Orɔm 5

1Nə́ gə́ zhí Yi ni mú ce nə́ k'é bə dwə́ə́re zhe yé. Èlǎsɛ̃́, yə̀-zùlə́ ŋwɛ́nɛ́ nə́myɛ̌ ǹdə́ rə̀myɛ́ bwə̌l wə, nə́ Cinu Yezu Kristə jàn yilə. 2Ń ce nə́ tó nə́ Yi-ni-zhú mú dɛnnɛ nə́ ŋwɛ̀nɛ́ nə́ lwar rə̀ sónó w gə́ nyɛ̌ nɛ́. Èta, nə́ zhǐ ò wẽ́ kẽkẽ. Nə́ wun j'à nyɛ̀, bə̀ nə́ yě bə̀ nə́ b'ǎ nə cəl rə̀ zùwə́ y wẽ́. 3Sə kɔn du, nə́ wun gə́ nyɛ̀ mɔ́, wɔ́ nə́ gə́ yě bə̀ nə́ gə n'é nwɛ̀nɛ̀ myɛ, nɔ̀nɔ̀ w òmyɛ́ bá ce nə́ pyɛ́nɛ́ nə́ zhì kẽkẽ. 4Sə cìn-pyɔ́nɔ́ mɔ́ mə̀myɛ́ bá ce, nə́ zhì nə́ nà yó yò-còlò yi ní. Èta, nə́ gə pyɛ́nɛ́ nə́ zhì nə́ nà y yó, nə́ b'ǎ ŋwɛ̀nɛ́ nə́ dɛ̃̀ Yi nyì-bwelé y pyǐrh mó. 5E jà rə̀ nyì-bwelé y nə́ r'é dɛ̃̀ è pyǐrh mó də̀ jə́jɔ̀rɔ́ kɔn yé, bə̀ Yi ce rə̀ sónó w sú nə́ wun ní, rə̀ Eshirhə y rə̀ pɔ nə́ba mɔ́ jàn yilə. 6Zhə̀nà, yi rí tɛ̀bɛ́ Yi y'à cír mó gə́ tú e yí, ǹdə́ nə́ y'ǎ gwẽ̌ wɔ́ bə-jàn-zhəəre cìnə́, Kristə cù lyì-bəlwǎlsɛ yilə. 7Kɔn zum ǹdə́ lò la shɛ̀nɛ́ n cì wu-cángá cí yilə, sə dɛ̀ga, lò wɔ̌ ń mà n shɛ̀nɛ́ n cì lyì-twə̌ yilə. 8Sə ǹdə́ nə́ gə́ y'ǎ gwẽ̌ wɔ́ yə̀-bəlwàálɛ cìnə́ yi ní, Kristə cù nə́ yilə. Wɔ́ èta Yi tó né rə byili nə́ba rə̀ sónó wə́. 9Ń jal mɔ́ mə̀ ló tɛ̃́ mɔ́ ce nə́ k'é bə dwə́ə́re zhe yé; sə kɔn du, nə́ yě pamparɛ̃ɛ̃ bə̀ ń bà n zwẽ nə́ba nə́ lú Yi lyim dí yé né. 10Nə́ y'ǎ wɔ́ Yi zwə̀, sə rə̀ tó rə̀ Byǐ mú cu mú dɛnnɛ rə kwɛrhɛ nə́ yò ǹdə́ rə̀ cìcì. Sə kɔn du èlǎsɛ̃́, nə́ yò gə́ kwɛrhɛ ǹdə́ rɛ mɔ́ ce, rə̀ bá tó rə̀ Byǐ mú bùrhù mú dɛnnɛ rə vwǎrh nə́ba. 11Sə è də̀ rə̀myɛ́ dúdú yé. Nə́ wun nyɛ̀ ǹdə́ Yi, nə́ Cinu Yezu Kristə jàn yilə, bə̀ wɔ́ ńmyɛ̌ jàn yil nə́ yò kwɛrhɛ ǹdə́ Yi. 12Wɔ́ lò mə̀dù sásá dɛnnɛ yə̀-bəlɔ̀lɔ́ tó né o zù lũ w wẽ́. Lò mó ńmyɛ̌ mɔ́ wɔ́ Adəma. Sə wɔ́ yə̀-bəlɔ̀lɔ́ ò zə cu o bà. Wɔ́ rə̀myɛ́ è ce lyì bí gakó n'ê cì, bə̀ bə̀ gakó wɛ̀rhɛ́ yə̀-bəlwàálɛ. 