yesu Kristo úte-mi kenye ni, mɔɔsu-mii kpakplaa aani mina banwa baƒɔtaadine kalɛ nnii bina ƒui binu lɛlɔ kalɔ kalɛ na lɛlɔ bule bɔdi bulakya-mii akɔ. Na bɛbla unwi na ala ani na bɛɛkali ku ala ani na bɛwia lɛlɔ. 11Ɔsika ni, banwa, bekyuli badi bási Klo kaduli na básu-mi nwaa banii kadɔ kakya-mii ntɛ. 12Lɛla lɛni mɔɔtina ndi ka bina akɔ ɔdi biala ku lɛla lɛni na ɔɔsu. Ɔdi ɔnii, “Ami Paulo kama na nsia.” Na ɔbambadi ɔnii, “Ami Apolo kama na nsia.” Na ɔbambadi lɛnɔ ɔnii, “Ami Petro kama na nsia.” Na ɔbambadi lɛnɔ ɔnii, “Ami Kristo kama na nsia.” 13Muuye-mii nnii Kristo ule lɛlɔ kemo akpa akpa? Munuu ni, Paulo nékpi na ugyii lɛlɔ na bina lili? Iye bákpila ɔdi ntu na Paulo lɛnyi kemo? Oowo! 14Mɔɔgyá Katɔti enu ka ńtabla ntu bɔkpila ɔdi ɔmmɔ ńtete bina akɔ ɔdi ntu Krispo ku Gaio lɛti pɛ. 15Anwuɔsu ukyuli ɔdi ulakana bɔsu ɔnii mina lɛnyi kemo na bákpila-nwu ntu bɔmmɔ. 16Línyimo ka Steƒana lɛ́bla ntu bɔkpila ɔdi ɔmmɔ líte ku nwuna kaduli bekyuli na nsɔ neeenyimo si lɛ́kpila ukyuli ɔbambadi ɔdi lɛnɔ. 17Kristo útatala-mi ɔnii mbo mbataabla ntu bɔkpila ɔdi teete bekyuli. Mmomu ɔ́tala-mi ɔnii mbakɔ litemi buni lɛmmɔ lɛsa nte bekyuli. Na naaasu-ni na kayawi lɛnunda ulu ɔdi lɛlɔ. Ɔsika naaayɔ ka ɔyikun ɔni nkɛnku kalɛ na Yesu Kristo úkpi na ugyii lɛlɔ mmɔ wayi udu na ɔbla keeke. 18Bekyuli bani na bana ɔbladu ɔ́ya na badaku bukpi na kɔyu kemo ni, Kristo kukpi na ugyii lɛlɔ kɔtɛ kɔdi adɔlɔla kute-ma. Nsu abu bani na Katɔti ɔɔyá na bɔɔkɛ́ bɔƒɔ ni, bɔgyi ka Katɔti litemi lɛmmɔ lɛdi Katɔti ɔyikun ɔni na úte-bu. 19Na Bunweni Kedee Ɔku kemo ni, Katɔti ɔ́su ɔnini, “Ndubo banundane lɛnunda udu bɔyila. Na lídie lɛ́tina ka bakutine lɛnunda lɛɛɛdi lɛla lɛdi.” 20Ɔmɛni ɔɔtina ka kayawi kamɛni banundane ku bakutine ku bekyuli bani mbo kenye ogya ƒui lɛnunda lɛdi adɔlɔla. 21Katɔti ɔkɛnku nwuna lɛnunda lɛlɔ na ɔ́bla bekyuli lɛni kalɛ na balasia bana kayawi lɛnunda lɛlɔ na bati-nwu. Na nwuna litemi lɛni lɛsa na bɔɔkɔ́ mɛni lɛdi badi adɔlɔla. Nsu Katɔti ɔɔsia-ni lɛlɔ na ɔɔƒɔ́ bekyuli bani na báƒɔ bádi ngba. 22Yudaƒuɔ baawia akɔla budie taatina. Na Helaƒuɔ ama kayawi lɛnunda kani na ama baawia bati. 23Nsu abu ni, Yesu ɔni na bákana bámana ugyii lɛlɔ litemi na bɔɔsu. Na litemi lɛmɛni lɛɛtu Yudaƒuɔ kayi. Na bekyuli bani naaadi Yudaƒuɔ lɛnɔ ni, beenú-ni aani adɔlɔla. 24Nsu ni, bekyuli bani na Katɔti ɔ́ƒuna ɔ́lɛku bani ndi Yudaƒuɔ ku Helaƒuɔ akɔ ni, Kristo ɔni lɛlɔ litemi na bɔɔsu mɛni ɔdi Katɔti ɔyikun ku nwuna lɛnunda. 25Ɔsika lɛla lɛni na bekyuli baanu banii ɔdi Katɔti kɔdɔlɔ ni, lɛdi lɛnunda litulo bekyuli lɛdi. Na Katɔti bɔbla kpɛtɛ kpɛtɛ ni, bubo ɔyikun butulo bekyuli lɛlɔ ɔkplu. 26Banwa, asa na Katɔti waƒuna-mii ni, binyimo kalɛ na bíse na bekyuli anumi! Bina pii biiibo lɛnunda ku ɔyikun. Iye bítasi kaba kani náƒɔ kuye kadi kemo. 27Mmomu Katɔti úse ɔ́ƒuna bekyuli badɔlɔdi na bayawine anumi kalɛ na uti-ma ɔkya kayawi kamɛni banundane kɔƒa. Na ɔ́ƒuna bekyuli bani neeebo ɔyikun ɔdi na bayawine anumi kalɛ na uti ɔkya kayawi kamɛni bayikune kɔƒa. 28Katɔti ɔ́ƒuna bekyuli bani neeebo kenyekɔ kadi na bayawine anumi, na balábu-ma lɛnɔ taakya lɛla lɛdi kemo kalɛ na uti ɔyila bekyuli bani na bayawine baabu na báƒɔ kuye udu. 29Ɔmɛni ndubɔya na ukyuli biala ulakana lɛlɔ katɔ bɔtalaku na Katɔti anumi. 30Katɔti náya na bɛ́bla unwi ku Yesu Kristo. Na Kristo ɔmmɔ ndi bula lɛnunda lɛni na Katɔti úti úte-bu. Na ɔkɛnku Kristo ɔmmɔ lɛlɔ ɔsu na Katɔti ɔɔnu-bu ka buse siin. Na búnwini Katɔti bekyuli kedee. Na ɔ́ƒɔ-bu lili kayu ɔ́lɛku ekpidi kemo. 31Ɔmɛni ɔsu na Bunweni Kedee Ɔku ɔɔsu ɔnii, “Ukyuli ɔni mɔɔkun lɛmɛnɛ ni, ɔkun lɛmɛnɛ na lɛla lɛni na Blɔti ɔ́bla lɛlɔ.”

will be added

X\