Titi 2

1Sə è gə wɔ́ ǹmyɛ́ yilə, cèrhè kàrmɔ́ mɔ̀bɔ́ mə̀ ŋwɛ́nɛ́ zhə̀n sɔ́má yó mó lyì bí ni. 2Byili bala bɛ́ náncɛsɛ́ nɛ, bə̀ bə̀ mə̌ sə bə zə bə̀ cìn cɛ̀nɛ̀; lyì bí mə̌ sə bə nyɛ̀ bɛ̀ bə̀ tùntwə̃̀ə̃̀ né yilə; bə̀ tumə né mə̌ sə nə sú lyì bí yírh; bə̀ mə̌ sə bə zhí Yi ni kẽkẽ, sónó ǹdə́ yala nɛ zhìlù wẽ́. 3Sə́ byili kana bɛ́ náncɛsɛ́ myɛ nɛ bə̀ bə̀ zə bə̀ cìn cɛ̀nɛ̀ bə wɛ̀rhɛ́ Yi pùbùlə̀; bə̀ bə mə̌ sə bə zɔ̀m lyì bí dwã bɛ́ yil námməlwɛ̀lɛ́; bə̀ bə mə̌ sə bə yə̀ sɛ̃́ mɔ́ yómə́ yé; bə̀ mə̌ sə bə byili kɔn dɛ̀bɛ́ rə̀ càn, 4mùnì bə tó rə̀myɛ́ dɛnnɛ bə byili kə-bwə̃́ə̃́ bé ne bə̀ bə̀ swéné bə̀ byə́nə́ bé ǹdə́ bə̀ bə̀sɔ́ná bɛ́. 5Èta, bə̀ má yə̀ wárhgáá, bə yə̀ lyì byɛ̀bɛ́ bə̀ má sú lyì bí yírh. Bə̀ mə̌ sə bə nyǐ bə̀ kǎlsɛ́ yò; lyì bí swéné be, sə bə shɛ̀nɛ́ bə̀ byə́nə́ bé nyí ni. Èta, lò kə́ ń wàr ń bà n zɔ̀m Yi zɔ̀mɛ̀ rɛ́ yò námməlwɛ̀lɛ́ yé. 6Cící ébwá-dàlá bɛ́ myɛ bə zə bə̀ cìn cɛ̀nɛ̀, bə̀ tumə né sú yírh; 7sə ǹmyɛ́ cìcì mú yə̀ myɔrhɔ nántwə̌ ǹ tùntwə̃̀ə̃̀ né ǹdə́ ǹ kɔn gakó wẽ́, ń zə ǹ cìn cɛ̀nɛ̀, sə́ byili kàrmɔ́ lyì bí ni zhə̀n zhə̀nà ǹdə́ ǹ wu gakó. 8Ǹ zɔ̀mà nɛ́ gə wɔ́ zhə̀nà, lyì bí t'â la ǹ sõ zɔ̌m yé. Èta, cìzhìl bá zə nə́ zwə̀ bé, bə̀ t'â la kɔn dɛ̀bɛ́ rə̀ wɔ́ lwɛlɛ nɔ bə zɔ̀m nə́ yil yé. 9Cící byɛ̀bɛ́ bə̀ wɔ́ yómə́ mó bə zwẽ bə̀ yó-cìnə́ bé nyí ni kɔn gakó wẽ́. Bə̀ bə̀ká cẽ bə̀ nyí ni yé, sə bə wɛ̀rhɛ́ bə̀ pùbùlə̀. 10Bə̀ bə̀ká myìnì bì yé, sə bə zə wu-põ̀ ǹdə́ bɛ, mùnì bə ce lyì bí nyɛ̀ Yi nə́ Zwennə mó zɔ̀mɛ̀ rɛ́ nə́ r'é byili mú kɔn gakó wẽ́. 11Yi byili nə́ba rə̀ yò-ècɔ̀nɔ̀ w ò n'ô vwǎrh lyì bí gakó mó. 12Yò-ècɔ̀nɔ̀ w òmyɛ́ mɔ́ n'ô byili nə́ba bə̀ nə́ yẽ̌ lwɛlɛ ǹdə́ lũ w shilə námməlwǎlsɛ dwí gakó ne, mùnì ga nə́ yə̀ lyì-twə̌rh, nə́ yə̀ wu-põ̀ ǹdə́ wu-cángá cìnə́, bə̀ já zhí Yi ni. 13Wɔ́ èta nə́ mə̌ sə nə́ wɛ̀rhɛ́ nɛ́ nə́ m'é dɛ̃̀ wu-nyɔ̃̀ dɛ̃ rɛ́ tɛ̀bɛ́ nə́ Da Yi ǹdə́ nə́ Zwennə Yezu Kristə zùwə́ y la du lyì bí yírhə́ w mó. 14Ń pɔ ń cìn nə́myɛ̌ yilə, mùnì ga n vwǎrh nə́ba nə́ yə̀-bəlwàálɛ́ wa, n ce nə́ jǐrh ń lyì byɛ̀bɛ́ ń shàrh bə jǐrh wárhgáá, bə̀ só sə bə wɛ̀rhɛ́ cɛ̀nɛ̀ twéé twéé. 15Wɔ́ rə̀myɛ́ ǹ mə̌ sə́ byili ǹdə́ ŋwɔ̀nɔ́ w kɔ̀bɔ́ ǹ zhe mó, mùnì ń cící byɛ̀bɛ́ bə̀ n'ê cili ǹ zɔ̀mà nɛ́ mɔ́. Bə̀ká yẽ̌ bə̀myɛ́ mə̀dù ga pɔ̀ɔ́sɛ mɔ́ yé.

will be added

X\