13Yi gə́ pɔ rə̀ nyə́ né Muyiisi ni mú, ǹdə́ yə̀-bəlɔ̀lɔ́ y'à jɛ̀rɛ̀ ò ŋwɛ́nɛ́ lũ w wə. Sə nyə́ gə́ y'à tɛ̀nɛ́ mɔ́ ce, Yi y'à t'â nyǐ rə̀myɛ́ ǹdə yò ta yé. 14E jà kɔn zhí Adəma e bé yí Muyiisi yi ní, cu mú zɔ jàn. Adəma cẽ Yi nyí ni. Bá lyì byɛ̀bɛ́ bə̀ y'à yə̀ yə̀-bəlɔ̀lɔ́ wɛ̀rhɛ́ ǹdə ń ta mɔ́ myɛ cìcì y'à n'ê cì. Adəma yà ń wɔ́ mɔ̀bɔ́ ń yà ń mə̌ sə n bə̀ mɔ́ nyɔrhɔ. 15Sə Yi pɛnɛ́ y ǹdə́ Adəma yə̀-bəlɔ̀lɔ́ w bə dwã mə̌ yé. Zhə̀nà, lò mə̀dù sásá dóó ce lyì nánzhəzhɔ̌ n'ê cì, sə Yi pɛnɛ́ y zhe kùr dɛ̃́dɛ̃́ du. Wɔ́ Yezu Kristə jàn yil Yi wɛ̀rhɛ́ cɛ̀nɛ̀ dɛ̃́dɛ̃́ ǹdə́ lyì nánzhəzhɔ̌. 16Kɔn dɛ́ dɛ̀bɛ́ Yi n'ê pɛ mɔ́ ǹdə́ yə̀-bəlɔ̀lɔ́ w lò mə̀dù mə n bə̀ mɔ́ nyǎn dɛ́ də̀ rə̀dù yé. Yə̀-bəlɔ̀lɔ́ w lò mə̀dù mə n bə̀ mɔ́ ce Yi kə́ lyì bí bùrsì, rə pə bɛ còrhò-tum. Zhə̀nà, lyì bí wɛ̀rhɛ́ yə̀-bəlwàálɛ nánzhəzhɔ̌, sə Yi ce bə̀ k'ê bə dwə́ə́re zhe, rə̀ gə́ pɔ bɛ rə̀ pɛnɛ́ y mɔ́ yilə. 17Lò mə̀dù sásá dóó yilə, cu mú zɔ jàn, sə Yi tó Yezu Kristə dúdú sá dɛnnɛ rə̀ n'ê pɛ pansɛ nánzhəzhɔ̌ numbyínə́ bé ne. Yi n'ê wɛ̀rhɛ́ bɛ cɛ̀nɛ̀, rə ce bə̀ k'ê bə dwə́ə́re zhe yé, sə bə̀ má nə nyǔ bə tó bə jí pyɛ̀lɛ̀ Kristə jàn yilə. 18Lò mə̀dù sásá dóó ce lyì bí gakó nə còrhò-tum. Èta myɛ, lò mə̀dù sásá cángá tumə ce bə̀ k'ê bə dwə́ə́re zhe yé, sə bə̀ zhe nyǔ myɛ ń jàn yilə. 19Shãã ga, wɔ́ lò mə̀dù sásá ń yà ń cẽ Yi nyí ni, lyì nánzhəzhɔ̌ zɛ̃̀ bə jǐrh yə̀-bəlwàálɛ cìnə́. Èta myɛ, wɔ́ lò mə̀dù sásá ń shɛ̀nɛ́ Yi nyí ni, lyì nánzhəzhɔ̌ zɛ̃̀ bə jǐrh lyì byɛ̀bɛ́ bə̀ bə dwə́ə́re zhe. 20Yi nyə́ né túwə́, dwə́ə́ré já zɛ̃̀ rə̀ n'ê súlí, rə jǐrh nánzhəzhɔ̌. Sə yə̀-bəlwàálɛ́ gə́ súlí dɛ̃́dɛ̃́ mə̀gã̌, Yi yò-ècɛ̀nà nɛ́ súlí dɛ̃́dɛ̃́ du. 21Yə̀-bəlɔ̀lɔ́ w y'à zhe ŋwɔ̀nɔ́ ò n'ô gwi lyì bí. Èta myɛ, Yi yò-ècɔ̀nɔ̀ w zhe ŋwɔ̀nɔ́ ò n'ô ce nə́ k'é bə dwə́ə́re zhe, nə́ zɛ̃̀ nə́ zhe nyǔ mə̀ t'â la zhɔ̌ nə́ Cinu Yezu Kristə jàn yilə.

will be added

X\